¹ Mmubwizire ebyo, lyo muleki heza obwemere. ² Bayishi mberula omu mashengero. Ciru, hali amango gayisha ngasi owamuyirhe amanye mpu kulikukolera Nnamahanga. ³ Bajira ntyo, bulya barharhumanya rhwena Larha. ⁴ Mmubwizire ebyo, nti lyo hano akasanzi kabyo mukengere oku namubwizire. Ntamubwiraga byo kurhanga oku murhondero, bulya nali rhweshi. ⁵ Lero buno, nkolaga Nana e mwa owantumaga, na ntaye muli mwe wandosa, mpu: ngahi waja? ⁶ Ci, bulya namubwizire oku oburhe buyunjwire e murhima yinyu. ⁷ N'obwo mmubwizire okunali bishinganine ngende, bulya nkantagenziri alya muhamirizi arhamuyishire; cikwone, hanoba namagenda namurhumira ye. ⁸ N'amango ayisha, ayagiriza igulu oku caha, oku bushinganyanya, n'oku lubanja: ⁹ oku caha, bulya barhayemiri; ¹⁰ oku gw'obushinganyanya, bulya nkola naja e mwa Larha, murhakanaci mbona; ¹¹ oku lubanja; bulya omurhwali w'er'igulu atwirirwe olubanja. ¹² Ncigwerhe binji by'okumubwira ci murhanka shubi bihasha. ¹³ Amango omurhwali ayisha, Muka w'Okuli, amuheka omu kuli kwoshi; bulya arhali byage anaderhe, ci aderha ngasi ebi ayunva, amubwira n'ebyayishiba. ¹⁴ Ayishi nkuza, bulya kuli nie ayishi huma, amubwire. ¹⁵ Ebya Larha byoshi biri byani; Co cirhumire nderha erhi oku byani ayishi huma, amubwire. ¹⁶ Kandi kasanzi kasungunu, murhaci mbone, na kandi kasungunu mwayishi mbona, bulya naja e mwa Larha. ¹⁷ Obwo, bagumu omu bigirizibwa bage babwirana, mpu: Kwokurhigi okwo alya arhubwira: Hisanzi hitya murhacimbone, n'e hindi hisanzi hitya mwa yishi mbona; bulya nkola naja e mwa Larha? ¹⁸ Okubundi bakazi derha: Ehyo hisanzi hitya kw'oku derha gurhi? Rhurhamanyiri ebyalonza oku derha. ¹⁹ Yesu, amanya oku balonza oku mudosa, anacibabwira mpu: Muli mwadosa ebi nadesire: hindi hisanzi hitya, murhaci mbone; na hindi hisanzi hitya mushubi mbona? ²⁰ Okuli, Okuli, mmubwizire mwayishi laka, mubande n'endulu, b'igulu lyasima. Mwehe mwayishi ba burhe; ci oburhe bwinyu bwayishi hinduka mwishingo. ²¹ Omukazi, nk'ali hofi h'okuburha, oburhe buna mugwarhe bulya akasanzi Kage kahisire; ci nka amayusi burha omwana, arhacikengera galya malibuko gage erhi kucishinga kurhuma bulya omuntu abusirwe omw'igulu. ²² Ninyu kwona kuguma. Buno muli burhe; cikwone nacimubone n'omurhima gwinyu gwayishi shagaluka na ntaye wakuye obwo bushagaluke; ²³ Olwo lusiku, ntaco mwaci ndose. Okuli, Okuli, mmubwizire, eci mwahune Larha amuha co okw'izino lyani. ²⁴ Kuhika buno ntaco musagi huna okw'izino lyani. Muhune, mwahabwa, n'obuzigire bwinyu bwaba bwimana. ²⁵ Ebyo byoshi mmubwizire byo omu migani. Amango gayishi ntacimubwire omu migani ci n'obwalagale Ebya Larha. ²⁶ Olwo lusiku, mwahime okw'izino lyani, ntamubwiziri nti namushengera e mwa Larha. ²⁷ Bulya Larha yene amusimire, bulya munsimire, na bulya oku narhengaga e mwa Nnamahanga. ²⁸ Narhengaga e mwa Larha, naja en'igulu; buno nkola narhenga en'igulu, nje emwa Larha. ²⁹ Abigirizibwa bamubwira erhi: Lero odesire n'obwalagale, orhadesiri omu migani. ³⁰ Lero rhumanyire okwayishi byoshi, na ntaye ocilonzize oku dose; Co cirhumire rhuyemire oku e mwa Nnamahanga warhenganga. ³¹ Yesu abashu: Kalero mwamayemeraga? ³² Lolagi, akasanzi kayisha kanakola kahisire, mwashanda bana, ngasi muguma lwage, munansige niene; cikwone ntali niene, bulya ndi rhwe na Larha. ³³ Na mmubwizire ebyo, nti lyo muba n'omurhula muli nie. Mwaba n'amalibuko omw'igulu; cikwone muzibuhe na himir'igulu.