¹ Erhi baba bama higa mpu rhurhulirwe e Italiya, Paolo n'abandi bashwekwa bahabwa omurhambo w'omurhwe gw'abasirika guderhwa Agista, n'oyo murhambo ye derhwa Julio. ² Rwanacishonera omu nkunge (mashuha) y'e Adramiti yajaga ya baraganya omu ntambi y'e Azia rhwagenda haguma na Aristariko, muna Sedonia w'e Tesalonike, ³ olusiku lwakulikiraga, rhwahika e Sidoni. Julio ajirira Paulo bwinja, amuyemerera okuja e mw'abira bage mpu bamurhabale. ⁴ Erhi rhurhenga e Sidoni, rhwayisha rhwabaranganya omu ntambi z'echirhwa c' e Cipro, bulya empusi ya kagirhenga olunda lubi. ⁵ Erhi rhuba rhwama rhaluka enyanja e Silisia n'e Panfilia, rhwahika e Mira omu Lusia. ⁶ Omurhambo w'omurhwe gw'abasirika ashimana e nkunge y'e Aleksandria yali omu njira y'okuja e Italia; arhuhira mwo. ⁷ Rwamala nsiku nyinji omu nyanja rhwaka genda bunyi bunyi, n'erhi rhuhika hofi n'e Kinido, erhi rhwamakoya. E mpusi erhazigaga rhasika; bana cibaranganya omu ntambi z'echirhwa c'e Kreta lunda lw'e Salomono. ⁸ Rhwacihananga rhwalwikiriza, rhwahika ahantu haderhwa nsiko yinja, hofi n'e cishagala c'e Lazaya. ⁹ Ensiku zali zamagera, n'okugera omu nyanja kurha ciri kulembu, bulya amango g'oku cishalisa gali ga mahwa. Paulo abaha ihano, ¹⁰ ababwira, erhi: Bira bani, mbwine oku rhwagenda, ci omu kanga rhuli, arhanali ka kuheza mizigo rhudwirhe kone n'obwarho, ci n'obuzine bwirhu nabo . ¹¹ Ci omurhambo w'omurhwe gw'abasirika ali acikubagire omu mwerekeza w'obwarho n'omukulu w'abali mwo kulusha e binwa bya Paulo. ¹² Erhi bacibula e nsiko nyinja (cikombo) bakengerera mwo amango g'e mpondo, banji baderha mpu baharhule, balole erhi bankahika e Fenisia, co cikombo c'e Kreta ciyerekire ebuzikiro n'ebushshokero bw'izuba. ¹³ Erhi ehihusi hy'emukondwe hicihusa, bamanya mpu lero e mihigo yabo e kola ya yunjula. Basikula obwarho, babambaraganya hofi hofi n'e Kreta. ¹⁴ Ci mpu hagera hi Sanzi hitya, empusi nkali yarhengaga e bwa cirhwa, e derhwa Erakwilo, ya barhinda kwo. ¹⁵ Eyo mpusi yanaciyehula obwarho, bwayabirwa okuyilwisa, rhwaja rhweyehulirwa eyi n'eyi. ¹⁶ Rhwayehulirwa ebwa birhwa biderhwa Kauda, rhwanacihangana ntyo rhwashweka ehy'obwarho hisungunu hy'okurhurhabala. ¹⁷ Erhi baba bamahiyinamula, bakolesa ebindi baligwerhe by'okurhabala, bashweka e nkunge n'emigozi, barhola omurhoza guja gwa yerera bagurhogeza omu nyanja, na ntyo bayehulwa n'empusi. ¹⁸ Erhi buca, omulaba mukali gwa rhudungeja bwenene; bajugujira e mizigo omu nyanja. ¹⁹ N'olusiku lw'akasharhu, bone n'amaboko gabo bakabulire e birugu byabo b'omu nkuge. ²⁰ Kurhenga nsiku yinji, oli izuba, oli e nyenyezi nta ciru n'eciguma c'abonekaga: N'omulaba nago gwanayohana obu kali bwago. Ntyo ntabulagalire bacigwerhe. ²¹ Nsiku yinji zagera rhurhalya