¹ Enyuma ly'ebyo, haba olusiku lukulu lwa bayahudi, na Yesu naye ayinamukira e Yerusalemu. ² Kusiga, e Yerusalemu, hofi n'omuhango gw'ebibuzi, habaga iziba lyaderhwagwa omuciherbraniya mpu Betsaida, lyaligwerhe nnengalenga irhanu. ³ Omw'ezo nnengalenga mwaligweshire balwala banji bwenene, emihurha, ebirema, abahozire ebirumbu, bakagiringa oku amishi gadundagana; ⁴ Bulya malaika muguma akagi rhibukira omwel'iziba, anashabaganye amishi; n'omulwala waba waburhanzi okuchidakula omwago mishi enyuma lya malaika amogashabanya anafuma endwala yage yoshi. ⁵ Aho hali mulume muguma alikola agwerhe ho miaka makumi asharhu na munani alwala. ⁶ Yesu erhi amobona agweshire, anamanya oku akola agwerhe kasanzi kanji alwazire, amubwira: kawalonza ofume? ⁷ Omulwala amushuza: Nnahamwirhu, ntagwerhe omuntu wakankweba omw'iziba amango amishi gamo birunduka, na, erhinkolaga nti namuja, owindi anabe ye nshokolera okuhonokera mwo. ⁸ Zukaga kwo Yesu amubwizire; orhole encingo yawe, onagende. ⁹ Honaho alya mulume anafuma; anarhola encingo yage, anagenda. Lwali lusiku lwa sabato. ¹⁰ Abayahudi banacibwira olya wafumaga: Ene lwa sabato; birhakuyemerirwi oku oberhule encingo yawe. ¹¹ Abashuza: Owa nfumagya ye wanbwizire: Mpu rhola encingo yawe, onagende. ¹² Bamudokereza: Yendi oyo muntu wakubwiraga mpu: orhole encingo yawe, ona gende? ¹³ Ci olya wafumaga arhamumanyaga yendi; bulya Yesu ali amohirigirhira omu ntumbi y'abantu bali aho. ¹⁴ Amango, Yesu amushimanaga omu ka Nyamuzinda, anacimubwira, alaga, wono wafumirage; orhacijiraga caha orhekiyishiba kubi kulusha okurhanzi. ¹⁵ Olya mulume agenda, ajibwira abayahudi oku Yesu ye wamu fumagya. ¹⁶ Byo byakagirhuma abayahudi bashimbulira Yesu, bulya akagi jira ebyo olusiku lwe sabato. ¹⁷ Ci Yesu abashuza: larha alikwakola kuhika buno; nani, ndi nakola. ¹⁸ OKwo kwarhuma, abayahudi bashubilonza okumuniga, arhali mpu okuba arhachikenziri olwe sabato, ci na bulya amoderha mpu Nnamuzinda y'Ishe, agali cijira naye oku ali Nnamuzinda. ¹⁹ Yesu ashubiderha, anababwira: Okunali okunali, mubwizire, omwana ntabyo akajira yene, arhankajira ebyarha bwine Isheajira; na byoshi Ishe akajira, omwana naye anabichire n'omwalagale. ²⁰ Bulya larha asima omwana, n'oku ka muyereka byoshi ali ajira; acimuyereka n'emikolo minene kulusha eyo, lyo musomerwa. ²¹ Bulya, nkoku larha afula abafire n'okubaha obulamu, kwonokwo omugala naye anahana obulamu emoyu alonzize. ²² Larha arhakatwira ndi olubanja, ci okutwa emanja akulekire Omugala. ²³ Lyo boshi bakenga omugala nka okubakenga Ishe. Orhakenzire Omwana arhakenzire n'Ishe wa murhumaga. ²⁴ Okunali, okunali, mmubwizire, owa yunva emyanzi yani, anayemere oyu wantumaga, akola agwerhe obulamu bw'emyakula arhakachitwirwa lubanja, chi akola arhalusire olufu aja omu bulamu. ²⁵ Okunali, okunali, mmubwizire, akasanzi kaciisha, kanaishire, amango abafu bayunva izu ly'omwana wa Nnamahanga; na abaliyûnve banalame. ²⁶ Bulya, nkoku Ishe agwerhe oulamu ye na nene, ntyo kwahire Omugala obwo bulamu naye. ²⁷ Anamuha obuhashe bw'okutwa emanja, bulya ali Mwana w'omuntu. ²⁸ Murhasomerwe n'ebyo; bulya akasangi kaciisha kalya boshi abali omushinda bayunva izu, banarhenge mwo. ²⁹ Abakozire aminja bafukire obulamu, ci abakozire amabi banafukire okutwirwa olubanja. ³⁰ Ntakahashijira bici niene: Nk'okunyunvirhe, nnatwe olubanja n'okulutwa kwani kuli kushinganine, bulya ntajira oku nonzize ci obulonze bw'owantumaga. ³¹ Erhi akaba nie chihamiriza nienene, obuhamiriza bwani burhali bw'okuli. ³² Hali owindi waja mpamiriza na manyire obuhamirize ajanjirira buli bw'okuli. ³³ Mwalirhumire emwa Yohana, anamubwira okuli. ³⁴ Kuli nie arhali muntu ompa obuhamirize; Chi ndesire ntyo, lyo mucira. ³⁵ Yohana kali kamole kayasire kanajaga kabonya, mwagali lonza okucisimisa kasangi kasungunu omu kulomeka kwage. ³⁶ Niono, ngwerhe obuhamirizi bunene kulusha Yohana; Bulya emikolo larha ampire mpu nyiyukirize, eyo mikolo yoneyo yonandi nakola, ehamirize emunda ndi oku larha wana ntumaga. ³⁷ Na larha watumaga ampamirize yene doka. Murhanayunvagya izu lyage, murhabonaga n'amalanga gage. ³⁸ N'emyanzi yage erhamuba mwo, bulya burhayemire oyu amurhumaga. ³⁹ Munaka lolereza amandiko, bulya mucikebirwe mpu mulico mwo mwabona akalamu k'emyakula. ⁴⁰ Murhanalonza kuyisha emwani lyo muhabwa obulamu. ⁴¹ Arhali emwabantu ntenza irenge lyani. ⁴² Cimanyire okumurhajira buzigire bwa Nnamahanga. ⁴³ Nayishire okw'izino lya larha, murhana nyankiriraga; erhi owindi wankayisha okw'izino lyage yene, mwanamuyankirira. ⁴⁴ Kurhi mwankayemera mwe mulongeza irenge kuli mwenene, ci murhalonza irenge lirhenga emwa Nnamahanga yene? ⁴⁵ Murharhanye mpu nie namushobesire emwa larha; owamuyandikire, ali Musa olya muba mucikubagire. ⁴⁶ Bulya nka mwakayemera Musa, erhi nie muyemire nani, bulya ye wayandikaga ebyani. ⁴⁷ Ci nkamurhayemiri ago maandiko, kurhi mwakayemeraga emyanzi yani?