¹ Hali muntu muguma mulwazi, Lazaro. Kurhenga e Batania lugo lwa Maria na Marta mwali wabo. ² Oyo Maria ye washigaga Nnamwirhu amavurha, n'okumuhorhola amagulu n'enviri zage, mushinja wage Lazaro wali mulwala. ³ Bali babo barhuma entumwa e munda Yesu ali : Nnamwirhu, olya osima alwazire. ⁴ Enyuma z'okuyunva ntyo, Yesu aderha: Eyo ndwala erhali ya kuyirha; cikwone enyanya ly'obukuze bwa Nnamahanga mpu lyo omwana wa Nyamuzinda ahabwirenge naye. ⁵ N'obwo, Yesu ali asima Marta, na mukulu wage, na Lazaro. ⁶ Erhi ayunva oku Lazaro alwazire ashubi bera nsiku zibirhi e munda Ali, ⁷ abwira abigirizibwa bage: muhubire e Buyahudi. ⁸ Entumwa za mubwira erhi Mwigiriza Mukulu, Abayahudi balya balonzagya oku kubande amabuye, onakola walonza Kandi okugaluka e Yudea! ⁹ Yesu ashuza erhi kazirha nsa ikumi na zibirhi omu mulegerege? Owakaja agenda omu mulegerege arhankasarhala ciru n'ehitya, bulya aly'abona obulangashane bw'igulu. ¹⁰ Cikwone, owankagenda omu budufu, anasarhala bulya akamole karhali ahali. ¹¹ Enyuma ly'eyo myanzi, ababwira, Lazaro mwira wirhu ahunire; cikwone nkola naji Muzusa. ¹² Abigirizibwa bamushuza mpu: Nnamwirhu, nkaba ali liro, afuma. ¹³ Yesu adesire e nyanya ly'olufu lwage ci bohe bacikebwa mpu adesire okulemba n'eliro. ¹⁴ Lero Yesu ababwira bwinja: Lazaro anafire. ¹⁵ N'okwo mwe murhumire, lyo muyemera, nshagalusire okuba ntali eyo munda. cikwone rhuja e munda ali. ¹⁶ Bulya gurhi Tomaso oderhwa Kahasha, abwira abandi birigizibwa: Rhugende nirhu, lyo rhufera haguma. ¹⁷ Yesu erhi ahika arhimana Lazaro erhi ali nsiku zini omu nshinda. ¹⁸ N'okuba Betania ali hofi na Yeruzalemu, nka lugero lwa bilometre bisharhu. ¹⁹ Bayahudi banji bajire e munda Maria na Marta bali oku barhuliriza oku kufa kwa mushinja wabo. ²⁰ Erhi Marta ayunva oku Yesu ayishire, agendi mulinga cikwone Maria asigala atamire ahaka. ²¹ Marta abwira Yesu, Nnamwirhu, nkawahali, mushinja wani arhankafire. ²² Cikwone ciru, ankaba ntyo, Mmanyirire oku ngasi byoshi wahuna e mwa Nnamahanga akuhaba byo. ²³ Yesu amubwira mpu: Mushinja wawe afuka. ²⁴ Marta amubwira erhi, Mmanyire okwayishi fuka olusiku lw'obufuke buzinda. ²⁵ Yesu amubwira erhi: Nie bufuke n'obuzine, owa nyemera ayishi lama muli nie, ciru ankafa; ²⁶ na ngasi oluamire nka ananyemere. K'oyemire ntyo? ²⁷ Acimubwira erhi: Neci, Nnahamwiru, nyemire oku we Kristu, mwene na Nnamahanga, olya walishinganine okuyisha omw'igulu. ²⁸ Oku ayusa aderha antyo acigendera. Anaji hamagala Maria mukulu wage okw'ihwe: Amubwira erhi: Mwigiriza hano anakulonzize. ²⁹ Erhi Maria akuyunva, ayimuka duba duba, anaja e munda Ali. ³⁰ Bulya Yesu arhali hika omu lugo, cikwone aciri aha Marta amushimanaga. ³¹ Abayahudi bali omu nyumpa, bona Maria bo banakagi murhuliriza, erhi babona ayimuka duba duba n'okuhuluka, bamushimbulira, baderha mpu: Agenzire aha nshinda