¹ Enyuma lyoko, Yezu aja gera gera omu Galilaya, bulya arhakagi sima okubera omu Yudea, bulya abayahudi baki kulonza mpu bamuyirhe. ² N'obo, olusiku lukulu lwabayahudi, lusiku lukulu lwebigala,lwoli yegerire. ³ Na bene wabo bamu bwira erhi: rhenga eno, ogende eyudea, lyo abaganda bawe babona nabo emikolo ogwerhe wakola. ⁴ Ntaye ojira eby'obulikwa, bakalonza okuci fulula: nkaba oli wajira ebyo, ociyerekane wene omw'igulu. ⁵ Bulya ciru nabene wabo barhali muyemire. ⁶ Yezu ababwira erhi: akasanzi kani karhacihika, ci akinyu kasanzi kahaba ngasi mango. ⁷ Igulu lirhanka mushomba, niehe, linshombire, bulya ndi nahamiriza oku emikolo yalyo eri mibi. ⁸ Murhereme,mwehe,kuli olo lusiku lukulu; niehe, ntaja eyo, bulya akasanzi kani karhacihika. ⁹ Enyuma z'okubabwira ebyo, aci berera e Galilaya. ¹⁰ Erhi bene wabo baba bama rheremera oku lusiku lukulu, naye arheremera yo, arha jaga omukalugi, ci kuli nkwa kwa bufulikwa. ¹¹ Abayahudi bajaga ba kulonza kuli I'll lusiku lukulu, baka derha erhi: ngahi Ali? ¹² Omu lubaga mwalî amahwe mnji enyanya zage. Baguma bakaderha erhi: Ali muntu mwinja. Abandi baka derha erhi: nanga, Ali arheba banji. ¹³ Ntaye, amango goshi, wakagi muderha n'obwalagale, enyanya ly'oku yoboha Abayahudi. ¹⁴ Erhi ekola ekagarhi k'olusiku lukulu, Yezu asokera omu ka-nnamahanga. Nokurhondera ayigiriza. ¹⁵ Abayahudi basomerwa, baderha erhi: kurhi amanyiremwo amandiko, oyu orha somaga? ¹⁶ Yezu abashuza erhi: enyigirizo zani zirhaba zani, ci ziba zowa ntumaga. ¹⁷ Nkaba hali owalonza okujira obulonza bwage, ayishi manga erhi ezi nyigirizo ziba za Nnâmahanga, erhi nanziderhe kwakuci hirinjika. ¹⁸ Oderha n'oburhwali bwage irenge lyage acilongeza; cikwone olonza irenge ly'owa murhumaga, oyola Ali mwinja, n'obubi burha mulimwo. ¹⁹ Ka Musa arha muhaga amarhegeko? na ntaye mulimwe okenzire irhegeko. bulya gurhi mulimwalonza oku nyirha? ²⁰ Olubaga lwa shuza erhi: olimw'omuzimu. nndi oliwalonza oku kuyirha? ²¹ Yezu abashuza erhi: naji jire mukolo muguma, na mweshi gwana musomera. ²² Musa amuhire oku kembulwa, arhalikuderha oku Musa ye wakulerhaga, bulya kwa rhengaga kuli bashakuluza, ninyu muna nakembule omuntu olwa sabato. ²³ Erhi akaba omuntu ana kembulwa olwa sabato, lyo irhegeko lya Musa lirhagi vunika, cirhumirage mwangaya bulyalira nafumize'omuntu yeshi olwa sabato? ²⁴ Murhakigi twa okuganja omu kubona kwone, cikwone mulutwe omu bushinganyanya. ²⁵ Baguma muli bacikala be Yerusalemu bakaderha erhi: karhali olya bali balonza oyu mpu bamuyirhe? ²⁶ Lolagi, ali aderha n'obwalagale, na ntako ba mubwizirage! kako binali abakulu bâmanyire oku ye Kristu? ²⁷ Cikwone oyu, rhumanyire ahalî; cikwone Kristu, amango anayishe, ntaye wanamanye ahali. ²⁸ Na Yezu, akayigiriza omu ka- Nnamahanga, aka hamagaza erhi: mumanyire, mumanyire ndi wangahi! ntaci lerhaga niene: cikwone owantumaga ali w'okuli, murhamanyiri. ²⁹ Niehe, mmuyishi; bulya emwage narhengaga, naye ye wantumaga. ³⁰ Bakalonza oku mugwarha, cikwone ntaye wamuhumireko, bulya akasanzi kage karhali cihika. ³¹ Banji muli eyo ngabo ya Bantu bamuyemera, nokukaderha erhi: Kristo, amango ayisha, kayishijira ebisomerine oyu arhajiraga? ³² Abafarisayo bayunva olubaga lulilwaciduduma eyo myanzi enyanya zage. Lero abadahwa b'ihano n'Abafarisayo barhuma abaganda mpu bajimugwarha. ³³ Yezu aderha erhi: Nciri haguma naninyu kasanzi kasungunu, n'enyuma lyaho nacigalukira emw'owantumaga. ³⁴ Mwayishi nonza murhanambone, murhakanahika aha nayishiba ndi. ³⁵ Kulyuko abayahudi bakabwirana bone nanene mpu: Ngahi aja, aho rhurhakacimubona? K'aja omu bashandabine emw'Abagiriki, kanajiyigiriza Abagiriki? ³⁶ Kokuderha gurhi ako kanwa adesire erhi: Mwayishi nonza munambule murhakanahika aha Nayishi ja? ³⁷ Olusiku luzinda, ly'olukulu lw'Abayahudi, Yezu, ayimanga, anaciyakuza erhi: Ngasi yeshi ogwerhwe n'enyorha, ayishe emunda ndi, naye anywa. ³⁸ Owanyemera, enyishi z'amishi g'obuzine zahulula omu ndalala zage, nk'oku Amandiko gadesire. ³⁹ Adesire ebyola bya Mûka Mtagatifu bali bayishi habwa abali bayishi muyemera; bulya Mûka Mtagatifu arhali cihaba, bulya Yezu arhali cikuzibwa. ⁴⁰ Abantu b'omw'olwo lubaga, bayunvagya ebyo binwa, bakaderha erhi: Okunali oyu ali mulebi. ⁴¹ Abandi bakaderha mpu: Ye Kristo. N'abandi bakaderha erhi: Kakobinali oku Egalileya yanarhenga Kristo? ⁴² K'Amandiko garhanakudesiri oku omu bûko bwa Daudi, n'omu lugo lw'Ebetlehemu, yo Daudi abaga, eyola yo Kristo anarhenge? ⁴³ Hanaciba, ahanyanya lyage, okugabikana kw'olubaga. ⁴⁴ Haguma muli-bo balonza oku mugwarha, ci ntaye wamuhisize kw'okuboko. ⁴⁵ Ntyo abaganda bashubira emwa bajinji b'Abadahwa n'Abafarisayo. Nabo babadosa erhi: Bulya gurhi murha mudwirhi? ⁴⁶ Abaganda bashuza erhi: Ntawindi okola oshambîre ak'oyo muntu. ⁴⁷ Abafarisayo bashubi bashuza erhi: Kananinyu, mwarhebirwe? ⁴⁸ Kahaligi omuguma w'omu barhambo erhi omu bafarisayo wamuyemire? ⁴⁹ Ci luno lubaga lurhishi marhegeko, baheherirwe! ⁵⁰ Nikodemu, olya wagenderaga Yezu budufu, ali muguma muli-bo, ababwira erhi: ⁵¹ Kirhegeko lirhu linatwire omuntu olubanja barhanaci muyunvirhiza n'oku manya ecajijire? ⁵² Bamushuza erhi: Koli mu Galileya nawe? Ololereze, nawe wayishi bona oku Egalileya erha rhenga mulebi. ⁵³ Na Ngasi muguma ashubira omu mwage.