¹ Yezu aciri bwira abigirizibwa bage: Muntu muguma mugale agwerhe omu bisi, bamuwira oku agwerhe asheeza ebirugu byage, ² Amuhamagala amubwira: Bici ndinayunva bakuderhera? Lambula oburhegesi bwawe, bulya orhacigendekere wayimangira ebirugu byani. ³ Omubisi acidosa: Gurhi najira, bulya nnahamwirhu anankula oku burhegesi bw'ebirugu byage? Kakuhinga? Ntahashe. Kuhuna? Ziri nshonyi. ⁴ Nmanyire ebi najira, lyo hajir'abantu bayishi nyankirira omubwami hano bantenza oku mukolo. ⁵ Ahamagala ngasi balya baligwerhe nnahamwabo emyenda, abwira owa burhanzi: zinga ogwerhe nnahamwirhu? ⁶ Macupa igana ga mavurha, kw'amushuzize: Rhola akaratasi kaawe, dahala duba, oyandike makumi garhanu. ⁷ Abwira owundi: Nawe zinga ogwerhe? Ba namaha igana ba ngano. Amushuza; rhola akaratasi kaawe oyandike makumi gali munani. ⁸ Nnahamwabo akuza oyo mubisi orhali mwikubagirwa oku anakolesize obwirhonzi. Bulya abana b'umu zino nsiku bali birhonzi oku benewabo barhali bana ba bulangale. ⁹ Nani, nmubwizire: Muciyinjibanye oku bugale burhashinganini, lyo bayishi muyankirira omubwami bw'ensiku n'amango, hano obugale bumuhwera. ¹⁰ Oli mwikubagirwa oku bitya ye nalimwikubagirwa oku binji, n'orhali mwikubagirwa oku bitya, arhanaliye oku binji. ¹¹ Nka murhali bikubagirwa oku bugale burhashinganini, ndi wankabaha obw'okunali? ¹² N'erhi nka murhali bikubagirwa oku biri byabene, ndi wankamuha ebinyu? ¹³ Ntaye mukozi wanka kolera ba nnahamwabo babiri. Bulya agaya muguma asime owundi, ehi acishwekera oku muguma n'okugaya owabo. Murhanka kolera nnamahanga na mamone. ¹⁴ Abafarisayo, bali ba nabunani, bayunva ebyo byoshi nabo, banak muganyagusa. ¹⁵ Yezu ababwira: Mwe mulimwalonza oku boneka bashinganya embere z'abantu, cikwone nnamahanga amanyirire emirhima yinyu; bulya ebiri bimana omu bantu byo bigayisa Nnamahanga. ¹⁶ Irhegeko n'abalebi byayimanzire kuhika Yohane; Kurheng'aho, obwami bwa Nnamahanga bwa yalagazibwe, na ngasi yeshi akoles'emisi oku budahamwo. ¹⁷ Biri bilembu kulusha, empingu n'igulu bigere, kulusha kanwa kaguma omw'irhegeko oku hirima. ¹⁸ Ohinva mukage n'oku yanka owundi erhi ajijire obushungu, na ngasi oherula omukazi iba anahinvaga ajijire obushungu. ¹⁹ Hali mulume muguma mugale, akazigi yambala emishangi mudukula y'ecishingo, na ngasi lusiku akagi lama oku bushagaluke n'omurhula. ²⁰ Mukenyi muguma, Lazaro, akagi gweshera oku lunvi lwage, ali wa mahere, ²¹ akagi cifinja okulya ebyakagi rhoga oku cibo c'oyo mugale, na ciru ebibwa byakagi yisha bije bya mima ebibande byage. ²² Oyo mukenyi afa, na ba malaika bamuheka omu cifuba ca Abrahamu. Omugale naye afa, anabishwa. ²³ Omu ncinda alambul'amasu, bulya aligwerhe malibuko manji, abona Abrahamu kuli, na Lazaro ali omu cifuba cage. ²⁴ Ayakuza: Larha Abrahamu, ombere obwonjo, orhume Lazaro alobye olunu antinyeze oku lulimi, bulya ndibwire hakufa omw'eyi ngulumira. ²⁵ Abrahamu amushuza: Mwanawani, kengera oku wahabirwe ebirugu omu kalamu kawe, n'oku Lazaro alibwire omu kalamu kage; ene alyarhulirizibwa, nawe, oli walibula. ²⁶ Nakandi, aholi n'aha rhuli hali busherere bunene, lyo ntabyo byankarhenga eno bije eyo, erhi birhenge eyo bije eno, birhanka hashikana. ²⁷ Omugale aderha: Nkusengire ntyo, larha Abrahamu, orhume Lazaro omu nyumpa ya larha, bulya ngwerhe balumuna bani barhanu. ²⁸ Lyo abayemeza ebyo, lyo barhaki yisha nabo hano hantu h'amalibuko. ²⁹ Abrahamu amushuza: Bagwerhe Musa n'abalebi; babayunve. ³⁰ Aderha: Nanga, laha Abrahamu, cikwone erhi muguma w'omu bafire akabagendera, banaciyunjuza. ³¹ Na Abrahamu amubwira: Nkaba barhayunvirhi Musa n'abalebi, barhakanacileka okurhebwa ciru muguma w'abafire aka fuka.