¹ Nawirhu erhi amanya oku abafarisayo bayunvirhe oku akagijira n'okubatiza banji kulusha Yohana. ² N'obwo Yesu arhajaga abatiza yene chi abaganda bage. ³ Arhenga e Yudeya, anacishubirira e Galilaya. ⁴ Nk'oku byalikwanine agerere e Samariya. ⁵ Anahika omu cishagala ciguma ce Samariya, ciderhwa Sikara, hofi n'ishwa Yakobo ahaga, omugala Yusufu. ⁶ Aho hali iriba lya Yakobo. Yesu, erhi amorhama n'olugenzi, atamala oku burhambi w'iriba. Hali nk'aha nsa ndarhu. ⁷ Omukazi muguma w'e Samariya ayisha alidoma amishi. Yesu amubwira: Mpa kunywa. ⁸ Erhi abaganda bage bajire omu lugo bajigula ebilyo. ⁹ Olya mukazi w'omu samariya amubwira: Gurhi we, oli muyahudi, waka mpuna kunywa, nandi mukazi muguma wa musamariya? Abayahudi, barhajira lushange bon'abe Samariya. ¹⁰ Yesu amushuza: Nka walimanyire ebigabi bya Nnamahanga, omanye nandi oyu okubwizire: mpa kunywa! wankamuhunyire nawe kunywa! anakaguhire amishi g'obulamu. ¹¹ Nnamwagirwa, kw'adesire oyo mukazi, ci ntach'ogwerhe wadomera mwo, n'iriba lililiri; ngahi warhenza ago mishi g'omulamu? ¹² Ka we mukulu kulusha larha wirhu Yaboko, warhuhaga er'iriba, anaka linywa yenene, chiru n'abana bage n'ebishwekwa byage? ¹³ Yesu amushuza: Ngasi yeshi wanywa okwago mishi acishigwarhwa n'enyorha; ¹⁴ Ci ngasi wanywa amishi namuha arhanka cigwarhwa n'enyorha bundi, n'ago mishi namuha gaba muli ye nshoko ya mishi yaka hulula kuhika omu kalamu k'emiakula. ¹⁵ Olya mukazi amubwira: Nnahamwirhu, mpa nani okwago mishi, ntacigwarhagwa na nyorha bundi, ntana cishubiraga hano ndi doma. ¹⁶ Yesu amubwira, genda ohamagale balo, ogali isha hano. ¹⁷ Omukazi ashuza: Ntajira mulume. Yesu amubwira: neci odesire oku binali, oku orhajira mulume. ¹⁸ Bulya waligwerhe balume barhanu, n'oyugwerhe buno naye arhali balo. Ntyo odesire okuli. ¹⁹ Olya mukazi amubwira, erhi Nnahamwirhu, namobona oku oli mulebi. ²⁰ Ba larha bakagi cikumbira okw'eyi ntondo; ninyu muderhe, mwehe, mpu ah'okucikumbira eri e Yerusalemu. ²¹ We mukazi, kwo Yesu amubwizire , nyemera, amango gaciyisha galya arhaciri okweno ntondo erhi e Yerusalemu yo mwacikumbira larha. ²² Muli mwacikumba ebimurhamanyiri, rhwehe, rhwehe rhunaka cikumba ebi rhumanyire, bulya obucire bwa isha omu bayahudi. ²³ Ci amango nayisha, na mira gayisha, go abacikumba okunali bacikumba larha okumurhima n'omu bushinganyanya; bulya bo larha ahunyire. ²⁴ Nnamuzinda guli Mûka, na bikwanine abamwikumba bamwikumba omu murhima n'omubushinganyanya. ²⁵ Namukazi amubwira: Imanyire oku Masiya akwanine ayishe (olya ohamagalwa Kristo); erhi akaba amoyisha arhumanyisa ngasi kantu. ²⁶ Yesu amubwira: Nie ono, ndi nakushambalira. ²⁷ Honaho abaganda bage bayisha basomerwa gurhi aliashambala bon'omukazi. Chi barhali mw'owamubwizire: Erhi