¹ Erhi Yesu ali omu lubalamo, abona muntu muguma wali muhurha kurhenga oku burhwa. ² Abigirizibwa bage ba muha eri idoso: mwigiriza, ndigi wahushire k'oyu muntu erhi babusi bage, byarhuma aburhwa muhurha? ³ Yesu ashuza: Ye na ababusi bage ntaye wahushire; ci byabire Ntyo lyo e mikolo ya Nyamuzinda e bonekana muli ye. ⁴ Bishingane oku kola, e mikolo y'owantumaga n'obu guciri mulegererege; obudufu buyishire, akasanzi nta muntu wanka cikola. ⁵ Amango nciri omw'igulu, ndi kamole k'igulu. ⁶ Enyuma ly'okuderha ebyo atwira okw'idaho, arhoba ebijonda n'amarhi gage, enyuma zaho ashiga oku masu g'ogo muhurha. ⁷ Amubwira erhi: Genda, ocishuke omu cisima c'e Silowamu (kw'okuderha orhumirwe). Anacijayo, ajicikalaba, n'okugaluka e yo akola aja bona bwinja. ⁸ Abalungu bage n'abali mumanyire okw'anakaja ahunusa baderha mpu: Karhali olya wakagi bera aha tamire n'okuhunusa oyu? ⁹ Baguma baka derha erhi: Ye, n'abandi bakaderha mpu nanga cikwone amushushire, naye yene aderha oku nie na nene. ¹⁰ Lero baka mudosa mpu: Gurhi amasu gawe gayigusire mwo? ¹¹ Ashuza erhi: Omuntu oderhwa Yesu arhobire e bijonda, anashiga oku masu gani, n'okumbwira mpu: Genda e bwa cisima Silowamu, onacikalabe. Na naija, nakalaba na nacibona. ¹² Bamudosa erhi: Oyo muntu ngahi ali? Naye ashuza erhi: Ntamanyiri. ¹³ Bamuheka e munda Abafarisayo bali olya wali muhurha. ¹⁴ n'obwo, lwali lusika lwa akalinda Yesu arhobaga e bijonda, n'oku muyigula amasu. ¹⁵ Abafarisayo nabo, bashubi mudosa kandi, gurhi wahabirwe oku bona. Naye ababwira erhi: Ananshizire e bijonda oku masu, nacishuka, na nabona. ¹⁶ Okwo kwarhuma baguma baguma omu Bafarisayo baderha mpu: Oyo muntu arhali wakurhanga e Nyamuzinda, bulya arhakenziri olusiku lwa Kalinda. N'abandi baderha mpu: Gurhi omunya byaha ankajira e cisomerine cirhyo? Harhenga oku ciberula bone na bone. ¹⁷ Baciri bwira oyo wali muhurha erhi: We, bicigi nawe odesire e nyanya lyage oyo wakuyigula amasu? Abashuza erhi: Mulebi. ¹⁸ Abayahudi barhayemeraga oku ali rhanziriba muhurha n'okw'afumire, kuhika bamurhuma babusi bage. ¹⁹ Babadosa, erhi: K'anali mugala winyu oyu, mukaderha oku aburhagwa muhurha? Gurhi lero akolaga ali abona? ²⁰ Ababusi bage bashuza erhi: Rhumanyire oku ali mwana wirhu, anabusirwe muhurha; ²¹ Ci gurhigi akola aly'abona mwo, erhi ndi wamuyigwire amasu, Byo rhurhamanyiri. Mmumudose, akola mukulu. Anaderhaga yene ebi mulabire. ²² Ababusire bage badesire ntyo bulya bali yobohire Abayahudi, bulya Abayahudi bali bama laganana, oku ngasi yeshi wana yemere oku Yesu ali Kristu, anahanwe omu ndeko. ²³ Co carhumire ababusi bage baderha oku akola mukulu, mmumudose yene. ²⁴ Abafarisayo bashubi mu hamagala bwa kabiri oyo muntu wali rhanziriba muhurha n'oku mubwira, erhi: Ohe Nyamuzinda irenge, oyo muntu ali munyabyaha. ²⁵ Naye ashuza erhi: Akaba ali munya byaha, ntaci manyiri byo. Mmanyire kuguma kwone nali muhurha na nkola ndi nabona. ²⁶ Bamudosa, gurhi akufumize mwo? Erhi akuyigula amasu? ²⁷ Abashuza erhi: Na mubwizire mira murhanayunvirhe; bulya gurhi murhalonzize oku ciribiyunva? Kaninyu mulonzize okuba bigirizibwa bage? ²⁸ Bamujacira n'oku mubwira mpu: We oli mwigirizibwa wage; rhwe rhuli bashimbulizi ba Musa. ²⁹ Rhumanyire oku Nnamahanga abwizire Musa; cikwone oyo rhurhamumanyiri ngahi arhenga. ²⁸ Bamujacira n'oku mubwira mpu: We oli mwigirizibwa wage; rhwe rhuli bashimbulizi ba Musa. ²⁹ Rhumanyire oku Nnamahanga abwizire Musa; cikwone oyo rhurhamumanyiri ngahi arhenga. ³⁰ Oyo muntu Abashuza mpu: Ciri cisomerine okubona murhamumanyiri he wananfumize amasunu. ³¹ Rhumanyire oku Nnamahanga arhanyunva banabyaha, cikwone erhi omuntu akamukenga n'okujira amalonze gage. ³² Ntago mago byayunvikine oku haali owankafumya owalibusirwe muhurha. ³³ Nk'oyo muntu arharhangaga e mwa Nyamuzinda, ntaco anakahashire okujira. ³⁴ Bamushuza n'oku mubwira erhi: Waburhagwa omu byaha, lero we okola oli warhuyigiriza, bamu libirhako. ³⁵ Yesu amanya oku bamulibisire kwo; amushima, amudosa erhi: K'oyemire omwana wa Nnamahanga? ³⁶ Ashuza erhi: Ye ndi, Nnawirhu, lyo mmuyemera? ³⁷ Wamubwine, kwo Yesu amubwizire, mpu: Ye n'oyu oli wakushambaza. ³⁸ Oyo muntu ashuza ntya: Nnawirhu, nyemire, anafukama embere zage. ³⁹ Yesu aderha: Nayishire omw'el'igulu erhi lubanja lurhumire lyo abarhacikabona babona n'abakagi bona ebe mihurha. ⁴⁰ Abafarisayo bali haguma naye, omu kuyunva e binwa byage, bamu bwira erhi: Ka, nirhu rhuli mihurha? ⁴¹ Yesu abashuza: Nka mwali mihurha murhali mwaba n'e byaha, cikwone muli mwa derha mpu rhuli rhwabona Co cirhumire e byaha binyu bigenderire.