¹ Erhi ayusa okuderha ntyo, Yesu agalamira enyanya, aderha: Larha, akasanzi kanahika. Okuze mugala wawe, lyo mugala wawe akukuza, ² Na bulya wamuhire obuhashe kuli ngasi ciremwa, mpu lyo ashoboza aba wamuhire boshi akalamu k'ensiku n'amango. ³ Bulya, akalamu k'ensiku n'amango, kuli bo, kuli kukumanya, w'oyo wene Nnamahanga w'okuli, n'oyu warhumaga, Yesu Kristu. ⁴ Nakukuzize en'igulu, nayukirize omukolo wampagampu njire. ⁵ Nabuno nawe, Larha, onkulizagye emalanga gawekulya kukuzibwa naligwerhe embere igulu lirhacihaba. ⁶ Namanyusiz'izinolyawe oku bantu wampaga kurhenga en'igulu. Bali bawe wana bampa; banashimba akanwa kawe. ⁷ Buno bakolaga bamanyire oku ebi wampire byoshi emwawe birhenga. ⁸ Bulya nabahire emyanzi wampire; nabo baiyemire, bamanya bwinja bwinja oku emwawe narhenganga, bana yemera oku we wantumaga. ⁹ Bo nsengerire. Nta sengerir'igulu, ci balya wampaga, bulya bali bawe. ¹⁰ N'ebyani byoshi biri byawe, n'ebyawe biri byani; na muli bo njir'irenge. ¹¹ Ntaciri en'igulu ci bohe en'igulu baciri, niehe nyishire emwawe. Larha mwimana obalange omw'izinolyawe aba wampaga, lyo baba haguma akirhu. ¹² Amango nali rhwe nabo omu igulu nakagi balanga okw'izino lyawe. Nalanzire aba wampaga, na ntaye wahezire muli bo, nkaba olya waligwasirwe oku hera mpu lyo amandiko gahikirira. ¹³ Buno lero nyishire emwawe ebyo mbidesire omw'igulu ntilyo bayunva obusime bwani buna bayunjule. ¹⁴ Nabahire akanwa kawe bulya barhali b'igulu, nk'oku nani ntali w'igulu. ¹⁵ Ntakuhunyiri nti ubarhenze omw'igulu, ci kwone obalange oku mubi. ¹⁶ Barhali b'igulu, nk'oku nani ntali w'igulu. ¹⁷ Obajire bimana omu kuli: Akanwa kawe k'okuli. ¹⁸ Kulya wantumaga omw'igulu, kwo nani mbarhumire omw'igulu. ¹⁹ Nacihanyire nterekero erhi bo barhumire, lyo nabo bahinduka nterekero omu okuli. ²⁰ Arhali bone ndi nahunira, ci mpunire n'abo bacinyemera erhi kuyigiriza kw'aba kurhuma. ²¹ Ly' boshi baba muguma, nk'oku we, Larha oli muli nie, nnani ndi muli we, nabo babe muguma muli rhwe, lyo igulu liyemera oku we wantumaga. ²² Nabahire irenge wampaga, nti lyo baba muguma nka kulya nirhu rhuba muguma, ²³ nie muli bo, nawe muli nie, lyo baba muguma lwoshi, lyo n'igulu limanya oku we wantumaga n'oku obasimire nk'oku nsima. ²⁴ Larha, nnonzize abawampire mbe rhweshi nabo halya ndi, lyo babona irenge lyani, irenge wampire, bulya wansimire embere z'okulemwa kw'igulu. ²⁵ Larha mushinganya, igulu lirha kumanyaga; ci niehe nkumanyire, n'aba bamanyire oku we wantumaga. ²⁶ Nabamanyisize izino lyawe, nani nacimanyisa lyo, ly'obuzigire wanzigire buba muli bo, lyo nani mba muli bo.