¹ Enyuma lyaho, Yezu ayicirira ishiriza ly'enyanja omu Galilaya, omu Tiberiade. ² Olubaga lunene lwa mushimbulira, bulya lwajaga lwabona ebisomeza ajaga ajirira abalwala. ³ Yezu asokera oku ntondo, anatamala n'entumwa zage. ⁴ N'obo, Basaka alikola ayegire, lusiku lukulu lw'Abayahudi. ⁵ Ayinamula, anabona oku lubaga lwinji lumukulikire, Yezu abwira Filipo mpu: Ngahigi rhwagulira emigati, lyo bano bantu babona ecibalya? ⁶ Adesire ntyo mpu ly'abayereka, bulya alimanyire ebyajira. ⁷ Filipo amushuza erhi: Emigati y'endinari magana gabirhi erha nkabalumira lyo ngasi muguma ajaheka hinyinyi. ⁸ Muguma w'omu ntumwa zage, Andrea, mwene wabo Simoni Petro, amubwira erhi: ⁹ Hanola hali musole muguma agwerhe migati irhanu ya ngano na nsamaki zibirhi; ci ebyo biligi bici kuli gunola mwandu gw'abantu? ¹⁰ Yezu aderha erhi: mubadahaze. Ahantu haligi lubala lwinji. Banadamalaga, oku muganjo bali hofi bihumbi birhanu bya balume. ¹¹ Yezu arhola emigati, ashenga, n'oku igabira balya balitamire; kwo n'okwo abaha n'ensamaki, nk'okubalicifinjire. ¹² Erhi ba-ba bamayigurha, abwira entumwa zage, erhi mushondozagye ebihimbi bisigire, lyo harhagiba ebyahera. ¹³ Banacibishondoza, n'okubumba ntanda ikumi na zibirhi z'ebyo bihimbi byasigalaga oku migati irhanu y'engano, enyuma ly'okuyigurha kw'olo lubaga. ¹⁴ Erhi abo bantu, babona ebisomerine Yezu akujijire, baderha erhi: Oyu okunali ali mulêbi wayisha omw'igulu. ¹⁵ Na Yesu, amanya oku balibayisha bamukuze lyo bamujire mwami, anacibarhenga mw'okw'eyo ntondo, Yenene. ¹⁶ Erhi bici jinga, entumwa zage zanahonokera oku cikombo c'enyanja. ¹⁷ Erhi bakola bali omu burho, bayiciraga enyanja kuyerekera Ekapernaumu. Bwalikola budufu, na Yezu arhali ci bashimana. ¹⁸ Empusi nnene yakagi hukiriza bwenene, n'enyanja yalimw'akadugundu. ¹⁹ Enyuma ly'okulwikiriza lugero lwa makano makumi gabirhi na garhanu erhi makumi gasharhu, banacibona Yezu ayisha alambagira oku nyanya z'amishi anaja ayegera obwarho. Honaho baba n'ecoba. ²⁰ Cikwone Yezu ababwira erhi: Niene; murhayobohe! ²¹ Balonza mpu bamuhire omu bwarho, na honaho obwarho bwahika ahantu bajaga. ²² Olubaga lwalisigire ebundi burhambi bw'enyanja lwakengukwa oku bwarho buguma bwone bukola buliho, na Yezu arha shoneraga bwarho buguma n'entumwa zage,cikwone bali genzire bone. ²³ Erhi buca, nk'oku agandi mashuwa gayishaga e Tiberiade hofi na halya baliraga emigati erhi Yezu amayishengera, ²⁴ abantu bamuli lulya lubaga, babona okuli Yezu oli entumwa zage barhali aho, bashonera bone muli ago mashuwa n'okuja e Kapernaumu ukuji lonza Yezu. ²⁵ N'erhi bamubona ishiriza ly'enyanja, bamudosa erhi: Mwigiriza, manga-ci wajag'eno? ²⁶ Yezu abashuza erhi: Okunali, okunali, mmubwizire, mwajanonza, arhali bulya mwabwin'ebisomeza, ci bulya mwalire emigati mwanayigurha. ²⁷ Mukakola omukolo, ci arhali kukolera ebiryo byagaga, ci ebyokulama akalamo k'ensiku n'amango, na ebi omwana w'omuntu anamuhe; bulya ye Ishe, Nnâmahanga ahebire kw'ecimanyiso cage. ²⁸ Banacimubwira: Kurhi rhukwaninagwe rhujire, lyo rhukola emikolo ye Nnâmahanga? ²⁹ Yezu abashuza erhi: Omukolo gwa Nnâmahanga, gw'ogu mpu muyemere oyu arhumaga. ³⁰ Ci rhangaza cicigi ojira, bamudosa, lyo rhucibona, nalyo rhukuyemera? Bici ojijire? ³¹ Balarha balirhe Amana omw'irungu, kushimbana n'ebiri biyandike: Abahire omu ganti gw'empingu bagulya. ³² Yezu ababwira mpu: Okunali, okunali, mmubwizire, Musa arhamuhaga omugati gw'empingu, cikwone Larha amuhire omugati mwinja gw'empingu; ³³ bulya omugati gwa Nnâmahanga, Ali olya wayandagala empingu n'oku hana obuzine omw'igulu. ³⁴ Banacimubwira erhi: Nnâhamwirhu, orhuhe ngasi mango ogo mugati. ³⁵ Yezu abashuza erhi: Ndi mugati gw'obuzine. Owaja