¹ Erhi rhuba rhwamacira, rhwa yunva buzinda okw'izino lyako kalwa ye Malta. ² Abantu beyomunda barhuyankirira bwinja bwenene: Bulya yakagi nia n'emboho yali, batwana muliro munji, barhuyegereza kuli gwo, rhweshi rhwa kaluka. ³ Paulo arhola irhulo ly'enshali z'amashami, alihira okuciko, lero omujoka arhalabuka mwo erh'ayunva idurhu, acizongeza oku kuboko kwage. ⁴ Erhi abantu b'eyo babona oyo mujoka anagana oku kuboko kwa Paulo, babwirana mpu: Okuli oyu muntu ali mwisi wa bantu. Bulya ciru ankaba anafumire enyanja, obushinganyanya bwa Nnamahanga burhamuzigiri mpu alame. ⁵ Cikwone agukumulira olya mujoka eciko, arhana yunvagya aha muluma ciru n'ehitya. ⁶ Abandi bakagi linda mpu babone oku arhunda, erhi oku afa honaho. Cikwone erhi batamala kasanzi karhali kanyi, erhi babona ntako anacibire, barhanya kundi, barhondera okuderha mpu ali muzimu. ⁷ Hofi n'aho, hali amashwa g'omurhambo w'ako kalwa izino lyage ye Publiyo, arhu yankirira bwinja, anarhuhandisa nsiku zisharhu. ⁸ Ishe wa Publiyo erhi agwishire, ali lwazire ishushira erhi n'omu kunguru gumugwerhe. Paulo agendi mulola, amu hunira, amuhira kwo amaboko afuma. ⁹ Erhi babona ntyo, abandi balwala bakuli ako kalwa nabo baisha, bana fuma. ¹⁰ Okwo kwarhuma barhukenga bwenene, n'erhi rhukola rhwagenda bakarhuha entanda rhwaciyikira omu lugenzi lwirhu. ¹¹ Erhi kugera myezi isharhu, rhwagenda omu bwarho bw'e Alegizandiriya, izino lyabwo " bazimu b'omu mahasha", empondo yahwa erhi n'oku kalwa obwo bwarho buba. ¹² Rhwahika omu cishagala c'e Sirakuse, rhwabera yo nsiku zisharhu. ¹³ Erhi rhurhenga eyo, rhwayisha rhwacihembula oku burhambi bw'enyanja nti rhuhike e Regiyo; erhi buca, empusi y'ekulyo yarhondera oku husa, n'oku lw'ensiku zibiri, rhwahika e Puteyoli. ¹⁴ Muli eco cishagala, rhwashimana mwo bene wirhu, barhuhuna mpu rhubere rhweshi nabo mugobe muguma. Ntyo kwo rhwajire mwo e Roma. ¹⁵ Abirhu ba Kristu b'e Roma bali bama manya oku rhwayisha, bayisha bali rhulingirira omu cambu c'e Apiyo n'omu nyumpa zisharhu z'ebigolo. Erhi Paulo anababona ntya, avuga Nnamahanga omunkwa, ashubi yunva obushiru. ¹⁷ Enyuma lya nsiku zisharhu, Paulo alalika abakulu b'aba yahudi b'e Roma mpu baje emwage. Ehi bashimanana ababwira erhi: Bene wirhu, ciru ankaba nta kubi najijire olubaga lwirhu erhi amorhere gaba shakuluza kurharhumaga nta shwekerwa e Yerusalemu, nana hanwa omu maboko g'abaroma. ¹⁸ Abo baroma bansambisa, balonza n'oku ndika, bulya nt'igwarhiro bambwine kwo lyankarhumire nayirhwa. ¹⁹ Cikwone abayahudi balahira, baderha mpu nfe. Ago mango nabona ngwasirwe okuhuna mpu olubanja lwani lukwaninwe lutwirwe oku lukiko lwa Mwami Kaisari. Cikwone kurhali kuderha nti nyandisire olubaga lw'emwirhu. ²⁰ Ebyo byo byarhumaga nahuna nti mmubone nnamushambaze, bulya ndi mw'obwonjogoro erhi olya olubaga lw'Abisiraeli lulangalira y'orhuma. ²¹ Bamubwira mpu: Rhurhabonaga amaruba ciru n'amaguma kurhenga e Yudeya gadesire ogwawe, na ntaye wa muli bene wirhu kurhenga eyo munda osagi yisha ali rhubwira emyanzi yawe kandi erhi mabi gawe. ²² Cikwone rhwanka lonzize okuyunva oku waderha ebi ogererize, bulya rhumanyire oku ntaho abantu barhalahira ogwo murhwe waci shwekire kwo. ²³ Boshi na Paulo batwa olusiku, n'erhi olo lusiku luhika, ago mango bayisha bantu banji, bamushimana omu cihando cage. kurhenga sezi kuhika bijingo erhi Paulo ali abahugula: Aba yigiriza ogw'obwami bwa Nnamahanga, alonza n'oku bayigiriza emyanzi ya Yesu nk'oku amarhegeko gaMusa gadesire n'ebitabu by'Abalebi. ²⁴ Baguma bayemera ebyo Paulo aderhaga n'abandi barha biyemeraga. ²⁵ Bulya erhi bakagenda barhana ciyunvini bone na nene, Paulo ababwira cinwa ciguma cone erhi: Muka mwimana arhahabaga galya mango abwiraga bashakuluza binyu omu kanwa k'omulebi Isaya! ²⁶ Bulya aderhaga erhi: Ja emunda lula lubaga luli, olubwire erhi: Okuyunva mwakayunva cikwone okumanya mpaga kwo, okulola mwakalola, cikwone okubona mpaga kwo: ²⁷ Bulya emirhima y'ololubaga yahusire; bafunisire amarhwiri gabo, bazibire amasu gabo garhaki bona, mpu lyo amarhwiri gabo garhaki yunva. mpu lyo emirhima yabo erhaki yunva bwinja na mpu lyo barhagi hindukira olunda ndi, mbafumye, kanwa ka Nnamahanga ako! ²⁸ Paulo ashubi derha erhi: mumanyage oku emyanzi edesire oku Nnamahanga aciza yarhumirwe abarhali Bayahudi: Bohe bayiyunva! ²⁹ Erhi Paulo ayusa okuderha ebyo binwa, Abayahudi baci gendera, bayisha bajisanya kadali bone na nene. ³⁰ Paulo abera omu nyumpa ali hanzire miaka ibiri yoshi. Akayankirira mwo ngasi abakagi yishi mulola boshi. ³¹ Akayigiriza okw'obwami bwa Nnamahanga, abuli kahanula n'oburhwali ebiyerekire Nyakasane Yesu Kristu buzira boba.