¹ Nakandi, Yezu agenda aja gera murhundu oku murhundu na cishagala oku cishagala, aj'ayigiriza n'okuderha emyanzi minja y'obwami bwa Nnamahanga. ² Ikumi na babiri lyali haguma naye n'abakazi baguma bafumaga abazimu babi n'endwala: Mariya, yederhagwa Magdalena, ye warhenganga mwo bazimu nda, ³ Jane, muka chuza, murhambo wa Herodi, Suzana, na bandi banji, bakagi barhabala oku birugu byabo. ⁴ Lubaga lwinji lwakagi rhiganana, na balya barhengaga omu bishagala bya hofi naye. Aba bwira ogu muganimwo: ⁵ Murhwezi muguma anagenda aji rhwera emburho yage nkoku anarhweraga, mburho nguma zarhogera hofi n'enjira: zalabarhwa n'amagulu, n'orhunyunyi rhw'emalunga rhwazilya. ⁶ Ezindi mburho zarhogera omu lukarabuye: erhi zimera, zayuma, bulya zirhali gwerhe mishi. ⁷ Ezindi zarhogera omukarhi k'emishugi: Emishugi yamera haguma nazo yazi hehemeza. ⁸ Ezindi zarhogera omwidaho linja: erhi zimera zaleheka ngasi nguma igana. Erhi aba akola ali aderha, Yezu aderha okw'izu linene: Ogwerhe amarhwiri g'okuyunva ayunve! ⁹ Abaganda bage bamudosa gurhi gudesire ogwo mugani. ¹⁰ Abashuza: Mwahabirwe okumanya ebisomerine by'obwami bwa Nnamahanga; cikoki okubandi, ebyo byadesirwe oku migani, nkomukubona barhabwini ciru, nkabayunvirhe barhana yunvirhi bici. ¹¹ Alaga oku gudesire ogwo mugani: Emburho guli mwanzi gwa Nnamahanga. ¹² Balya bali hofi n'enjira, bo bakayunva; buzinda lyangombe anayishe anakule gulya mwanzi omu mirhima yabo mpu lyo barhaki yemera n'oku cira. ¹³ Na balya bali omu lukalabuye, bo balya, erhi bayunv'omwanzi, bana guyankirire n'obushagaluke; cikoki barhagwerhi mizi, banaka yemera oku kasanzi kasungunu. N'okuci berula omu kasangi k'amarhangulo. ¹⁴ Nazilya zarhogire omu mishugi, bo balya, bayunvirhe omwanzi, n'okugenda, banagulekerere gwabandwa n'enyifinjo, n'obugale, n'amagene g'akalamu, ntyo zirhacileheka malehe kakuzire. ¹⁵ Ezarhogire omwidaho linja, bo balya bayunvirhe omwanzi n'omurhima mwinja gwo bwirhonzi, baguseze, banahane emburho oku bushibirizi. ¹⁶ Ntaye, wakaba wayasize akamole, akabwike omushangi, erhi akahebe idako ly'enchingo; cikwoki anaguhebe oku gumanikwe enyanya ly'abadaha baja babona obulangashane. ¹⁷ Bulya ntabyo bifulike birhankahashi fululwa, ntaly'ihwe lirhanka manyikana kalengerere. ¹⁸ Mucilange nkoku mwayunvirhe bulya bayishikaha abagwerhe, cikwoki orhagwerhi bayishi munyaga ciru n'ehyankarhanya mbw'agwerhe. ¹⁹ Nnina na balumuna ba Yezu bagenda mpu bamubone, cikwoki barhamushahaga barhamuhikaga kwo, erhi ngabo zirhuma. ²⁰ Bamubwira: Nyoko na balumuna bawe bali aha mbuga, banali cifinjire okukubona. ²¹ Cikwoki ashuza: Nyama n'abalumuna bani, bo balya bakayunva omwanzi gwa Nnamahanga n'okugu kenga. ²² Lusiku luguma, Yezu ashona omu bwarho haguma n'entumwa zage. Ababwira: Rhugere olundi lushiriza lw'enyanja: Banagenda. ²³ Nabo erhi baba bakola baja genda, Yezu ahunira. Akalaba kazuka omu nyanja, obwarho bwayunjula mishi, balikola barhereka. ²⁴ Bamuyegera banamuzusa, n'okuderha: Mwalimu, mwalimu, rhwamahera! Azuka, akalihir'empusi n'akalaba, byahulika n'omurhula gwayisha. ²⁵ Kandi ababwira: Obwemere bwinyu ngahi buli? bagwarha n'oboba bwinji bana somerwa, babwirana bone na bone: yendyuyu wani, owarhegeka ciru n'empusi n'amishi byamana mukenga? ²⁶ Bahika omu cihugo ce gerasi, ciri ahishiriza ly'e galilaya. ²⁷ Erhi Yezu ahonoka okwidaho, abona omuntu womweco cihugo, wali mw'abazimu banji. Kurhenga mira arhayambalaga mishangi. Na kandi arhali alamire omu mwage, cikwoki