¹ Erhi Yesu aba amaderha ntyo, agenda b'oshi n'abaganda bage baja ishiriza ly'olwishi lw'Ekidroni, aho hal'ishwa, aja mwo n'abaganda bage. ² Yuda olya wamuhanaga, alimanyire aho, bulya Yesu akija eyo munda kanjikanji bwoshi n'abaganda bage. ³ Lero Yuda, erhi adwirhe engabo, n'abasirika arhenzagya emw'abakulu b'abajinji n'ab'omu murhwe gw'abafarisayo, bayisha aho badwirhe eby'okulwa, n'orhumole. ⁴ Yesu, alimanyirire ebyali gwasirwe oku muhikirira byoshi, abayegera, ababwira erhi: Ndi mulilonza? ⁵ Bamushuza erhi: Yesu w'enanzareti. Yesu ababwira erhi: Niono. Na Yuda olya wamuhanaga, ali boshi nabo. ⁶ Erhi Yesu aba amababwira oku niono, bashubira nyuma bahirima okw'idaho. ⁷ Yesu aciri badosa erhi: Ndi mwaj'alonza? Bamushuza erhi: Yesu w'enanzareti. ⁸ Yesu abashuza erhi: namubwizire oku niono. akaba nie muli mwalonza, muleke aba bagende. ⁹ Ntyo kw'adesire, lyo kalya kanwa aderhaga kahikirira: Ntahezagya cir'umuguma muli balya wampaga. ¹⁰ Simoni Petero, aligwerhe engorho ayikula omu lubarhi, ayilikira mwambali w'omujinji mukulu, amutwa okurhwiri kw'ekulyo. Mwambali w'oyo mujinji mukulu ye waderhagwa Malkus. ¹¹ Yesu abwira Petero: Shubiza engorho yawe omu lubarhi. Ka ntanywe akabehe k'amalumwa Larha ampaga mpu nywe? ¹² Agomango engabo y'abasirika b'Abayahudi, lero bagwarha Yesu, bamushweka. ¹³ Barhangi muheka emwa Anna; bulya Anna ali ishazala wa Kayafa, oyo Kayafa ye wali mukulu ogwo mwaka. ¹⁴ N'obwo Kayafa y'olya wahanulaga abayahudi: Kukwaninwe muntu muguma afire olubaga. ¹⁵ Simoni Petero, b'onowindi mwigirizibwa muguma, bashimbulira Yesu, oyo mwigirizibwa ali manyikine n'oyo mujinji mukulu, aja omu cogo c'omujinji mukulu b'oshi na Yesu; ¹⁶ Cikwone Petero asigala enyuma ly'omuhango. Oyo wundi mwigirizibwa, wali manyinikine n'omujinji mukulu, ahuluka, aganiza omulanzi w'omuhango, adahya Petero. ¹⁷ Lero omukazi, wakagi lang'olunvi, adosa Petero erhi: Ka nawe, orhali w'omu baganda b'oyu muntu? Ashuza erhi: Nanga ntali wa muli bo. ¹⁸ Bulya emboho yali, n'abasirika bali twanire omuliro baka kaluka. Petero naye ali yimanzire boshi nabo, aka kaluka. ¹⁹ Ago mang'omujinji mukulu adosa Yesu ogw'abigiriza bage n'ogw'enyigirizo zage. ²⁰ Yesu amushuza erhi: Nadesire n'abantu boshi n'obwalagale; nayigirizize omu mashengero g'Abayahudi ensiku zoshi n'omu bibanda, erhi abayahudi boshi bakagi ba bashimanine ntaco nadesire bufulikwa. ²¹ Bici birhumire w'andosa? odose abo banyunvirhe; alaga, abola boki bamanyire ebi nadesire. ²² Erhi Yesu aderha ntyo, muguma w'omu barungu,wali muyimanzire ho, amuh'oluhi aderha rhi: Kawana shuza omujinji mukulu ntyo? ²³ Yesu amushuza erhi: Akaba kubi nadesire rhubwirage okubi nadesire; ci kwone akaba bwinja nadesire, bicigi onshurhire? ²⁴ Ago mango Anna amurhuma emwa Kayafa mujinji mukulu. ²⁵ Ago mango Simoni Petero abera aho, aka kaluka. Abantu bamu bwira mpu: Nawe, k'orhali w'omu bigirizibwa b'oyu muntu? Alahira, erhi ntali wa muli bo. ²⁶ Muguma wa muli balya bambali b'omujinji mukulu, mubusi w'olya Petero atwaga okurhwiri, amubwira erhi: Ka ntakubwine omw'ishwa mwe naye? ²⁷ Petero aciri shuza erhi: Nanga. Honaho oluhazi lwabika. ²⁸ Barhenza Yesu emwa Kayafa bamuheka omu lugo lw'omurhegesi; lyali sezi sezi. Barha dahaga omolo lugo, lyo barhagi zira, lyo banalya Pasaka. ²⁹ Pilato ahuluka abaja ho, abadosa: Bici mushobekire oyu muntu? ³⁰ Bamushuza mpu: nk'erhali nkola maligo, rhurhali rhwaku lerhera ye. ³¹ Pilato ababwira erhi: Rholi ye mwene, mumutwire olubanja nk'oku amarhegeko ginyu ganadesire. Abayahudi bamushuza; Rhurha gwerhi buhashe bw'oku yirha omuntu. ³² Intyo, kw'akanwa ka Yesu kali kwaninwe kahikirire, kw'aderhaga erhi ayerekana gurhi afa. ³³ Agomango Pilato ashubira omu k'emanja, ahamagala Yesu, amudosa erhi: K'oba mwami w'Abayahudi? ³⁴ Yesu ashuza erhi: Kawakumanya wene, erhi wakubwirwa n'abandi? ³⁵ Pilato ashuza erhi: Ka nie, mba Muyahudi? Bantu b'omu mulala gwinu n'abakulu b'abajinji bo bakumpaga; bici wajijirage obwo? ³⁶ Yesu ashuza erhi: Obwami bwani burhali bw'omw'igulu, nka bwali bw'omw'igulu, bambali bani bali balwa mpu lyo ntagihabwa abayahudi; cikwone obwami bwani burhali bw'omwigulu. ³⁷ Pilato amudosa erhi: k'oba Mwami obwo? Yesu ashuza erhi: Okudesire, mbaye. Naburhagwa nanayisha enw'igulu nti nderhe ogw'okuli. Ngasi muntu oba w'okuli anayunve ebi nderha. ³⁸ Pilato amudosa erhi: Okuli byo bici? Erhi Pilato aba amaderha ntyo, ashubi huluka aja emunda abayahudi bali, aba bwira erhi ntabwini okubi kwoshi kwoshi emwage. ³⁹ Cikwoki omu kushimbulira obworhere bwinyu nyorha mmushwekulira muguma olwa pasaka, ka mulonzizagye mushwekulire Mwami w'Abayahudi? ⁴⁰ Lero barhondera bayakuza mpu: Arhali ye, rhulonzize Baraba. N'obwo Baraba abaga mwisi wa bantu.