¹ Yezu, anacihamagala balya ikumi na babiri, abaha emisi n'obuhashe oku bazimu boshi, n'obuhashe bw'okufumya endwala. ² Abarhuma mpu bayigirize obwami bwa Nnamahanga, n'okufumya abalwala. ³ Murharhole bici oku lubalamo, ababwira, ciru agarhi, n'enshoho, ciru n'omugati, ciru n'enfaranga, erhi muguma winyu arhabaga na mishangi ibiri. ⁴ N'enyumpa yoshi mwankaja mwo mutamale mwo; kuhika murhenge yo. ⁵ Na nkaba barha muyegerezizi murhenge omwezo nciga, mugukumule ivumbi oku magulu ginyu, libe buhamiriza ahanyanya lyabo. ⁶ Bagenda, bagera omu ngo n'engo n'okuderha emyanzi mihyahya ngasi hoshi n'okuja fumya. ⁷ Herodi mwami ayunva baderha ngasi byoshi byagezire, arhanali manyire nka ntanya. bulya abantu bakagiderha mpu Yohane afusire omu bafu; ⁸ Abandi, mpu Eliya anabonesire, nabandi, mpu muguma w'abalebi ba mira anafusire. ⁹ Cikoki Herode aderha: Natwire Yohana; ndigi kwoki uyu, nyunvirhe aderha ebyo? n'owalonzagya okumubona. ¹⁰ Entumwa, erhi zigaluka, zabwira Yezu ngasi byoshi zajijire. Abarhola haguma naye, anaciyegula eburhambi, eburhambi ly'enciga ederhwa Betsaida. ¹¹ Olubaga, erhi lumanya, lwamushimba. Yezu abayegereza, anababwira emyanzi y'o bwami bwa Nnamahanga; afumya na balya bagwerhwe ne nyorha yokufumibwa. ¹² Nkoku bwalikola bwaja jinga, balya ikumi na babiri bamuyegera, bamubwira: Osengeruke olubaga, lyo luja omungo n'omu bihugo by'eburhambi, lyo bagwishira lyo babona n'ebilyo; bulya hano rhuli muli omw'irungu. ¹³ Yezu ababwira mubahe mwenene ebyo kulya: Cikwoki bashuza rhugwerhe mikati irhanu yone na nsamaki zibiri, nkaba rhugende rhwene rhuji gulira abantu ebyokulya. ¹⁴ N'obu, aligwerhe bantu bihumbi birhanu. Yezu abwira abanafunzi bage: Mubatamaze ngasi cirhumbi makumi arhanu. ¹⁵ Bajira ntyo, babatamaza boshi. ¹⁶ Yezu arhola eyo migati irhanu n'ezo nsamaki zibirhi, ayinamula amasu empingu, abigisha. Anayibega, anahereza abigirizibwa, buzinda bagabira olubaga lwoshi. ¹⁷ Boshi balya bana yigurha, n'ezindi ngega ikumi na zibiri zasigala ziyunjwire mwe bisigaza. ¹⁸ Lusiku luguma Yezu anaciba alyahuna aciyegula, ali haguma n'abigirizibwa bage, abadosa er'idoso: Gurhi bali baderha mpu niendi? ¹⁹ Bashuza: Yohane mubatiza; n'abandi, Eliya; abandi, mpu muguma w'omu balebi ba mira anafusire. ²⁰ Na ninyu, abadosa, mundesirage ndi? Petero ashuza: we Kristu wa Nnamahanga. ²¹ Yezu anacibabwira n'obukali oku barhabwiraga muntu yeshi yeshi. ²² Ayushula oku byali muhunyire omwana w'omuntu abone bizibu binji, n'okulahirwa n'abashosi n'abakulu b'abajinji n'abandisi, n'okunigwa, n'okufuka olusiku lw'akasharhu. ²³ Kandi ababwira boshi: Omuntu yeshi wakalonza okuyisha emunda ndi, n'okuci lahira yene, n'okuheka omusalaba gwage ngasi lusiku, ananshimbe. ²⁴ Bulya ngasi yeshi walonza okuciza obuzine bwage abuheza, cikwoki owa buheza erhi nye ntuma abuciza. ²⁵ Bici kwa kwanana omuntu okuyim'igulu lyoshi, nkaka ciharibisa erhi aciheze yene? ²⁶ Bulya ngasi yeshi wananyunvize nshonyi ne myanzi yani, omwana w'omuntu ayishi bona enshonyi zage, hano ayisha omu buhashe bwage, n'omu bulya bwishe na ba malaika bacesibwa. ²⁷ Nmubwizire okuli, baguma ba bano bali hano barhaka fâ barhabona obwami bwa Nnamahanga. ²⁸ Hofi nsiku munani enyuma ly'okuderha eyo mianzi, Yezu akagihuna boshi na Petro, Yohana na Yakobo, anashona oku ntondo ajihuna. ²⁹ Erhi ali ahuna, enshusho y'amalanga gage yahindamuka, yaka langashana yaba myeru. ³⁰ Olole, bantu babiri bakagi ganira boshi naye: Hali Musa na Eliya, ³¹ bo, babonekanaga omu buhashe, baderha emyanzi y'okuja bali baja e Yerusalemu. ³² Petero na balya bali boshi bagwarhwa n'eliro; cikwoki, erhi bazuka, babona obukuze bwa