bici oliwahuna? erhi: Bici oliwaganira mwen'oyu? ²⁸ Lero oyo mukazi, anasiga akabindi kage, aja omulugo anabwira abantu: ²⁹ Mwishe mubone omulume wamombwira ebinajijire byoshi; kurhakaba ye Kristu? ³⁰ Bana cirhenga omu cishagala banaja emundali. ³¹ Ago mango, abaganda bage bamuyinginga mpu alyage, bamubwira: Mwalimu lyaga. ³² Cikwone ababwira: Ngwerhe ebinalya biryo murhamanyiri. ³³ Abaganda babwirana bone nanene: Karhali owamudwirhire ebyalya? ³⁴ Yesu ababwira: Ebyani bilyo kuli kujira amalonza g'owantuma, n'okuyukiriza omukolo gwage. ³⁵ Ka murhali mwaderha oku hasigire miezi ini balumbule? Lolagi kw'amubwizire, mulambule amasu, muna lolage oku amashwa mira gayezire ganahumbulagwa. ³⁶ Owa humbula ahabwa omukamarho, anarhumbike amalehe oku buzine bw'ensiku n'amango, lyo omurhwezi n'owahumbula bashangira haguma. ³⁷ Bulya omw'oko oku badesire ko binali: Orhwera aliwago n'ohumbula aliwago. ³⁸ Namurhumire oku muji humbula ebi murhakolaga; bandi babikolaga, ninyu mwamoja omu mukolo gwaba. ³⁹ Basamariya banji b'omweco cishagala bayemera Yesu erhi obo buhamiriza bw'oyo mukazi burhuma: anambwizire byoshi najijire. ⁴⁰ Ntyo, erhi abasamariya bamubona, bamusengera mpu ababere hofi. Abera aho nsiku zibiri. ⁴¹ Banji muganjo munene gwamuyemera erhi myanzi yage erhuma; V 42 Babwira olya mukazi: Erhi arhaciri ebiwarhubwiraga byo birhumire mwayemera; ci nirhu rhwamomuyunva rhwene, n'oku manya okunali oku yoyu ye Muchiza w'igulu. ⁴³ Enyuma ly'ezo nsiku zibiri, Yesu arhenga eyo, aja e Galilaya; ⁴⁴ Bulya Yene alierhi abidesire oku nta mulebi chiru n'omuguma okengwa omu cihugo cabo. ⁴⁵ Erhi ahika e Galilaya, abe Galilaya bamuyankirira bwinja, balya babonaga lirya lyoshi ajiraga e Yerusalemu oku lusiku lukulu; Bulya nabo balijire okw'idinye. ⁴⁶ Acirishubira e Kana y'e Galilaya, erya munda ahindulaga amishi gaba idivai. Yali murhambo muguma wa mwami ey'e Kapernaumu, erhi omugala alwazire. ⁴⁷ Erhi amanya oku Yesu amorhenga e Yudea okola ali e Galilaya, aja emunda ali, amuhuna mpu ayandagale ajifumya omwana wage, okola ali hofi kufa. ⁴⁸ Yesu amubwire: ka murhabwini ebisomerine n'ebirhangaza, murhankayemera. ⁴⁹ Olya murhambo wa mwami amubwira: Nnahamwirhu yandagala oku omwana wani arhacifa. ⁵⁰ Gendaga, kwo Yesu amubwizire, omwana wawe azine. Oyo mulume anayemera eyo myanzi ya Yesu amubwiraga anagenda. ⁵¹ Erhi akola ali bwandagala, abakozi bage bamushimana bamudwirhire eyi myanzi. Omwana wawe azine. ⁵² Abado mango gahiayunvirhe bwinja; banacimubwira, injo aha nsa nda, lyo ishushira lyamurhengaga kwo. ⁵³ Ishe akengera oku aheyo nsa yo na nene Yesu amubwiraga oku: Omwana wawe azine. Ayemera n'enyumpa yage yoshi. ⁵⁴ Yesu ashubijira ecisomerine cage ca kabiri erhi ahika e Yudeya ye Galilaya.