emunda ndi arhakashalika, n'owana nyemere arhaka Yunva nyorha. ³⁶ Cikwone, namubwizire kwo, mwambine, murhanayemeraga. ³⁷ Ngasi byoshi Larha ampa byanayishe emunda ndi, ntakanamuhira embuga ngasi wayishe emwani; ³⁸ bulya nayandagire empingu okuyishijira, arhali bulonza bwani, ci bulonza bw'owantumaga. ³⁹ N'obo, obulonza bw'owantumaga, oku ntarheraga ciru bici okubyo ampire, ci nyishi bifula oku lusiku luzinda. ⁴⁰ Obulonza bwa Larha, kuli oku ngasi ye obwine omungala n'oku muyemera ayishiba n'obula bw'ensiku n'amango; nayishi mufula Okulusiku luzinda. ⁴¹ Abayahudi banaciduduma ahanyanya zage, bulya adesire oku: Ndi mugati gwahonaga empingu. ⁴² N'oku kaderha erhi: Karhali mugala wa Yusufu, oyu rhumanyire Ishe na Nnina? Gurhigi adesire erhi: Nahonaga empinguni? ⁴³ Yezu abashuza erhi: Murhacidudume mwene na nene. ⁴⁴ Ntaye wankayishi emwani, nka rhali Larha wantumaga y'omukulwire; na nayishi mufula olusiku luzinda. ⁴⁵ Biyandisirwe omu balebi erhi: Boshi banayigirizibwe na Nnâmahanga. Ntyo ngasi yeshi wayunvirhe Larha anayankirira enyigirizo zage ayishe emwani. ⁴⁶ Ntyo ntaye wabwine Larha, nkarhali owarhenga emwa Nnâmahanga; oyola abwîne Larha. ⁴⁷ Okunali, okunali, mmubwizire, owanyemera aban'obuzine bw'ensiku n'amango. ⁴⁸ Ndi mugati gw'obuzine. ⁴⁹ Bâsho balire amana omw'irungu, banafire. ⁵⁰ Gun'omugati go gwahonaga empingu, lyo ngasi yeshi wagulye kwo arhakafà. ⁵¹ Ndi mugati guzine gwa honaga empingu. Nka hankaba owalye kuli og'omugati, analamaka emyaka n'emyaka; n'ogo mugati nayishi hana, guli mubiri gwani, gonayishi hana bube buzine bw'igulu. ⁵² Ahanyanya ly'oko, Abayahudi barhondera baciburubwinja bone na bone, n'okuderha erhi: Gurhi ankarhuhaga mw'omubiri gwage mpu rhugulye? ⁵³ Yezu ababwira erhi: Okunali, okunali, mmubwizire, nka murhanaliri omubiri gw'omwana w'omuntu, na nka murhanywiri omuko gwage, nta buzine mugwerhe. ⁵⁴ Owalya omubiri gwani n'okunyw'omuko gwani agwarha obuzine bw'ensiku n'amango; na nayishi mufula olusiku luzinda. ⁵⁵ Bulya omubiri gwani kali kalyo k'okuli, n'omuko gwani ciri cinywebwa c'okuli. ⁵⁶ Olya omubiri gwani anywe n'omuko gwani alamamuli nie, nani nalama muli ye. ⁵⁷ Nk'oku Larha ozine antumaga, nani ndamire muli Larha, ntyo ngasi yeshi wandya analame kugerera nie. ⁵⁸ Gun'omugati go gwahonaga empingu. Kurhali kwo kuguma na kulya Bâsho baliga Amana bagali fâ: owalya ogu mugati ayishi lama emyaka n'emyaka. ⁵⁹ Yezu aderha eyi myanzi omu Synagogi erhyali ayigiriza e Kapernaumu. ⁶⁰ Banji muli entumwa zage, enyuma ly'okumuyunvirhiza, baderha erhi: Eci cinwa ciri cizibu; ndi wanka ciyunva? ⁶¹ Yezu, amanya omu ndalala zage oku entumwa zage ziri zaciduduma enyanya ly'oko, ababwira erhi: K'okwo kwanamuyabiza? ⁶² N'erhi mwankabona mwene omuntu arheremare emunda abaga burhanzi?... ⁶³ Omuka gw'oguba mw'obuzine; omubiri guba gwa busha. Ebinwa namubwizire guli muka na buzine. ⁶⁴ Cikwone omu karhi kinyu muligi abarhayemiri. Bulya Yezu alimanyire kurhenga omurhondro bandi barhayemeraga, na ndi wanamuguze. ⁶⁵ Ayushula erhi: Co carhumire na mmubwira nti ntaye wankaja emunda ndi, nka arhakuhabagwa na Larha. ⁶⁶ Kurhenga ago mango, banji muli abaganda bage baciyegula, barhanacimushimbaga. ⁶⁷ Lero Yezu abwira balya ikumi na babirhi erhi: Kamwehe, murhalonza mugende? ⁶⁸ Simoni Petro amushusa erhi: Nnâhamwirhu, emwandi rhwacije? We ogwerhe ebinwa by'obuzine bw'ensiku n'amango. ⁶⁹ Na nirhu rhwayemire rhwanamanyire oku we Kristu, Mtakatifu wa Nnâmahanga. ⁷⁰ Yezu abashuza erhi: Karhali nie namwishogaga, mwe ikumi na babirhi? Na muguma muli mwe ali muzimu! ⁷¹ Akagi derha Yuda Iskariti, mwene Simoni; bulya yewali ayishi muguza, naye, muguma wabalya ikumi na babirhi.