¹ Erhi bababamahika eyo Mufipoli n'e Apolone bahika e Tesalonika yoyali n'ecishagala c'Abayahudi. ² Na Paulo, nk'oku yalinkomedu yage, aja omu bali, bakashambala oku myanzi y'amandiko migobe isharhu. ³ Abafululira n'oku bamanyisa oku byalikwanine Kristo alibuzibwe, n'okufuk'omubafu. " N'okuyu Yezu ndinamubwira emyanzi yage ye Kristo". ⁴ Baguma mulibo bayemera bakulikira Paulo bona Sila; n'Abayunani balikenzire Nnamahanga, banji bwenene, n'abakazi babongerire barhali banyi. ⁵ N'Abayahudi bagwarhwa n'omutulo, bacirhola mw'abantu b'obushabusha barhagwerhi irenge linja nabo banajir'embuganano, bajira ecihogero (lujongo) omu lugo, bagendera ab'omunyumpa ya Yasoni balonza mpu babaheke embere z'abantu baguma bakulu b'omu lugo, " bajir'olubi baderha erhi, aba bantu bahindul'igulu bahisire enomwirhu nayo. ⁷ Na Yasoni abayegerezize na boshi bajajir'ebijiro biri eburhambi bw'irhegeko lya Kayizari, bajabaderh'oku hali owundi mwami oderhwa Yezu." ⁸ Ebyo binwa byahira akashaba omu lubaga n'omu bakulu erhi babiyunva. ⁹ nerbi Yasoni n'abandi, ba babalyula babalika. ¹⁰ Na honaho abo Bene wirhu baheka Paulo na Sila e Beroya. Nerhi bahika eyo baja omu cishagala ch' Abayahudi. ¹¹ Cikwone abo bohe Bali binja kulusha Abatesanika bayankiririra oluderho lwa Nnamahanga buzira karhinda, ngasi lusiku bakagijira obusagasi omu mandiko mpu balole bwinja erhi kwobinali. ¹² Lero bantu banji bayemera mulibo n'omu Bagiriki abakazi balengerire n'abalume barhali banji. ¹³ Cikwone erhi Abayahudi be Tesalonika bamany'emyanzi oku Paulo ajiire ayigiriz'emyanzi Eberoya nayo bayija nayo, okujibashandabanya n'okulerha akavulindi omu lubaga. ¹⁴ Bwonobwo, balya benewirhu baheka Paulo acijira ishiriza, cikwoki Sila bone Timoteo basigala eyo. ¹⁵ Cikwone balya balilusize Paulo bamuheka e Athène; nabo erhi bamanyisibwa okuhekera Sila na Timoteo emyanzi oku barhayorha okukulikira Paulo, bacigendera. ¹⁶ Paulo erhi akola ali abalindira e Athène n'okubona gurhi okwolugo lwayunjwire nshushano omurhima gwage gwagaya bwenene omu ndalala zage. ¹⁷ Lero omucishagala ashambala bone Abayahudi na balikenzire Nnamahanga na balya bakagishimanana boshi naye omu cibuye ngasi lusiku. ¹⁸ Na baguma b'omuba Epikureo na ba Estoiko, b'obumanye barhimanana naye abandi baderha, mpu ali nkawajalumiza myanzi ya bazimu b'ihanga, bulya akagiyigiriz'emyanzi ya Yezu n'obufuke. ¹⁹ Bamugwarha, bamulerha kuhika e Areopago, baderha erhi: Ka rhwana manya kuli kuderha kuci ezi nyigirizo mpyahya waja wayigiriza? ²⁰ Bulya wamalerha emyanzi yindiyindi, byanaba bici. ²¹ N'obwo abantu b'e Athene boshi n'ab'emahugo balama e Athene boshi omukasanzi kabo bakagiderha e myanzi. ²² Paulo, anaciyimanga omu kagarhi k'e Areopage, aderha erhi: Bantu b'e Athene, mbwine oku njira zoshi oku muli bantu b'idini kulusha. ²³ Bulya, omu kugera omu lugo lwinyu, omu kusinza murherekera, enshushano mucikumba, n'ahantu hoku rhererekera n'eyi miandiko: Murhana yishi Mungu arhamanyikini! ²⁴ Mungu walemaga empingu n'ebimuba byoshi, ye nakuno w'empingu n'igulu, arhatamala omu nyumpa za yubakagwa n'okuboko kw'omuntu. ²⁵ Arha kolerwa n'amaboko g'abantu, nkoku ntaco alonza, ye hana obuzine bwa byoshi akantu koshi koshi, bulya yoha abantu boshi obuzine n'omuka, n'ebintu byoshi. ²⁶ Ajira oku abantu boshi, balya barhengaga muko muguma, balame oku igulu, ajijire ahantu habo n'embibi zabo. ²⁷ Alonzize abantu balonze Nnahamwirhu, bana ciseze oku mulongereza nk'aba mamarha, n'obwo arhali hali na ngasi muguma wirhu. ²⁸ Bulya muli ye rhugwerhe obuzine, n'okugenda, n'obugumaguma, kwo badesire baguma b'omu badesi binyu: Bulya rhuli bûko bwage. ²⁹ Bulya kuba rhuli b'omu bûko bwa Nnahamwirhu rhurha kwanini rhugerereze oku Nnahamwirhu arhali nka n'or. erhi cuma, erhi ibuye ly'oku binjwa erhi obugerereze bw'abantu. ³⁰ Mungu buzira kushimba amango g'obuhwinja, ayalagalize lero oku bantu b'amashanja goshi, oku ciyunjuza. ³¹ Bulya ajijire amango acitwira lero ben'igulu nk'oku kushinganine n'oyo mulume alondolaga mira, n'enyanya lyage ahire abantu boshi obwemere, omu kumufula omu karhi k'abafu. ³² Erhi bayunva aderha obufuke bw'abafire, baguma basheka, n'abani baderha erhi: rhwayishi kuyunva okweyo myanzi gandi mango. ³³ Ntyo Paolo anaci barhenga mwo. ³⁴ Baguma muli bo baci shwekera kuli ye bayemera, muli bo ali Dionuso mutu we areopago, n'omukazi izino lyage Damari n'abandi bantu haguma nabo.