¹ Abavurhisa n'abantu b'engeso mbi bayegera Yezu mpu bamu yunvurhize. ² N'abafarisayo n'abashamuka b'ihano bacigamba baderha: Oyu muntu anakayegereza abantuu b'engeso mbi, n'okulira hguma nabo. ³ Cikwone ababwira ogu mugani: ⁴ Muntu ndi mulimwe, nk'agwerhe bibuzi igana, erhi ciguma cakamuhera, orhakasiga amakumi galimwenda na mwenda omu bulambo n'oku ilongereza ecahezire, kuhika acibone? ⁵ N'erhi ankaba amacibona , anaciheba aha lurhugo oku bushagaluke, ⁶ na erhi agaluka eka, ahamagale abira n'abalungu, n'oku babwira: Muushagaluke haguma na nani, bula nabwine eibuzi cani calimpezire. ⁷ Kwonokwo, nmubwizire, hayishiba bushagaluke bunene omu mpingu oku munabyaha muguma ociyunjuza, kulusha makumi galimwenda na mwenda garhacifinjiri obwiyunjuze. ⁸ Erhi mukazi ndi, nkagwerhe bicere ikumi, n'erhi nka ankaheza ciguma, orhanka twana itara n'oku fyagira enyumpa, n'oku lingereza kuhika acibone? ⁹ N'amango ama cibona anahamagala abira n'abalungu, anaderhe: Mushagaluke haguma nani, bulya nabwine ecicere nali hezize. ¹⁰ Kwonokwo, mubwizire, buli bushagaluke oku ba malaika ba Nnamahanga, oku munabyaha muguma ociyunjuza. ¹¹ aciriderha kandi: Muntu muguma agwerhe bagala babiri. ¹² Omurho abwir'ishe: Larha, ompe ebyani birugu. N'ishe abagabira ebirugu byage. ¹³ Enyuma lya nsiku nsungunu, omugala murho, erhi aba amashoboza byoshi, abalama omu cihugo c'ekuli, n'eyo munda ashereza ebirugu byage omu kulama omu bugonyi. ¹⁴ Erhi amala byoshi, ashali likali lyarhibukira omw'eco cihugo, aba akolagwerhe acifinja. ¹⁵ Agenda ajikakolera cikala muguma w'omw'co cihugo, amurhuma omw'ishwa mpu ajika mulangira ebyanagulube. ¹⁶ Akacifinja okulya okubirya ebyanagulube byakagi rya, ci ntaye wamuhire kulibyo. ¹⁷ erhi agereza muliyene, acibwira: barhabazi banga ahamwirhu bagwerhe ebiryo oku bwinji, nani, eno, nafa n'ishali! ¹⁸ Nayimuka naja emwa larha, namubwira: Larha, nagomire empingu nakugomea nawe. ¹⁹ ntacikwanini okuhamagalwa mugala wawe; ontole nka muguma omu barhabazi bawe. ²⁰ Anayimuka, aja emw'ishe, erhi aciri kuli, ishe amulangira ayunva obwonjo, alibirha acikweba omw'igosi ana muhubira. ²¹ Omugala amubwira: Larha, nagomire empingu nakugomera nawe, ntacikwanini okuderhwa mugala wawe. ²² Cikwone ishe abwir'abakozi: Lerhi duba iropo linja, mumuyambike, mumuhebe olugondo oku munwe, mumuhogeke ekwera omu magulu. ²³ Mulerhe n'akanina kashushagire, mukabage, rhulye rhuna shagaluke; ²⁴ Bulya mugalawani analifire, amafuka, analihezire amaboneka. Banarhondera okushagaluka. ²⁵ ci, omugala mukulu alihinzire. Erhi afuluka n'oku yegera ahamwabo, ayunva olulanga n'amasamo. ²⁶ Ahamagala mukozi muguma, amudosa bicibyo. ²⁷ Oyo mukozi amubwira: Mulumuna wawe anagalusire, nabulya sho amubwine acizine, anabazire akanina kashushagire. ²⁸ Agaya, arhacilonzahya oku daha. Ishe ahuluka, amuyinginga okudaha. ²⁹ Ci ashuza ishe: Lolaga, hali myaka minji ndi nakukolera, buzira oku yanga amarhegeko gawe, cikwone orhasagi mpa omwanahene mpu nshagaluke haguma n'aira bani. ³⁰ Na obu mugala wawe ayishire, owalire ebirugu byawe bn'endumba, ye wanigire akanina kashushagire! ³¹ Mwana wani, ishe amubwira, oba rhwembi ensiku zoshi, na ngasi byongwerhe biri byawe, ³² Cikwone byaligwasirwe rhushsngire n'oku shagaluka, bulya oyu mulumuna wawe analifire amafuka, bulya analihezire amaboneka.