¹ Akanwa ka Nnamahanga kamuyishira Yona bwa kabirhi kuderha erhi: ² Genda, oj'eninawi, omw'eco cihugo cikulu; oji yigiriza emyanzi nakubwira. ³ Ntyo Yona ayimuka, aj'eNinawi, nk'oku Nnamuzinda anadesire. N'omwoko Ninawi cali cihugo cinene bwenene, obunene bwaco bwali bwa kugenda nsiku isharhu. ⁴ Yona arhonderha adaha omu cihugo aho lusiku lurhanzi, asosa izu lyage, aderha erhi: Enyuma lya nsiku makumi gani Ninawi asherezibwa. ⁵ Lero abantu b'eNinawi bayemera Nnamahanga, balaganana oku funga, bayambala emishangi y'okulaka, kurhangira oku mukulu kuhika oku murho. ⁶ Omwanzi gwa hikira omwami w'eNinawi, naye ahonoka oku ciri cage c'obwami, ahogola omushangi gwage, ayambala omushangi gw'okulaka anatamala omu luvu. ⁷ Naye ajira duba, ayalagaza omwanzi omu cihugo c'eNinawi, okw'irhegeko lya mwami n'abakulu bage; okuderha oku, omuntu yeshi yeshi arhalabule kantu koshi koshi, erhi bishwekwa erhi nkafu, erhi bibuzi, birhanywe erhi kunywa mishi. ⁸ Ci bishwekwe emishangi y'okulaka, mwene muntu n'ecishwekwa, nabo bayamire Nyamuzinda bwenene, banahindamuke ngasi muntu aleke enjira zage mbi, na nkasi birhashinganini bili omu maboko gage. ⁹ Indi omanyire oku Nyamuzinda arha hindamuke n'oku hindamula, n'okuleka oburhe bwage bubi, murhaki hererera? ¹⁰ Nyamuzinda abona ebijiro byabo, oku balesire enjira zabo ngalu ngalu. Nyamuzinda ahindamula kalya kanwa kage kazibu, oku alidesire abajira; arhacikujire.