¹ Erhi entambala zihwa, paulo abugana abemezi abaha n'ihano ly'oku bakomeza, na buzinda aba sengeruka aja e Makedoniya. ² Atwikanya muli olo lunda n'okuja komeza abemezi, omu kuja ayigiriza kanji kanji. Enyuma lyaho, aja e Bugiriki. ³ Abera yo myezi isharhu. Erhi akola mpu ajage omu bwarho bw'okuja e Siriya, amanya oku Abayahudi bamujirire idole. Ago mango ahiga oku akola agaluka agerere e Makedoniya. ⁴ Sopateri mwene Piro w'e Beroya amulusa n'Aristariko na Sekundo, bantu b'e Tesaloniki; Gayo w'e Derbe, na Timoteyo, na Tukiko na Trofimo, b'omu cihugo c'e Aziya. ⁵ Abo bantu bashokola, bajirhulindira e Trowa. ⁶ N'irhu rhwene rhwaja omu bwarho aha Filipi enyuma ly'olusiku lukulu lw'e migati erhali mo ngezo; n'enyuma lya nsiku irhanu, rhwabashimana e Trowa rhwabera yo mugobe muguma. ⁷ Olwa kalindarhu bijingo, rhwali shimanine nti rhulye ebilyo by'ecibo cimana, na Paulo abwira endeko oku agwasirwe agende hano buca, mpu bulya agendera oku yigiriza kuhika aha kagarhi k'obudufu. ⁸ Eco cumpa rhwali shimanine mwo mwali matara manji omw'igorofi. ⁹ Mwana muguma wa busole izino lyage ye Eutiko, alitamire omu kabonezo. Ahunira bwenene bwenene ensa Paulo akagi Yigiriza enyigirizo ndiri. Elyo liro lyarhuma ahona emalunga omu igorofi lya kasharhu, acirhimba okw'idaho. Mpu bazuse, bashingana anafire. ¹⁰ Paulo ayandagala, amuyunamira kwo, amu bagalira, aderha erhi: Murha kangalalaga emirhima, azine! ¹¹ Buzinda, aciri shonera omu igorofi, abega omugati, agulya. Aciri yusa akasanzi karhali kanyi ali aderha, kuhika izuba lyalinda lishoshoka, agenda. ¹² Bayisha badwirhe olya mwana w'obusole erhi akola ali mutaraga, boshi bashubira omurhima omu nda. ¹³ Rhwashokola, rhwaja omu bwarho, bwarhuheka e Asosi, yo rhwali rhugwasirwe oku rholera Paulo n'obwarho. Ntyo kwo ali atwire, bulya alilonzize okuja yo n'amagulu. ¹⁴ Erhi arhushimana e Asosi, rhwa murhola n'obwarho, rhwaja e Mitilene. ¹⁵ Rhwashubi rhenga eyo munda n'obwarho, n'erhi buca rhwahika ah'ishiriza ly'e Kiyo. N'erhi bushubi ca, rhwahika e Samosi, n'erhi buciri ca rhwahika e Miletu. ¹⁶ Bulya Paulo ali ahizire okugerera ishiriza ly'e Efeso buzira kuyimanga yo lyo arhagi hereza akasanzi omu cihugo c'e Asiya, ali oku magulu enyanya mpu lyo alola erhi ahika e Yerusalemu embere ly'olusiku lwa Pentekoste bika hashikana. ¹⁷ Erhi Paulo ali e Mireto arhuma entumwa e Efeso mpu bamu rhumire abagula b'omurhwe gw'aba kiristu. ¹⁸ Erhi bamuhika ho, ababwira erhi: Mumanyire oku nayorhaga amango goshi nali haguma na ninyu, kurhenga olusiku lurhangiriza najaga omu cihugo c'e Aziya. ¹⁹ Nakolire Nyakasane n'obwirhohye bwoshi, haguma n'emirenge, n'omu bizibu nabonaga erhi oku aba Yahudi bakagi ntigirana kurhuma. ²⁰ Mumanyire oku nta kantu namufulikaga kalya kagwasirwe oku murhabala: Namu bwizire byoshi n'oku muyigiriza emalanga g'abantu boshi n'omu mwa binywe. ²¹ Nahamagire abayahudi n'abarhali bayahudi nti bagokole ebyaha, bahindukire Nnamahanga n'oku yemera Nyakasane wirhu Yesu. ²² Nkolaga naja e Yerusalemu nk'oku Muka Mwimana ansezize mpu njire. Ntamanyiri ebya nyishira yo. ²³ Mmanyire kwone oku Muka Mwimana ammanyikize omu ngasi chishagala ok'umugozi n'ebizibu biri byaninga. ²⁴ Cikwone akaba kufa nafa, nfe, chasiga erhi mpisire oku buzinda bwobu rhumisi bwani, n'okuyusa omukolo Nyakasane Yesu Kristu ampaga: Okuderha n'obwalagale emyanzi y'akalembe adesire enyanya z'olukogo lwa Nnamahanga. ²⁵ Namugezire mwo mweshi, omu kuja nayigiriza obwami bwa Nnamahanga, cikwone buno nkola mmanyire oku ntaye waci mbona. ²⁶ Co cirhumire mmubwizire ene nti nka muguma muli mwe ankahera, nta mutumule. ²⁷ Bulya Ngasi oku Nnamahanga arheganyize kwoshi namubwizire kwo, buzira kumufulika kantu. ²⁸ Mucilangage mwene n'okulanga obuso Muka Mwimana amuyabuzagya mpu mube bangere babwo. Muyabule omurhwe gw'aba Kristu ba Nnamahanga bwinja, abo acungulaga erhi kufa kw'omugala kurhuma. ²⁹ Mmanyire oku hano mba nnamagenda, abantu bali nka mirunga midarhi bamuja mwo, n'obuso barha bubabalire. ³⁰ Na ciru mwene mwarhenga mwo aba nywerha, bashumike n'abemezi mpu babakulikire. ³¹ Kuziga mubage masu muna kengere oku muli erya myaka isharhu, budufu n'omushi, ntajiraga amango ntalaka nkola namubwira. ³² Mmuhebirage omu maboko ga Nnamahanga, n'emyanzi edesire ogw'olukogo lwani emulange. Agwerhe obuhashe bw'oku muzibuhya n'okumushoboza ebirugu abikire abantu bage boshi. ³³ Ntacifinjaga olufaranga erhi noro, erhi myambalo yandi. ³⁴ Mwene mumanyire oku erhi rhwankabire rhulagirire oku kantu, aga maboko gani go ganakagi rhuhisa kuli ko rhweshi n'abakagi ndusa. ³⁵ Omu ngasi kantu namuyeresire oku kukwanine okukola ntyo lyo mubona oku mwarhabala mwo abakemyi, omuku kengera birya binwa Nyakasane Yesu aderhaga yene erhi: Liri iragi okuhana kulusha okuhabwa. ³⁶ Erhi Paulo aba amaderha ntyo, afukama haguma nabo oku banali boshi, ashenga. ³⁷ Boshi balaka, bahubira Paulo, baka mununugurha okumu sengeruka. ³⁸ Ecifufu cabagwarha bulya ali ama babwira oku barhakaci mubona bundi. Buzinda, bamulusa kuhika aha bwarho.