¹ Omwako kasanzi konene, bantu baguma baliho bakagi shambalira Yezu oku byo byahikiraga abantu b'e Galilaya byo Pilato ajira n'okubulaga omuko gw'oku hana e ncungura. ² Anacibashuza : Kamurhanyizagye oku abo bantu b'e Galilaya bonanankola maligo kulusha abe Galilaya, bulya balibuzibye ntyo? ³ Nanga, mmubwizire. Cikwone nka murhaka gokola, ko ninyu mweshi mwankafa ntyo. ⁴ Ka, abo bantu ikumi na munane entondo yahirimiragako y'e Silowamu yanabaniga, ka mucikebirwe oku bo barhalishinganine omu lubaga loshi lw'e Yeruzalemu? ⁵ Nanga, mmubwizire. Cikwone nka murhankagokola, ko ninyu mweshi mwankafa ntyo. ⁶ Anaciderha ogu mugani: mulume muguma anacirhwera omurhi gw'endimu omw'ishwa ly'emizabibu. Anacigenda mpu alonze kw'amalehe, arhalishimanaga. ⁷ Lero abwira omu hinzi erhi: Labaga myaka isharhu y'onamayishi lolera amalehe kw'ogu murhi, nta sangi shimana kobici. Gutwe: kagulibuze idaho busha? ⁸ Omuhinzi amushuza erhi: Nnawirhu, guleke kandi ogu mwaka; naguhingira eburhambi n'ebundi, n'okuguhebera ebyasi. ⁹ Cikwoki nkaba omu kulindirira gwahana amalehe; buzira ntyo, onagukube. ¹⁰ Yezu akagi y'igiriza omw'ishengero liguma lyayo, olya kalinda. ¹¹ Nanacibona, hanacibonekana muzire muguma aligwerhwe n'omuzimu w'obugonyogonyo myaka ikumi na munane; alicikunjire, arhankacohashire acikanula. ¹² Erhy'amubona, Yezu anaci mudosa, amubwira erhi: Muzire, ofumire omw'obyo bugonyogonyo bwawe. ¹³ Anacimuha amaboko. Honaho anayo anayimuka, avuga Nnamahanga omwonkwa. ¹⁴ Cikwoki omurhambo w'ishengero, agaya bwenene okubona Yezu amajira ebisomerine olusiku lwa kalinda, abwira olubaga erhi: Haba nsiku ndarhu z'okujira emikolo; mukayishi fumisibwa omwezo nsiku, carhali olusiku lwa kalinda. ¹⁵ Ezi ndyalya! Nnawirhu abashuza, kangasi mugumu muli-mwe, arhashwekula enkafu yage erhi ngamiya yage olusiku lwa kalinda ahazishwekera, n'oku ziheka zijinywa? ¹⁶ N'oyu muzire, oli mwali wa Abrahamu, na Lyangombe alimushwesire myaka ikumi na munane, kabirhaligi shinganine oku shwekulwa olusiku lwa kalinda? ¹⁷ Erhy'aba ali aderha ntyo, abashombanyi bage boshi, n'olubaga lwoshi lwashagaluka eyanya ly'ebirhangaza ajijire. ¹⁸ Aderha kandi ntya: Obwami bwa Nnamahanga bicigi bushushanyibwe nabwo, na bici nanka bushushanya nabo? ¹⁹ Bushushanyibwe n'enderherere nsungunu y'omurhi Hardari ey'omuntu arhalo n'okuyikablira omw'ishwa lyage; enamere, gunabe murhi, ciru n'orhunyunyi rhwemalunga rhunalama omu marhabi. ²⁰ Aderha kandi erhi: Bici nashunshanya n'obwami bwa Nnamahanga? ²¹ Bushushanyibwe n'enfun'isharha z'enshano, omuzire ajira mw'obuntu. ²² Yezu ajaga alambagira omu mirhundi nngo, ajagayigiriza, ali omunjira y'okuja e Yerusalemu. ²³ Mtu muguma anacimubwira erhi: Nnawirhu, ka bantu banyi bone bankacizibwa? Amushuza erhi: ²⁴ Mucihangane mudahe omu muhango. Bulya, mmubwizire-ko, banji bayishi lonza okudaha, barhakanahasha. ²⁵ Amango nnayumpa anayimuke n'okuyigala omuhango, naninyu munaciri embuga, mwahondere mwakomomba oku muhango, n'okuderha erhi: Nnawirhu, Nnawirhu, ourhuyigulire! lero amushuze: Ntamumanyiri n'ahamwarhenga. ²⁶ Honaho munarhonderage mwaderha erhi: Rhwakagi lya n'okunywa embere zawe, wakagi y'igiriza n'omu milimbwa yirhu. ²⁷ Anabashuze erhi: Mmubwizire: Ntamumanyiri n'ahamwarhenga; ntengi-ho, mweshi, bakozi bagalugalu. ²⁸ Ago mango hayishiba okulaka n'oku kenyeza amîno, hanamubona Abrahamu, Isaka na Yakobo, nabalya balebi boshi, omu bwami bwa Nnamahanga, naninyu mulugurhwe embunga. ²⁹ Hayîshi shoshoka e bushoshokero bw'izuba n'ebuzikiro, embere n'enyuma; boshi bahumire cibo ciguma omu bwami bwa Nnamahanga. ³⁰ Lolagi, hayishiba aba buzinda banabe barhanzi, n'aba burhanzi banabe bazinda. ³¹ Lonolo lusiku, bafarisayo baguma baguma, ba mubwira erhi: Genda, orhenge hano, bulya Herodi alonzize akuninge. ³² Abashuza erhi: Mugende, mubwire eyo nsimba ntya: Mubwine, ndi nahinva abazimu oku njijire n'ebisomerine ene n'irhondo, n'olusiku lwa kasharhu n'amalira. ³³ Cikwone bimpunyire nambagire ene, irhondo, nalis'irhondo; bulya birhashinganini omulebi afîre erhali Yerusalemu. ³⁴ Mashi Yerusalumu, Mashi Yerusalumu, mwe mukaniga abalebi, na mwemukalibuza aba bamurhumira, kanga namalonza oku gusanya abana binyu, nkakula engoko eyubarhira e byanagoko byayo omu byubi, murhana kulonzagya! ³⁵ Labagi, enyumpa zinyu mwayishi sigirwa; cikwone, mmubwizire, murhakacimbona, kuhik'amango mwaderhe erhi: Agishwe olya wayishi okw'îzino lya Nnawirhu!