¹ Yezu anacishonera oku ntondo y'emizetuni. ² Cikwone, erhi buca, aciri shubira omu kanyamuzinda, n'olubaga lwoshi lwa mushimbulira. Adahala, ajakw'ayigiriza. ³ Honaho abandisi n'Abafarisayo bamulerhera omukazi wagwarhagwa oku bugonyi; n'oku, muheba ekagarhi k'olubaga, ⁴ babwira Yezu erhi: Mwigiriza, oyu mukazi agwasirwe sirigisi alikw'agona. ⁵ Mûsa, omu marhegeko, arhulikulire okubanda amabuye abakazi mwene aba: nawe, gurhigi odesire? ⁶ Badesire ntyo ebwa kumurhenga, lyo babona igwarhiro. Cikwone Yezu, aciyunamira, akayandika n'omunwe okw'idaho. ⁷ Kushimba okubagenderire bamudosa, ayinamuka n'okubabwira erhi: Olya yehe muli-mwe orhagwerhi caha amubande ibuye waburhangiriza. ⁸ Anaciri yunama, akana yandika okw'idaho. ⁹ Erhi banayunva ntyo, enkengero zabo zabakolesa, barhondera bashodoka muguma oku muguma, kurhoderera oku bakulu kuhika oku barho; na Yezu asigala yene n'olya mukazi wali ekagarhi. ¹⁰ Lero erhya inamuka, arhacibonaga wundi eburhambi kulusha olya mukazi, Yezu amudosa erhi: we mukazi, gahi bali balya balikusongera? Kantaye wacikutwirire olubanja? ¹¹ Ashuza erhi: Nanga, Nnahamwirhu. Na Yezu amubwira erhi: Nani ntaci kuhâne: genda, orhanacijiraga caha bundi. ¹² Yezu aciribabwira buhyahya, aderha erhi: Nie kamole k'igulu; owashimbulira arhakagenda omu mwizimya, ci aba n'akalamo k'obuzine. ¹³ Enyanya ly'oko, Abafarisayo bamubwira erhi: Onakaja wacihamiriza wenene, obuhamirize bwawe burhaba bw'okuli. ¹⁴ Yezu abashuza erhi: Ciru akaba nie ncihamiriza, obuhamizi bwani buba bw'okuli, bulya nyishi emunda narhengaga n'emunda naja; cikwone mwehe, murhamanyiri emunda narhenga n'emunda naja. ¹⁵ Munatwe olubanja okushimbana n'omubiri; niehe, ntatwira-ndi lubanja. ¹⁶ Na nkatw'olubanja, okundutwa kuba kw'okuli, bulya ntali niene; cikwone Larha wantumaga ali haguma na nani. ¹⁷ Biyandisirwe omu marhegeko ginyu oku obuhamirize bw'abantu babirhi buli bw'okuli; ¹⁸ Nanci hamirize niene, na Larha wantumaga anampamirize. ¹⁹ Lero banacimubwira erhi: Ngahi Sho aba? Yezu Ashuza erhi: Murhanyishi, murhishi na Larha. Nka mwali manyire, mwanka nayishiri manya Larha naye. ²⁰ Yezu aderha ebyo binwa, erhi ali ayigiriza omu kanyamuzinda, ahantu halibikirwe omuhako, na ntaye wamuhumireko, bulya akasanzi kage karhali cihika. ²¹ Yezu aciri babwira erhi: Nacigendera, mwayishinonza, ninyu mwayishi-fa omu byaha binyu; murhakanahika ahanaja. ²² Kulyu oko Abayahudi baderha erhi: Kayishi ciyirha yene, bulya adesirhe erhi: Aha naja murhanka hahika? ²³ Naye ababwira erhi: Muli b'idako; nani, ndi wenyanya. Muli bw'omwer'igulu; niehe ntali womwer'igulu. ²⁴ Do carhumire namubwira mufana ebyaha binyu; bulya akaba murhayemiri oku ndina, mwayishifa omu byaha binyu. ²⁵ Wendi? kobamudosize. Yezu abashusuza erhi: Oku nababwiraga oku murhondero. ²⁶ Ngwerhe binji naderha kuli mwe n'eby'okumutwirak'olubanja; cikwone owantumaga aba w'okuli, n'ebinayunvirhe emunda ali, byo nkabwira igulu. ²⁷ Barhunagya ciru okw'Ishe ye akagi babwira. ²⁸ Lero Yezu ababwira: Hano mwamakuza mwene omuntu, lyo mwananamanyage niendi, n'oku ntaco njira niene, cikone nankaderha ebi Larha ayigirizize. ²⁹ Owantumaga aba haguma na nani; arhandeka niene, bulya ngasi mango nankajira ebi musimisa. ³⁰ Erhi Yezu acirigwerhe