¹ Bene wirhu na balarha lekagi nywe akasha ba embere zinyu . ² Erhi bayunva aba bwira omu mayahudi, bahulika kulusha. Aderha erhi: ³ Nie ndi Muyahudi, naburhiragwa e Tarsi omu Silisia, cikwone mwa cira cishagala na lereregwa oku bibero bwa Gamalieli. Nayigirizbwa bwinjinja amarhegeko ga bashakuluza, na naba ntwali omu bya Nyamuzinda nk'okula mweshi muli ene. ⁴ Abashimba eyo la njira, na balibuzize kuhika oku bayirha, na shwekwa, abalume n'abakazi, ⁵ omukulu w'abadahwa b'ihano ly'abagula bo bahamirizi muhirire. Bo bampaga amaruba mpu ngahekere bene wirhu. Nanacija e damasi nti mbalerhe e Yerusalemu abali bashweke bahanwe. ⁶ Byanaciba ntyo! Erhi nkola ndi omu njira, na nkolaga mpu mpike e Damasi, erhi kaba kasirahira, obulangashane bwamanuka oku nkuba bwafunika bwanamolekera. ⁷ Nacishurha okw'idaho, na yunva izu lya nyakuza, erhi: Sauli, Sauli, bici wandibuliza? ⁸ Nani nashuza nti: We ndi, Yagirwa? Naye erhi: Nie Yesu w'e Nanzareti ogwerhe walibuza. ⁹ Abarhwali rhweshi babona obulangashane ci barha yunvagya izu ly'owakagi derha. ¹⁰ Naderha, nti: Yagirwa, bici najira? naye Nyakasane ashuza, erhi: Yimanga, oj'e Damasi, bakubwira yo ebi oshinganine okujira byoshi ¹¹ Cikwone, bulya ntacibonaga erhi bulangashane bw'obo bumoleke burhuma, ababirhu bangwarhira oku kuboko nahika e Damasi. ¹² Lero mulume muguma, izino lyage Anania, mutu oshimba bwinja amarhegeko na mukengwa omu Bayahudi b'e Damasi boshi, ¹³ ayishi ntagula, n'erhi aba ama nyegera, ambwira, erhi: << Sauli mwene wirhu, erhi: zibuka amasu >>. Honahalya na mubona. ¹⁴ Ashubirira. Erhi: '' Nyamuzinda wa balarha akulondwire mpu omanye obulonza bwage, obone Omushinganyanya, onayunve oluderho lwa akanwa kage'' ¹⁵ bulya wamubera muhamirizi w'ebi wabwine n'ebi wanyunvirhe, omu Bantu boshi. ¹⁶ Na buno, bici walinda? Yimuka, obatizibwe, na hano wamashenga izino lyage, okulirwe ebyaha byawe. ¹⁷ Erhi ngaluka e Yerusalemu na naba ndina haramya omu kanyamuzinda, nayaganwa. ¹⁸ Na bona Nyakasane, ambwira, erhi: << Okanye, orhenge e Yerusalemu, bulya barhayemere obuhamirizi bwani kuli nie >>. ¹⁹ Nani nashuza, nti: << Yagirwa, bamanyire oku nakagigera omu bishagala naja nashweka n'okushurha e mpimbo abakuyemera boshi; ²⁰ n'erhi babulaga omuko gw'omuhamirizi wawe Stefano, nani honali nayemara nti bamuyirhe, Na nakalanga e myambalo y'abamuyirhaga >>. ²¹ Anacimbwira, erhi: << Genda, bulya na kurhuma kuli omu mashanja >>. ²² Kuli ako kanwa, balimurhezire amarhwiri. Ci erhi bayunva okwo, bayama, mpu: << Omuntu wabene oyo omurhenze e n'igulu; bulya arhakwanini alame. ²³ Bajira e cihogero cinene, bakajugujira ebishuli byabo bana kweba akatulo enyanya. ²⁴ Omukulu w'abasirika anacirhegaka mpu balerhe Paulo omu lugerero lwabo, aderha mpu bamudose n'emikoba lyo bamanya eci rhumire bayama ntyo. ²⁵ Ci erhi baba bamamushweka n'emikoba mpu Bamushurhage, Paulo abwira omurhegesi w'abasirika, erhi: Ewe ndi wamuhaga obwemere bw'okushurha omu Roma emikoba, buzira kumutwira olubanja? ²⁶ Erhi ayunva ntyo, oyo murhegesi w'omurhwe gw'abasirika agendi bwira omukulu w'abasirika, erhi: Gurhi wajira? C'oyo muntu amaba mu Roma! ²⁷ Omukulu w'abasirika anaciyisha, agendi bwira Paulo, erhi: Mubwira bwinja! Koli mu Roma? Naye, erhi: Neci . ²⁸ Omukulu w'abasirika ashuza, niehe obwo buyemere bw'okuba mu Roma na bugulaga nfaraga yinji. Paulo ashuza: Niehe nakuburhanagwa . ²⁹ Ago mango balya balonzagya oku mudosa n'emikoba, bamuyaka mashi, ciru n'olya mukulu w'abasirika ayoboha erhi amanya oku oyo analishwesire ali mu Roma. ³⁰ Erhi buca, alonza okumanya kwinja eby'Abayahudi bamulegeraga, amushwekula, anarhageka abadahwa bakulu n'akagombe loshi mpu bashubuzanye. Alerha Paulo amuyimanza embere zage.