¹ Cikwoki ebino bintu bya gayisize Yona bwenene, naye aba burhe. ² Ahuna Nnamahanga, aderha erhi: Nkuhunire, Nnamahanga; arhali ntyo kwo nadesire, ago mango nali omu cihugo cani? Byo byarhumire naba mubidu oku libirhira e Tarasisi; bulya nali manyire oku wehe oli Nyamuzinda wa lukogo, na mwinji wa bonjo, orhana sima amabi. ³ Ntyo, Nnamahanga, nkuhunyire, onkulire obuzine bwani; bulya kuli kwa bulagirire nka naka fa kulusha okulama. ⁴ Na Nnamahanga aderha erhi: Kw'ojijire bwinja okugaya? ⁵ Yona arhenga omu cihugo, adahala olunda lw'emashariki g'ecihugo, ajiyubaka ecibanda eyo munda, atamala omu cihoho c'eco cibanda cage, kuhika abone oku eco cihugo caba. ⁶ Na Nnamahanga arheganya emburho yamera, ayijira ebe enyanya lya Yona, mpu lyo emujirira ecihoho okw'irhwe lyage, n'okumuciza omu bubi bwage. Lero Yona asima bwenene enyanya ly'eyo mburho. ⁷ Cikwone erhi buca olusiku lw'akabirhi, Nnamahanga alerha akajoka kalya erya mburho yayuma. ⁸ Izuba erhi libasha, Nnamahanga alerha empusi y'emashariki, lwa muhusi mwinji, izuba lya shurha Yona okw'irhwe, kuhika ahola, lero acifinja okufa, aderha erhi: kushinganine infe ahali h'oku lama. ⁹ Nnamahanga abwira Yona, " K'ojijire bwinja okugaya enyanya ly'eyo mburho?" naye aderha erhi" Njijire bwinja okugaya ciru n'okufa". ¹⁰ Nnamahanga amubwira erhi: Wehe obabalire emburho, orhanaco ikoleraga, erhi kuyikuza; yameraga omu budufu buguma, n'oku sherera omu budufu buguma. ¹¹ Nnani gurhigi! ka birhali shinganine oku babalira Ninawi, eco cihugo cinene; omu karhi kaco muli bantu barhalusire igana na bihumbi bibiri, barhankaco hasha oku manya okulyo n'okumosho, na bishwekwa binji bwenene bili mwo?