aderha ntyo, banji bamuyemera. ³¹ Naye abwira Abayahudi bali muyemire erhi: Mukana sera omu kanwa kani, mwaba baganda bani b'okunali; ³² mwanamanya okuli, n'okuli kwamurhenza omu bunja. ³³ Bamushuza erhi: Rhub'iburha ly'Abrahamu, rhunasagiba baja ba muntu yeshi yeshi; gurhigi wankarhubwiraga mpu: Rhwayishiba bashwekûle? ³⁴ Okunali, okunali, namubwizire, Yezu ababwira, ngasi yeshi ocirikirira omu byaha ali muja wa byaha. ³⁵ , N'obw', omuja arhabera omu nyumpa ensiku zoshi; omwana yeki amuba ensiku zoshi. ³⁶ Ci erhi Omwana ankamucungula, munarhanga omu buja lwoshi lwoshi. ³⁷ Manyire oku mul'iburha ly'Abrahamu; cikwone muli mwalonza munnige, bulya emyanzi yani erha muba mwo. ³⁸ Nankaderha ebinabwine emwa Larha, ninyu munakajira ebimwayunvirhe emw'owinyu sho. ³⁹ Bamushuza erhi: Larha wirhu, ye Abrahamu. Yezu ababwira erhi: Nkamwali bene Abrahamu mwali mwakakola emikolo ya Abrahamu. ⁴⁰ Cikwone lero mwehe mwalonza okunniga, nie namubwiraga okuli nayunvirhe kurhenga emwa Nnamahanga. Okwo, Abrahamu arhakujiraga. ⁴¹ Munakajira ebijiro bya sho. Bamubwira mpu: Rhurhali bana b'omu bugonyi; rhugwerhe Larha muguma, ye Nyamuzinda. ⁴² Yezu ababwira erhi: Nka Nyamuzinda ye wali sho winyu, hinga muba munzigire, bulya emwa Nyamuzinda narhengaga; niono nayishire ntacilerhaga niene, cikwone yene wantumaga. ⁴³ Bulya gurhi murhayunva oluderho lwani? Bulya murhahashi yunva ebindesire. ⁴⁴ Mugwerhe sho winyu ye lyangombe, munakanalonza okuhikiriza enyifinjo za sho winyu. Ali mwisi wabantu kurhenga aha murhondero, arhanaja omu okuli, bulya okuli kurha muba-mwo. Nkakola aderha obushumi, anakaderha oku burhwali bwage yene; bulya ali mushumi n'ishe w'obunywesi. ⁴⁵ Na nani, bulya nankaderha okuli, murhanyemiri. ⁴⁶ Ndi muli mwe wankanyaza oku caha? Akaba naderhe okuli, bulya gurhi murha nyemera? ⁴⁷ Oli wa Nyamuzinda, anakanyunva emyanzi ya Nyamuzinda; murhanyunva, bulya murhali ba Nyamuzinda. ⁴⁸ Abayahudi Bamushuza mpu: Karhurhayazagya okuba rhwakubwizire okuba musamariya, n'oku muzimu okuba-mwo? ⁴⁹ Yezu ashuza erhi: Ntali kwo muzimu; cikwone nkenga Larha, ninyu muli mwanganyagusa. ⁵⁰ Ntalonza irenge lyani; ci haba muguma olinongeza n'okutwa olubanja. ⁵¹ Okunali, okunali, mmubwizire, owakanalanga ecinwa cani arhakabona olufu. ⁵² Abayahudi bamubwira, rhwamamanyaga okunaba-mw'omuzimu. Abrahamu afîre, n'abalebi kwonakwo, nawe wamagali derha mpu: Owalanga ecinwa case arhakabona olufu. ⁵³ Kawe oligi mukulu kulusha larha Abrahamu, wafîre? Abalebi nabo bafîre. Okola acijiraga ndi wehe? ⁵⁴ Yezu ashuza erhi: Nka nankacikuza niene, irenge lyani lyanaba busha. Larha ye kankuza, oyo ye muderha mpu ye Nyamuzinda winyu, ⁵⁵ n'obo murhaba mumumanyire. Niehe, muyishi; na, nka nanka derha nti ntamuyishi, na naba nkola nshushanyibwe na ninyu, nka munywesi. Cikwone muyishi, nkenga na kanwa kage. ⁵⁶ Abrahamu, sho winyu, acishingiraga bwenene okuba anabone olusiku lwani: analubwine, n'okulushagalukira. ⁵⁷ Abayahudi bamubwira mpu: w'oyo arhacihisa myaka makumi garhanu, mpu wanabwinage Abrahamu! ⁵⁸ Yezu abashuza erhi: Okunali, okunali, mmubwizire, embere Abrahamu ahabe, erhi homba niehe. ⁵⁹ Ahanyanya zebyo, barhola amabuye mpu bamubande go; cikwone Yezu acifulika, anarhenga omu kanyamuzinda.