¹ Enyuma lya nsiku zisharhu, hanachiba obuhya e Kana omu Galilaya. Nnina wa Yesu naye ahali, ² Na Yesu alilalisirwe okwobo buhya bo n'abaganda bage. ³ Idivai lyabulika, nnina wa Yesu amubwira: Barhacigwerhi idivai. ⁴ Yesu amushuza: Muzire, bici ekarhi kawe na nani? Akasanzi kani karhacihika. ⁵ Nina abwira abalisi: Mujire ngasi kwoshi amubwira. ⁶ Gusiga aho hali rhubindi ndarhu rhwa mabuye, rhwakagi hebwa mw'amishi go kuka kalaba abayahudi, na ngasi kaguma kangabumbire ngero zibiri erhi zisharhu. ⁷ Yesu ababwira: Orho rhubindi murhubumbage mishi. Bana rhubumba rhoshi kuhika oku muhiro. ⁸ Domagi, kw'ababwizire, muna hekerage omwalisi. Bana muhekera. ⁹ Omwalisi erhi alabula amishi gahinduka idivai, arhamanyaga ngah'iryo idivai lirhenzire, nobwo abakozi baligadoma bohe bamanyirire bwinja, omwalisi ahamagala omuhya mulume, ¹⁰ Anacimubwira: Ci abantu boshi idivai linja lyo barhangi gaba, buzinda bagabe elirhali linja; wehe, wamorhengi bika erinja kuhika buno. ¹¹ Eco cajirikanaga, e Kana omu Galilaya, cirhangaza cirhanzi Yesu ajiraga. Ayerekana obuhashe bwage n'abaganda bage bamuyemera. ¹² Enyuma lyaho, ayandagalira e Kapernaumu, bona nnina, abalumuna n'abaganda bage, banabera yo nsiku ngerwa. ¹³ Pasaka w'abayahudi erhi akola ayegerire, Yesu ayinamukira e Yerusalemu. ¹⁴ Arhimana omu ka nyamuzinda abarhimbuzi b'enkafu, ab'ebibuzi n'abe nguku, nab'okukaba batamire. ¹⁵ Ahunga omunyuli omu migozi, abahulusa boshi omu ka Nyamuzinda, n'ebibuzi n'enkafu; ashandaza n'enfaranga z'abakagi kaba, atulamya n'orhurhala rhwabo; ¹⁶ Abwira abaliko barhimbula enguku: Rhenzi ebyo byoshi hano, enyumpa ya larha murha yihindule cibuye. ¹⁷ Abaganda bage bakengera oku biyandisirwe: Oluhali lw'enyumpa yawe lwayishi ngwarha. ¹⁸ Abayahudi, baja kwo baderha, bamubwira: Cisomerine cici orhuyeresire, c'okujira kwa mwene okwo. ¹⁹ Yesu abashuza: Mushabe aka ka Nnamuzinda, n'oku nsiku zisharhu naciri kazusa. ²⁰ Abayahudi baderha: Aka ka Nnamuzinda kayubakagwa miaka makumi gani na ndarhu, nawe, okayimanze oku nsiku isharhu! ²¹ N'obwo yehe amaderha, aka Nnamuzinda k'omubiri gwage. ²² Co carhumire, amango afukaga omu bafu, abaganda bakengera oku akudesire, banayemera amandiko n'emyanzi Yesu aderhaga. ²³ Amango Yesu ali e Yerusalemu, oku lusiku lukulu lwa Pasaka, banji bayemera izino lyage, erhi bamobona ebirhangaza akagijira. ²⁴ ci Yesu arhacikubagiraga bo, bulya ali bamanyire boshi, ²⁵ Nabulya arhali cifinjire buhamiriza bwa muntu yeshiyeshi; bulya yene ali amanyire bici biba omu muntu.