okujilakira ho. ³² Erhi Maria ahika aha Yesu ali, n'okumubona, ahirima aha magulu gage, anamubwira mpu: Nnahamirhu, nkawali aha mushinja wirhu arhankafire. ³³ Yesu abona ali alaka ye n'Abayahudi baliyishire boshi naye, alumwa omu murhima gwage; ³⁴ ababwira: Ngahi wamuhebire? Bamubwira: Nnamwirhu, oyishe phone. ³⁵ Yesu alaka. ³⁶ Kwa rhuma Abayahudi baderha mpu: Mubonage okwali musimire. ³⁷ N'abandi muli bo baderha mpu: Ye wafumagya omuhurma, karhanka rhanzirage oyo muntu arhafe? ³⁸ Yesu alumwa kandi bwenene e murhima, aja e bwa nshinda, lyali nka lwala, n'ibuye lyali liyegemeke oku luso. ³⁹ Yesu aderha: kuli er'ibuye. Marta lwali wabo nakufa aderha erhi, Nnamwirhu, akola aly'abaya, bulya akola nsiku zini omwo. ⁴⁰ Yesu amubwira: nkata kubwiraga oku nk'oyemire wana bona irenge lya Nyamuzinda? ⁴¹ Banaci lengeza ibuye. Yesu agalamira enyenya, anaderha: Larha, Nvuzire omwunkwa bulya onakanyunva. ⁴² Nie mbamanyire oku onakanyunva e nsiku zoshi, ndesire ntyo erhi olu lubaga lunzungulusire lwolurhuma, lyo bayemera oku we wantumaga. ⁴³ Enyuma z'okuderha ntyo, aderha okw'izu linene, mpu: Lazaro huluka omwo! ⁴⁴ Nakufa anacihuluka, amagulu n'amaboko gali mashweke n'embitambara, N'Amanga gali mashweke n'e birere. Yesu ababwira, shwekuli ye muna muleke agende. ⁴⁵ Banji w'omu Bayahudi bali yishire e munda Maria ali, bana bona ebi Yesu ajijire, Bamuyemera. ⁴⁶ Ci baguma muli bo bagendi lonza Abafarisayo n'oku babwira ebi Yesu anajijire. ⁴⁷ Lero abagula bakulu na Abafarisayo balonzanya bashimanana baderha: Gurhi rhwajira? bulya oyu muntu ajijire bisomerine binji. ⁴⁸ Rhuka mulekerera, boshi bamuyemera, n'Abaroma banayisha banashereze byoshi ciru n'omurhundu gwirhu n'ishanja lirhu. ⁴⁹ Muguma wabo Kayafa, ye walimu mukulu wa bagula ogwo mwaka, ababwira erh: murhayunvirhi ebyo ciru n'ehitya. ⁵⁰ Kamurha rhimanyizi oku buli bunguke bwinyu oku muntu muguma okufira olubaga, n'olubaga loshi lurhagi hera. ⁵¹ Arhaderhaga ebyo oku bwenge bwage yenene. Ci bulya wali mugula mukulu ogo mwaka, aleba oku Yesu ayishi fira olubaga. ⁵² Arhanali enyanya lone; cikwone lyo ahasha okushubuza abana ba Nnamahanga balishandire babe mubiri muguma. ⁵³ Kurhengera olwo olusiku baywesa omuhigo gw'oku muyirha. ⁵⁴ Co carhumaga Yesu arhaci ciyerekanaga lwoshi omu Bayahudi; ci ayegukira omu cindi cihugo cali e burhambi bw'irungu, omu cishagala ciderhwa Efrahimu. Eyo munda yo abezire boshi n'abigirizibwa bage. ⁵⁵ Basaka w'Abayahudi alikola ayegerire. N'abantu banji b'omw'eco cihugo barheremera e Yeruzalemu embere olwa basaka luhike, mpu bajici cesa. ⁵⁶ Banana balongerereza Yesu, banakaja badosanya ngasi baguma omu ka-Nyamuzinda: Gurhi mugererize k'arhayishe okw'idinye? ⁵⁷ N'obyo abagula bakulu n'abafarisayo bali bamahana irhegeko oku erhi hakajira omuntu wamanya ahali, anahaderhe, lyo bahasha oku mugwarha.