¹ Erhi rhusengerukana, rhwaja omu mashuwa, rhwalikulira e Kosi; erhi buca bahika e Rodo, erhi rhurhenga eyo munda, rhwaja e Patara. ² Rhwabona yo amashuwa gajaga e Fenisiya; ago mango rhwajaga mwo, rhwagenda. ³ Rhwahika hofi n'e Kipro, rhwanka yilangirage, rhwagera ekulembe kw'ako kalwa erhi rhunali omu mashuwa kuyerekera e Siriya. Rhwahika e Tiro, yo amashuwa garhulire emizigo yali mwo. ⁴ Eyo munda rhwabona yo abemezi, rhwabera rhweshi nabo mugobe muguma. Erhi Mûka Mwimana abamanyisa, babwira Polo mbu arhajaga omu cishagal c'e Yerusalemu. ⁵ Cikwone erhi rhuyusa ogwo mugobe rhwajijire haguma nabo, rhwagenderera omu lugenzi lwirhu, boshi barhulusa, haguma na bakabo n'abana babo, barhuhisa embuga ly'ecishagala. Rhwafukama oku burhambi bw'enyanja, rhwshenga. ⁶ Erhi rhuba rhwama sengerukana, rhwashonera omu mashuwa,nabo bashubirwa emwabo. ⁷ Rhwayusa olugenzi lwirhu lw'omu nyanja, rhwarhenga e Tiro rhwahika e Petolemayi, rhwalamusa yo bene wirhu, rhwanabera rhweshi nabo lusiku luguma. ⁸ Erhi buca, rhwagenderera, rhwahika e Kaisariya. Eyo munda, rhwaja omu mwa Filipo w'omujabugo w'emyanzi y'akalembe, rhwahanda aha mwage. Ali muguma wa muli balya bantu nda bacishogagwa e Yerusalemu. ⁹ Ali agwerhe banyere bani, bakagi leba emyanzi ya Nnamahanga. ¹⁰ Erhi rhushinga yo nsiku nyinji, mulebi muguma arhenga e Yudea ayisha, izino lyage ye Agabo. ¹¹ Ayisha emunda rhwali, arhola omukaba gwa Polo aci ziriringa amagulu n'amaboko, abul'iderha erhi: Yunvi ebi Muka Mwimana adesire,oku nn'ogu mukaba, ntya kwo abayahudi bamushwekera e Yerusalemu, enyuma lyaho, bamuhereza abarhali bayahudi. ¹² Erhi rhuba rhwamayunva ntyo, rhwe n'abe Kaisariya rhwakomereza Polo nti amanye akaja e Yerusalemu. ¹³ Ci kwone ashuza erhi: Bici birhumire muli mwalaka munalonzize mpu ntwike omurhima omu nda. Nchi rheganyize niono, arhali kushweka kwone , cikwone n'okufira yo erhi Nyakasane Ye: su orhuma. ¹⁴ Bulya rhurhahashaga okuyemeza Polo, rhwamuleka, rhwaderha mpu: Nyakasane yene ajire nk'oku analonzize. ¹⁵ Erhi kugera nsikunyi rhuli eyomunda, rhwaci rheganya, rhwaja e Yerusalemu. ¹⁶ Abaganda b'e Kaisariya barhulusa, barhuheka emwa muntu muguma mpu ye warhuhandisa, izino lyage y'e Munasoni w'e Kipro, ali mwemezi kurhenga mira. ¹⁷ Erhi ruhika e Yerusalemu, bene wirhu barhu yankirira n'obushagaluke. ¹⁸ Erhi buca, rhwaja emwa Yakobo, rhweshi na Polo, yo abagula boshi b'omu murhwe gw'Abakristu bali bashimanine. ¹⁹ Polo alamusa ana barhondereza ebi Nnamahanga ajijire byoshi oku mukolo gwage omu kagarhi k'abarhali Bayahudi. ²⁰ Erhi baba bamayunva ebi adesire, bakuza Nnamahanga. Buzinda, babwira Polo, mpu: Mwene wirhu obwinage oku abayahudi bayemire bali bihumbi, na boshi bakulikire amarhegeko bwenene. ²¹ Bbaba bwiaire oku ona yigirize abayahudi boshi bali omu zindi mbaga mpu baleke okushimba amarhegeko ga Musa, mpu wanababwira oku baleke okuka kembula abana babo, mpu barhana shimbaga obworhere bw'abayahudi. ²² Kurhi rhwajira? Bulya kwobinali, bamanya oku wayishire. ²³ Okwaninwe ojire