¹ Yezu adaha, lussiku lwa sabato, omu nyumpa ya murhegesi muguma w'abafarisayo, mpu alye mw'ebiryo, abafarisayo bamurhega. ² Lolaga, muntu muguma alilwazire akabunda embere zage. ³ Yezu akul'akawa, abwira abigiriza b'irhegeko n'abafarisayo: Kabiyemerirwe, erhi nanga, okufumya olusiku lw'esabato? ⁴ Bahulika. Lero Yezu alambula okuboko okulya muntu, amufumya, ana mugalula. ⁵ Anababwira: Ndi mulimwe, omugala erhi mpanzi yage yankahonera omu musima, olusiku lw'esabato arhanaji mukulamwo honaho? ⁶ Barhahashaga oku shuza bici okw'ebyo. ⁷ Buzinda abwira abalikwa oku mugani, abona bali bacishokoza oku birhi by'embere, ababwira: ⁸ Erhi okahamagalwa n'omuntu okw'idinye, orhacihebaga oku cirhi c'embere, bulya nk'omu balalikwa muli omuntu w'olukengwa kukulusha, ⁹ N'owabalikaga mwemmbi ayishe akubwire: Hana eco cirhi okw'oyu muntu. Wanayunva enshonyi z'okujidamala enyuma. ¹⁰ Cikwone, erhi okahamgalwa, onajidahala enyuma, lyo, hano owakulalikaga ayisha, akubwire: mwira wani, yinamuka ahaniana. Ebyo byanakuha olukengwa embere za boshi mwankaba mutamire oku meza mweshi. ¹¹ Bulya ngasi owacikuza ahonolwa, n'owa cirhohya ayishi yinamulwa. ¹² Abwira n'owali mulalisire: Nka wahana eby'okuyikula erhi byakushega, orhalaikag'abira bawe, erhi benewinyu, erhi babusi bawe, erhi balungu bawe, lyo nabo bayishi kulalika bakugalulire byon'ebyo. ¹³ Cikwone amango wahana akarama, onalalike abakenyi, ebirema, enjingiri n'emihurha. ¹⁴ Nantyo waba muny'iragi bulya barhankahasha oku kugalulirabyo, bulya ebyo wabigalulirwa oku bufuke bw'bashinganya. ¹⁵ Muguma w'abali oku cibo, erhi ayunva ebyo binwa, abwira Yezu: Ali munyiragi owayishija oku cibo omu bwami bwa Nnamahanga! 16 Na Yezu amushuza: Muntu muguma ahana omushego munene, alalika bantu banji. ¹⁷ OKu nsa y'okushega, arhuma omukozi wage oku bwir'abalikwa: Muyishe bulya byoshi bikola birheganye. ¹⁸ Cikwone boshi caligumiza n'okuderha: omurhanzi amubwira: Naguzire ishwa, ngwasirwe nji lirhangula ombabalire nkuhunyire. ¹⁹ N'owundi aderha: Naguzire rhugushe rhurhanu rhwa mpanzi, naji zi gera ombabalire, nkuhunyire. ²⁰ Owundi aderha: Nayansire byobyarhumire ntahasha okugenda. ²¹ Omukozi, omukugaluka, abwira nnawabo ebyo. Lero nnawabo agaya abwira omukozi wage: Genda dubaduba omu mashango n'omu mihanda y'omurhundu, olerhe hano, abakenyi, ebirema, emihurha, n'enjigiri. ²² Omukozi aderha: nnahamwirhu, ebi warhegesire byajijirwe, cikwone haciri entebe. ²³ Na nawabo abwira omwambali: Genda omunjira eburhambi bw'oligurhu, n'aba warhimana obaseze badahe, lyo enyumpa yani eyunjula. ²⁴ Bulya, nmubwizie, ntaye muguma w'omwa balya balilalisirwe walabula oku mushego gwani. ²⁵ Ebirhumbi by'abantu byayisha enyuma za Yezu. Ahindamuka ababwira: ²⁶ Erhi omuntu akanshimbulira, nka arhagayiri ashe, nina, mukage, abana bage, balumuna, balibabo, na ciru akalamo kage yene, arha kwanini okuba mwigiriza wani. ²⁷ Na ngasi yeshi orhabarhwiri omusalaba gwage, orhana nkulijire, arhankaba mwigirizibwa wani. ²⁸ Bulya, ndi mulimwe, nk'alonza oku yubaka omushonezo,orhankarhegi dahala agereeze ecishingo analole erhi agwerhe ebyamaliramwo, ²⁹ Lyo hano amaheba eciriba, arhacimalire, na ngasi babona barhangire oku mugamba, ³⁰ n'okuderha, oyu muntu arhangire obubake arhana hasha oku malira? ³¹ Erhi mwami ndi, wankaba ajilwisa owundi mwami; orhanka tamala acigere erhi anahasha, na bantu bihumbi ikumi, okurhangira amurhabalire na bantu bihumbi makumi gabiri? ³² nka arhankahasha, amango oyo wabo mwami aciri kuli naye, anamurhumira omurhumisi okuhun'omurhula. Kwonokwo, ngasiyeshi mulimwe, orhalahiri ebyage byoshi arhankaba mwigirizibwa wani. ³⁴ Omunyu kali kantu kinja; cikwone omunyu erhi gwankaheza enungo yagwo bivi bankaci gulunga mwo?