¹ Cikwone hali mulume muguma w'omubafarisayo, oderhwa Nikodemu, ali mugula w'Abayahudi. ² Oyo, anaja, hofi na Yesu, budufu, anamubwira: Rabbi, rhumanyire oku oli mugiriza orhenzire emwa Nnamuzinda; bulya ntaye wankajira ebirhangaza birinka ebiojijire, nka Namahanga arhali haguma naye. ³ Yezu amushuza: Okuli okuli, nkubwizire, nka omuntu arhashubiri burhwa buhyahya, arhaka bona obwami bwa Nnamuzinda. ⁴ Nikodemu amubwira: Kurhi omuntu akaciburhwa akola na mushosi? Ka anachiri shubira omu nda ya nnina aciriburhwa? ⁵ Yesu ashuza: Okunali, okunali, nkubwizire, nka omuntu arhabusirwi oku mishi n'oku Mûka mweru, arhankadaha omu bwami bwa Nnamuzinda. ⁶ Ecaburhagwa n'omubiri gunali mubiri, n'ecazburhazgwaz na Mûka gunali Mûka. ⁷ Orhasomerwe mpu namokubwira: Oku bikwanine mubwirwe buhyahya. ⁸ Empusi enahuse ahena lonzize, na onayunve omuhusi gwayo; Ci orhanka manya ahayarhenga, erhi aha yaja. Na ntyo kwo binali emwa ngasi muntu oburhwa na Mûka. ⁹ Nikodemu amubwira: Gurhi ebyo byankajirikana. ¹⁰ Yesu amushuza: K'oli mwigiriza omu Israeli, orhanamanyiri ebyo! ¹¹ Okuli, okuli, nkubwizire, rhuli rhwaderha ebi rhumanyire, rhunali rhwahamiriza ebirhwabwine; murhanayemiri obuhamiriza bwirhu. ¹² Nkamurhanka yemera amango ndi namu ganirira ebya hano igulu, kurhi mwakayishigi yemera hano nkola ndi namuganirira eby'Empingu. ¹³ Ntaye osagi yinamukira empingu, nkaba olya wahonokaga kurheng'Empingu, Mwen'omuntu oli omu mpingu. ¹⁴ Na nkakulya Musa amanikaga enjoka omw'irungu, kwonokwo kwo binakwanine Mwene omuntu amanikwe. ¹⁵ Lyo ngasi yeshi wamuyemire aba n'obulamu bw'ensiku n'amango. ¹⁶ Bulya Nnamahanga asimaga igulu kuhika ahana omwana wage cusha, lyo ngasi wamu yémere arhaheraga, ci abe n'obulamu bw'ensiku n'amango. ¹⁷ Bulya, Nnamuzinda arharhumaga omwana wage muno igulu mpu atwire igulu olubanja, ci mpu igulu licizibwe naye. ¹⁸ Ngasi omuyemire arhatwirwa lubanja; ci orhayemiri olwage lwatwirwe, bulya arhayemeraga izino lya Mwana cusha wa Nnamahanga. ¹⁹ Na okulutwa kwo kwoku, akamole kayishire omu igulu, abantu basima omwizizi kulusha akamole, bulya ebijiro byabo byali bibi. ²⁰ Bulya ngasi yeshi okola amabi anakagaya obulangashane, arhankanaja aha bulangashane, ayobohire ebijiro byage birhaki manyikana. ²¹ Ci ojira eby'obushinganya anaje aha bulangashane, lyo ebijiro byage bibonekana, bulya bichikine muli Nnamuzinda. ²² Enyuma ly'ebyo, Yezu, abaganda bage bamulusa, bayerekera omu Yudeya; anabera nabo eyomunda, erhi anali abatiza. ²³ Yohana naye alikoabatiza e Hainoni, hofi n'Esalimu, bulya eyomunda yali mishi manji; banaka iyisha mpu babatizibwe. ²⁴ Bulya Yohana arhalicihebwa omu mpamikwa. ²⁵ Hanacizuka, akadali ekarhi k'abaganda ba Yohana na muyahudi muguma lugenda kucicesa. ²⁶ Bagendera Yohana, bamubwira: Mwalimu, olya mwali mweshi ishiriza lya yorodani, olya wajaga wa hamiririza, alaga, akola aliabatiza, na boshi bajire emund'ali. ²⁷ Yohana ashuza: Omuntu arhankahabwa ecarhahirwe kurhenga empingu. ²⁸ Mwe muli badima bani kulya naderhaga: Ntali nie Kristo, ci ntumirwe kwone mmushokolere. ²⁹ Ogwerhe omuhya, ye muhya mulume; ci omwira w'omuhya mulume, ye muyimanzire ho ali amuyunvirhiza, alimwo omushingwe mwinji erhi izu ly'omuhya mulume lirhuma: kandi mwishingwe munene, guli gwani, guna cire. ³⁰ Akwanine abonekane mukulu, nnani ntohe. ³¹ Owarhenga enyanya ye nnali enyanya lya boshi; oweno igulu, anali w'igulu, n'ebyaderha binali b'igulu. Owarhenga empingu ali enyanya lya byoshi. ³² Ali ahamiriza eby'abwine n'ebyayunvirhe, ci ntaye wayankirire obuhamiriza bwage. ³³ Owayankirire obuhamiriza bwage ayerekana oku Nnamuzinda aba mwimana. ³⁴ Bulya ye warhumagwa na Nnamuzinda aderh'emyanzi ya Nnamuzinda, bulya erhi Nnamuzinda akola amuha Mûka muzira ishe arhamunyihizagya. ³⁵ Larha asima omugala, anamuheba ebintu byoshi omu maboko gage. ³⁶ Owayemera Omugala akola agwerhe obulamu bw'ensiku n'amango; Ci orhayemiri Omugala arhakabona obulamu, ci omutula gwa Nnamuzinda gwa ishiba kuliye.