¹ Paulo, anacilola abagula, anaderha erhi: Bene wirhu, omu ntimanya nyinja mwo nalamire embere za Mungu kuhika ene... ² Omujinji mukulu Ananiya arhegeka abali hofi mpu bamu shurhire oku kanwa. ³ Ago mango Polo amubwira erhi: Nnamahanga aci kushurha, w'oyo otamire nka chogo cinja! Otamire mpu ontwire olubanja nk'okw'irhegekolidesire, na w'oyo ovunyire irhegeko okuderha mpu banshurhe! ⁴ Abali hofi naye bana mubwira erhi: Ci wa jacira omujinji mukulu wa Nnamahanga! ⁵ Na Paulo aderha erhi: Ntali manyire, bene wirhu, oku ali mujinji mukulu; bulya biya ndisirwe erhi: orhaderhaga kubi enyanya ly'omukulu w'olubaga lwawe. ⁶ Paulo, ali amanyire oku abali omw'ako kagombe bali mwo ab'Abasadukayo n'Abafarisayo, ayakuza emalanga gabo: bene wirhu, indi mufarisayo; eri enyanya ly'obulangalire n'obufuke bw'abafire co cirhumire ndwirhwe oku lubanja. ⁷ Erhi aba amaderha ebyo, akadali kazuka omu bafarisayo n'abasadukayo, n'ihano lyabo lya gabanuka. ⁸ Bulya Abasadukayo bakagi derha mpu nta bufuke bw'abafire, mpu arhanaba malaika ciru n'abazimu, n'obu Abafarisayo bohe bali yemire oku haba ebyo bibiri. ⁹ Balushisa okuyakuza, na haguma n'abashamuka b'omw'ihano ly'abafarisayo, bayimuka, barhangiza akadali, n'okuderha erhi: rhurha bwini bubi bwoshi bwoshi omwoyu muntu; nkaba muzimu erhi malaika wamu desagya. ¹⁰ Embaka zakula, ciru omukulu ayoboha mpu bakarhola Paulo cirumbu cirumbu, anacihonola abasirika bage mpu bamurhenze omu karhi gabo bamuheke omu nyumpa y'Abasirika. ¹¹ Obudufu bwalishimbulire, Nnamahanga abonekera Paulo, n'okumubwira erhi: ocihe omurhima; bulya, nkoku wanaderhaga ogwani omu Yerusalemu, bihunyire oguderhe n'omu Roma. ¹² Erhi buca, abayahudi bajira ihano, bacigasha mpu barhalyaaga, barhana nywaaga akantu koshi koshi barhana ciirha Paulo. ¹³ Abajiraga er'ihano bali makumi gani na kulusha. ¹⁴ Baja emw'abakulu b'abajinji n'emw'abagula bababwira mpu: Rhwacigashire bwenene, oku, rhurhalye rhurhanywe kuhika rhuyirhe Paulo. ¹⁵ Ninyu obwo, intya, shambalagi n'ihano likulu, mpu bamulerhage emalanga ginyu, mube nka kuno mulonzize oku yunva olubanja lwage bwinja bwinja; nirhu, embere ayegere, rhuli hofi okumuniga. ¹⁶ Cikwone mwihwa wa Paulo, erhi ayunva eyo mihigo, aja omu nyumpa y'abasirika aji manyisa Paulo. ¹⁷ Paulo ahamagala muguma omu bakulu b'abasirika, aderha erhi: Heka oyu mwana w'obusole emw'ecirongozi z'abasirika, bulya agwerhe ebi amubwira. ¹⁸ Oyo mukulu w'abasirika aheka oyo mwana, amuheka emunda kumanda mukulu ali, amubwira erhi: Omushwesi Paulo ana mpamagire, amana mbwira mpu nkulerhe guno musole, gugwerhe ebi gwa kubwira. ¹⁹ Komanda, agwarhira oyo musole oku kuboko, ana ciyegula aha burhambi, amudosa erhi: kurhi wambwira? ²⁰ Ashuza erhi: Abayahudi balaganine mpu bakuhuna olerhe Paulo sezi embere z'akagombe kakulu, babe nka balonzize okuyunva olubanja lwage bwinja bwinja. ²¹ Orhabayunve, bulya makumi gani na kulusha bo bamutulikire amatumu, mpu bacifulike lyo bamushamula, balahire oku barhalya barhana nywa kuhika bamuyirhe; nantya bakola bacirheganyize, balibalinda ishuzo lyawe lyone. ²² Omukulu w'abasirika erhi aba ama komereza oyo mwana w'omusole, oku arhabwiraga ndi ebyo amu derhezagya. ²³ Enyuma lyaho komanda ahamagala babiri omu basirika bage, ababwira erhi: Mulalire bwinja, kurhangira aha nsa zisharhu z'obudufu, na bantu makumi gali nda bagenda oku nfarasi na magana abiri balwi ba matumu, omu kuja e Kaizariya. ²⁴ Habe n'enfarasi z'okuheka Paulo, lyo ahekwa n'omurhula na murhamuhekaga erhali emwa kavurunera Felisi. ²⁵ Anayandika amaruba gadesire erhi: ²⁶ Claudiyo Lisiya alamusize omukengwa kavuruneri Felisi! ²⁷ Oyu mulume abayahudi bagwarhaga, bali ba muniga, naja yo nabasoda bani mpu rhuji muciza, erhi mmanya oku ali muburhwa w'e Roma. ²⁸ Nalilonzize mmanye bici bamushimbire, namulerha embere ly'akagombe kabo kakulu. ²⁹ Nabona oku bamutumuzize enyanya ly'amarhegeko g'abo bantu, cikwone nta bubi ajijire bu kwaninwe okunigwa erhi kushwekwa. ³⁰ Ene bambwira oku abayahudi bali bamujirira irhigi, na mana kurhumira ye, nana manyisa abakagi mushimba nti bakuhekere olubanja lwabo. ³¹ Abasirika, nkoku banali rhegesirwe, barhola Paulo muli obwo budufu bwonanene bamuheka e Antipatri. ³² Erhi bucha, baleka abali oku nsimba ziderhwa nfarasi bagenderere omu lugenzi haguma na Paulo, abasoda bali bagenzire n'amagulu bashubira ebwa nyumpa ya basoda. ³³ Erhi bahika e Kaisariya, balya bali oku nfarasi bahereza kavuruneri amaruba, bana muyereka Paulo. ³⁴ Kavuruneri, erhi amasoma galya maruba, adosa mpu omu cihugo chihi Paulo aba mwo. Erhi ayunva oku ali w'e Silisiya: ³⁵ Amubwira erhi: Naku yunvirhiza hano abakushimbire bayisha. Ana rhegeka oku bamuhebe omu mwa Herodi.