Yezu na balya bantu babiri bali boshi. ³³ Ako kasangi abo bantu baci berula na Yezu, Petero amubwira: Mwalimu, bili binja rhube hano; rhujire bibanda bisharhu, ciguma cawe, n'ecindi ca Musa, n'ecindi ca Eliya. Arhamanyaga ebi badesire. ³⁴ Nkoko adesire ntyo, olwikungu lwaloza oku barhumbikira; abanafunzi bagwarhwa n'oboba erhi babona baja omw'olwo lwikungu. ³⁵ N'omwolo lwikungu mwarhenga izu, lyaderha erhi oyu ali mwana wani mulondolwa: mumuyunve. ³⁶ Erhi erizu liri lyayunvikana, Yezu abonekana yene ana. Abanafunzi bahulika, barha bimanyusagya oku muntu yeshi yeshi, okwako kasangi, oku byoshi babwine. ³⁷ Lisirhondo, erhi bahonoka oku ntondo, lubaga lwinji lwarhimanana na Yezu. ³⁸ Mulole, omu karhi k'olubaga mulume muguma ashonya izu lyage aderha: Mwalimu, nku sengire, olole oku mwana, mwana wani muguma yene. ³⁹ Abazimu banamugwarha, naye ayakuza; abazimu bacihola oku misi, na kandi arhondera arhengwa n'ifula, nalyo arhamulikaga erhi mira yeshi amuyogola. ⁴⁰ Nayingizire abanafunzi bawe mpu babahinve, barhana hashaga. ⁴¹ Yezu abashuza aderha, mashi mwimo gurhagwerhi bwemezi, ka hano mba haguma na ninyu mwashi mpasha? lerhaga eno omwana wawe. ⁴² Erhi ayegera, abazimu bamukweba okw'idaho, amugeza mw'omusisi. Cikwoki Yezu ahinva abo bazimu babi, afumya omwana, anamugalulir'ishe. ⁴³ Boshi basomerwa erhi babona obukulu bwa Nnamahanga. Erhi boshi baba basomirwe n'ebyo byoshi Yezu akagi jira, abwira abanafunzi bage: ⁴⁴ Okumwe, muyunve bwinja ebi: Omwana w'omuntu aba ahebirwe omu maboko g'abantu. ⁴⁵ Cikwoki abanafunzi barhayunvagya akwo kanwa; kali kafulike oku bo, barhaco manye oku kadesire, bakayoboha okumudosa gurhi kudesire. ⁴⁶ Cikwoki, entanya zabo zayisha oku muka gucesibwe. kumanya ndi washiba mukulu omu karhi kabo. ⁴⁷ Yezu, abon'entanya zily'umu mirhima yabo, arhola omwana murho, amuheba hofi naye, ⁴⁸ Ababwira: Ngasi yeshi wayegereza oyu mwana okw'izino lyani anyegerezize, na ngasi yeshi wanyegereza ayegerezize ciru n'owantumaga, bulya ngasi oli murho omu mwe mweshi, ye yolya oli mukulu. ⁴⁹ Yohana arhola akanwa, aderha: Mwalimu, rhwabwine omuntu w'ajahinva abazimu okw'izino lyawe; rhwana mulahiza, bulya arharhushimbiri. ⁵⁰ Yezu abashuza, murha mulahize; bulya orhaciberwiri na ninyu ali na ninyu. ⁵¹ Erhi ensiku zage zokurhenga omw'igulu zikola zili hofi, Yezu ahuna obuhashe bw'okugaluka e Yerusalemu. ⁵² Arhuma abarhumisi bage bamushokolera, baja ciduma omu njira bana daha omu cibanda ce Samariya mpu bamu rheganyize ahantu. ⁵³ Cikwoki barhamuyegerezagya, bulya ali yerekire e Yerusalemu. ⁵⁴ Entumwa Yakobo na Yohana, babona ebyo, baderha: Nnahamwirhu, k'olonzize rhuhamagale omuliro guhonoke kurhenga empingu guba hererekeze? ⁵⁵ Yezu abahindamukira, n'okuba manyusa, aderha: Murhamanyiri mirhima mici eri omu mwe eri yabakolesa. ⁵⁶ Bulya Omwana w'omuntu ayishîre, arhali wakuheza emirhima y'abantu, cikwoki enyanya ly'oku baciza. Banagenda omu lundi lugo. ⁵⁷ Erhi baba bali omunjira, muntu muguma amubwira: Nnahamwirhu, nakushimba hoshi wanajé. ⁵⁸ Yezu amushuza: ba cibata bagwerhe enyumpa yabo, n'orhunyunyi rhw'emalunga rhugwerhe enyogo zarho: Cikwoki Omwana w'omuntu arhagwerhi ahantu ankarhamulira irhwe lyage. ⁵⁹ Abwira owindi: Nshimba. Anashuza: Nnahamwirhu, ompe oluhuma lw'okugenda ntagi jibisha larha. ⁶⁰ Cikwoki Yezu amubwira: Oleke abafu babishe abafu babo; nawe, ogende oje wa yalagaza obwami bwa Nnamahanga. ⁶¹ Owundi aderha: Nakushimba, Nnahamwirhu, cikwoki ompy'oluhuma ntakiyishi sengeruka abomunyumpa yani. ⁶² Yezu amushuza: ngasi muntu wahebire okuboko kwage oku kuhinga, agali kebagana enyuma, arhashinganini omu bwami bwa Nnamahanga.