omu byusho. ²⁸ Erhi abona Yezu, ayakuza, acikweba oku magulu gage, aderha okwizu linene bici rhwembi, Yezu, Mwana wa Nnamahanga oli enyanya? Nkuyingizire, orhandibuze. ²⁹ Bulya Yezu arhegeka abazimu babi barhenga kw'oyo muntu, olya wali mushweke kurhenga mira; bakagi mulanga n'oku mushweka n'obudagule omu bisé, akatwa bilya byali mushwesire, anali herhwe n'omuzimu omw'irungu. ³⁰ Yezu amudosa: Izino lyawe wendi? Ligioni, ashuza. Bulya bazimu banji bamulimwo. ³¹ Bana muyinginga bwenene Yezu mpu arhabarhegeke okuja omu busherere. ³² Hali aho, omu ntondo, obuso bwinji bwa ngulube bwali yabukire ho. Abazimu bayinginga Yezu mpu abarhereke baje omwezo ngulube. Abayemerera. ³³ Abazimu barhenga omw'oyo muntu, baja omwezilya ngulube, ehyo hirhumbi hya shandabana oku mala zaja omu nyanja, za cizika. ³⁴ Abali ziyabwire, erhi babona ebyanana hikirira, bayaka, bayalagaza emyanzi omu murhundu n'omu bishagala. ³⁵ Abantu bagenda bajilola bici byabire. Bahika hofi na Yezu, banashimana omuntu warhengaga mwo abazimu, atamire aha magulu gage, anayambirhe, agwerhe n'obwenge bwinja; bayoboha. ³⁶ Ababwine oku byabire bababwira gurh oyo muntu w'abazimu anafumire mwo. ³⁷ Abantu boshi b'omu cihugo c'abagarasi bahuna Yezu mpu arhenge hofi nabo, bulya baliyunjwire bwoba. Yezu asoka omu bwarho, acigalukira. ³⁸ Omuntu warhengagwa mw'abazimu amuhun'oluma mpu abere bonaye. Cikwoki Yezu amulahira, amubwira: ³⁹ Galuka emwinyu ogendi ganira ebyoshi Nnamahanga akujirire. Anacigenda, ayalagaza omulugo lwoshi ebi Yezu amujirire. ⁴⁰ Omu kugaluka gwage, Yezu ayankirirwa n'olubaga, bulya lwoshi lwakagi mulindirira. ⁴¹ Mulolage, hayisha muntu muguma, waderhagwa Yairo, ali murhambo w'esinagogi. Acikuba oku magulu gage, anamuyinginga mpu adahe omu nyumpa yage, ⁴² Bulya aligwerhe mwananyere muguma yene wa miaka ikumi n'ibiri afa. Erhi Yezu akola aja yo, olubaga lwinji lwamu gorha. ⁴³ N'obu, hali mukazi muguma waligwerhwe n'omududu lugero lwa miaka ikumi n'ibiri, anali erhi ahezize ebirugu byage byoshi oku bafumu, na ntaye wamubusire. ⁴⁴ Anacij'amuyisha enyuma, ahuma oku cishumire c'omushangi gwa Yezu. Hona halya okurhenga kw'omuko kwanahwa. ⁴⁵ Na Yezu aderha: Indi wampumire kwo? Nkokwo boshi bacigukumwiré, Petero n'aba bali boshi bamubwira: Mwalimu, olubaga lukuzungulusire n'okukutuza, wana gali derha mpu: Indi ompumire kwo? ⁴⁶ Cikwoki Yezu ashuza: Hali owampumire kwo, bulya nayunvirhe oku emisi yarhenzire okunye. ⁴⁷ Nnamukazi, erhi abona oku bamubwine, ayisha ajuguma acikweba aha magulu gage, amubwira n'obwalagale embere ly'olubaga bici byarhumire amuhuma kwo, na gurhi anafumire honaho. ⁴⁸ Yezu amubwira: Munyere wani, obwemere bwawe bukucizize; genda n'omurhula. ⁴⁹ Nkoku aciri ali aderha, hayisha owemw'omurhambo w'esinagogi muguma aderha: Mwali wawe anafire; orha cimurhindibuze mwalimu. ⁵⁰ Cikwoki Yezu, erhi ayunva ebyo, abwira omurhambo w'esinagogi: Orhayobohe, oyemere kwone, naye acira. ⁵¹ Erhi ahika omu nyumpa, arhaciyemeraga omuntu mpu adahe naye, nkaba arhali Petero, na Yohana na Yakobo, n'ishe na nnina w'omwana. ⁵² Boshi bakagi laka n'okucirhindibula. Lero Yezu aderha: Murhacilake; arhafiri, cikwoki ahunire. ⁵³ Bamu shoholera, bamanya mpu anafire. ⁵⁴ Cikwoki amugwarha okuboko, anaderha okw'izu linene: Mwana yimuka. ⁵⁵ N'omuka gwage gwamushubira mwo, honaho anayimuka; Yezu arhegeka oku bamuhe eby'okulya. ⁵⁶ Ababusi b'oyo munyere basomerwa, anaci bakomereza mpu barhabwiraga muntu yeshi yeshi ebyabire.