ciru nehi. Paulo anaciyumanga e karhi kabo, ababwira erhi: << Kamurhabwini, yaga bira bani oku mucinyunvagye rhurhankarhenzire e Kreta, rhunka na bwine aka kanga, n'e birugu birhali byafa busha. ²² Cikwone muhire omurhima omu nda, bulya ntaye ciru n'omuguma wafa muli mwe; obwarho bwone bulohomire. ²³ Neci, ene budufu malahika wa Nyamuzinda nshiga ye na nkolera anambonekire, ²⁴ ambwira, erhi: Orhayobohaga Paulo, kukwanine ohike embere za Sezari, kandi Nyamuzinda akuhire obuzine bw'aba muli mweshi omu bwarho . ²⁵ Kuziga muhire omurhima omu nda, bira bani! Nci kubagire Nnamahanga nti oku nabwizirwe kwo bwanaba. ²⁶ Ci kukwanine rhuhike oku cirhwa ciguma. ²⁷ Obudufu bw'ikumi na kani, erhi rhuyehwire n'akalaba oku nyanja ya adriatiko, abalanzi, omukagarhi k'obudufu, barhanya mpu rhuyegire ecikombo. ²⁸ Erhi bakweba olugero, babona makano makumi gabirhi: bacitunda hitya, baciri lukweba, babona makano ikumi na garhanu . ²⁹ Omukuyoboha rhurha ini embere, bayiyandagaliza omu mishi : balindirira omuceracera. ³⁰ Cikwone, bulya abalirhudwirhe balonza barhenge omu bwarho mpu baciyakire, na Baheba ecitambara oku nyanja mpu bakwebe ensimiko omu cikumba . ³¹ Paulo abwira omukulu w'a basirika: nkaba aba bantu barhabeziri omu bwarho, murhakacira. ³² Lero abasirika batwa emigozi y'ensimiko, banalekantyo. ³³ Embere bucanule, Paulo ayinginga abantu boshi oku balye ebiryo, aderha: Ene luli lusiku lw'ikumi na zini mulimwa lindira na musimisire okurhalya . ³⁴ Ntyala mubwizire mulye, bulya ebyo bikwanine oku bucire bwinyu, na harha here n'oluviri okw'irhwe lya ngasi muguma minyu . ³⁵ Erhi aba amaderhantyo, arhola omugati, na erhi akuza Nnamahanga embere za boshi, aguvuna anarhondera okulya. ³⁶ Na rhweshi, rhwasimika , rhwanalya nirhu. ³⁷ Rhwali omu bwarho, bantu magana gabirhi na makumi galinda na ndarhu rhweshi. ³⁸ Erhi baba bamalya n'okuyigurha, bakweba engano omu nyanja obuzirhu bwo bwarho. ³⁹ Erhi buca , barhamanyaga ecihugo balimwo, cikwone erhi balangira ecirhwa n'ecikombo, balonza oku kululirayo obwarho, bacihashage. ⁴⁰ Bashwekula ensimiko okuzileka zije omu nyanja, bashwekula n'emigozi y'obulongolanyi, baheba n'ecitambara oku mpusi, banaciyerekeza ebwa cikombo . Cikwone barhimana olulimi lw'idaho, bacihukuza kwo obwarho: na eciranga ca hangarhana, n'okuyimanga, ⁴¹ cikwone ecishumiro cavunika n'ecihuso c'akalaba. ⁴² Abasirika bayunvikana okuniga abashwekwa, mpulyo harhakijira owabafuma omu kuyoga, ⁴³ Cikwone omulanzi, walilonzinze okuciza Paulo, ablahiza okuhikiriza omuhigo gwabo.Arhegeka abalimanyire okuyoga okucikweba burhangiriza omu misi okuja oku cirhwa, ⁴⁴ N'abandi okuciheba oku mpaho erhi oku birholo by'obwarho. Nantyo, boshi bahika oku cirhwa bwinja.