oku rhwakubwira. Hano rhugwerhe ho bantu bani bahanire eciragane. ²⁴ Obaheke, muje mweshi nabo oku burherekere bwa Nnamahanga bw'okushhukulwa, ohane ebi bankahanyire, lyo bahasha oku kungulwa. Ntyo kwo abantu boshi bamanya mwo okw'ebyo bakuderheraga birhali by'okuli, n'oku nawe kuyunva oyunva okw'amarhegeko ga Musa gadesire. ²⁵ Balya barhali bayahudi bayemeraga, rhwabarhumire amaruba g'oku babwira oku barhagwasirwi okulya enyama bama rherekera mwo ennama, erhi mwamba, erhi nyama z'ecintu cifulunginwe n'omuko, bagwasirwe baleke n'okugona. ²⁶ Ago mango POlo aheka balya bantu oku banali; n'erhi buca, boshi baja omu ka Nyamuzinda, baj'irherekera banashukulwa. Okuhandi, aderha mwo mangaci ensiku z'okushukulwa zahwa, kwo kuderha oku mangaci ngasi muguma anankahirwe enterekero. ²⁷ Erhi nsiku nda zikola mpu zihwe, Abayahudi b'omu cihugo c'e Aziya babona Polo omu ka Nyamuzinda kabo. Bashumika abantu boshi, bamugwarha. ²⁸ Babul'iyakuza mpu: Mashi Bisraeli, murhabale! Olya muntu waja angera gera ngasi hoshi ono. Omu nyigirizo zage agayire olubaga lw'Israeli lwoshi n'amarhegeko ga Musa n'aka ka Nyamuzinda kirhu. Na ciru y'ono wamahira Abagiriki muli aka ka Nyamuzinda, n'okuziza aha hantu himana! ²⁹ Baderhaga ntyo bulya barhanzir'ibona Trofimo w'e Efeso bo na Polo omu cishagala: bacikebwa mpu baka nkaba Polo anamudwirhe omu Ka Nyamuzinnda. ³⁰ Akavulindi kalumira omu cishagala coshi n'olubaga lwakarhenga ngasi hoshi lui bulibirha. Bagwarha POlo, bamu kululira emuhanda gw'aka Nyamuzinda, ho n'aho, bayigala enyunvi. ³¹ Erhi bakola bali balonza okumuyirha omukulu w'engabo y'abarika b'Abaroma bamurhomya omwanzi oku akavulindi kali omu Yerusalemu mwoshi. ³² Ho n'aho, oshokolana abakulu b'abasirika n'abasirika, balibirhira emunda abantu bali. Erhi babona oyo murhambo w'abasirika, baleka okushurha Polo. ³³ Ago mango oyo murhambo wabo aja ho Polo, amugwarha, aderha mpu bamushweke na madagule abiri, abulidosa erhi: Oyu muntu ye nndi na kurhi anajijire? ³⁴ Cikwone, omu bantu mwarhenga abayakuza kwabo n'abandi kwabo. Bulya ecirongozi c'abasirika arhahashaga okuyunva ciru n'ehitya ebi bali baderha erhi kavulindi karhuma, lero arhegeka mpu baheke Polo omu nyumpa y'Abasirika. ³⁵ Erhi bamuhisa oku rhushoezo, abasirika bamu barhula erhi bukali bw'olubaga burhuma. ³⁶ Bulya abantu boshi bali babakulikire mpu babanyage ye n'okuka ayakuza mpu: Ayirhwe! ³⁷ Bulya bali bakolaga mpu bahire Polo omu nyumpa, abwira ecirongozi c'abasirika erhi: Kawanyemerera nderhe kanwa kaguma? Ecirongozi camudosa erhi: K'oyishi ecigiriki? ³⁸ K'arhali w'olya mu Mumisri ozindi zusa obugoma wanaheka bishungu bihumbi bini by'abantu omu mpinga? ³⁹ Naye Polo ashuza erhi: Ndi Muyahudi, naburhiragwa e Tarso Silisiya, mwana-burhwa w'omu cishagala cirha habikini omw'igulu lyoshi. Muhanyi oyemerere nshambalire olubaga. ⁴⁰ Eco cirongozi c'abasirika camuyemerera. Ago mango Polo ayimanga oku rhushonezo, ahulisa olubaga n'okuboko. Erhi boshi bahwekera, Polo abarhondereza omu luderho lw'eciharamiya erhi: