¹ Enyuma ly'ebyo, Paulo arhenga e Atene, aja eKorinto. ² Ashimana yo Muyahudi muguma izino lyage ye Akila, aburhiragwa omu cihugo c'e Ponto: Acizindigi rhenga e Italiya bona mukage Prisila, bulya Kaisari Klaudiyo ali arhegesire mpu abayahudi boshi barhenge e Roma. Paulo agendi agendi balola, ³ Nabulya ali agwerhe mukolo muguma nabo, aber'emwabo, baka kolera haguma. ⁴ Omu ngasi lusiku lwaku rhamuka Paulo akagi hagisa abayahudi omu Sinagogi yabo. Ako kanwa kali kakulonza okuyemeza abayahudi n'aba giriki. ⁵ Erhi Sila na Timoteo barhenga e Makedonia Paulo acihana ngasi mango okuyigiriza abayahudi oku Yesu ye Kristu. ⁶ Cikwone erhi abayahudi bamulahira n'oku mujacira, aba gukumulira akatulo k'enyambalo yage, ababwira erhi: Mukahera, mwene biri kwo. Nta mutumule. kurheng'ene nkolaga nacijira emw'abarhali bayahudi. ⁷ Ago mango arhenga eyo munda n'okuja emwa muntu muguma, izino lyage ye Titiusi Yusto, akagi haramya Nnamahanga, oyu ayubakaga aha burhambi bw'esinagogi. ⁸ Krispo, mukulu w'esinagogi, ayemera Nyakasane n'aba hamwage boshi. Ba Korinto banji bakagi yunvirhiza Paulo nabo bayemera bana batizibwa. ⁹ Budufu buguma Paulo abonekerwa. Nyakasane amubwira erhi: Orha yobohaga, cikwone ogendekere okuderha, orha hulikaga. ¹⁰ Bulya ndi haguma na nawe. Ntaye wahasha okukugwarha mpu akujirire ebibi, bulya ngwerhe bantu banji muli eci cishagala. ¹¹ Paulo aber'ekorinto mwaka na myezi ndarhu; ayigiriza yo abantu akanwa ka Nnamahanga. ¹² Amango Galio ali murhegesi Muroma w'e Akaya, abayahudi bajirira Paulo idole. Amuhira ekagombe, baderha mpu: Oyu muntu ali alonza okushumika abantu mpu baka haramya oku amarhegeko garhadesiri. ¹⁴ Erhi Paulo akolaga mpu aderhe, Galiyo abwira abayahudi erhi: Acibaga irhegeko ly'abarhegesi anavunire, erhi nka hali cibi cinene ajijire, okunali nanka muhire amango g'okumu yunvirhiza. ¹⁵ Ci obu kamaba kadali kabinwa n'amazino, n'amarhegeko ginyu, mwene murhahabe! olwo niehe ntalonza oku lutwa. ¹⁶ Ana bahinva e kagombe. ¹⁷ Ago mango boshi bagwarha Sositeni, mukulu w'esinagogi, barhondera okumushurhira e kagombe. Ci kwone ebyo birhayobohagya Galiyo. ¹⁸ Paulo ashubi bera e Korinto nsiku zirhali nyi. Enyuma lyaho asiga bene wabo, aja omu bwarho bw'okuja e Siriya bona Prisila na Akila. Embere agende, arhangi momerwa enviri e Kenkreya, bulya ali erhi ahire Nnamahanga eciragane. ¹⁹ Bahika e Efeso, Paulo asiga yo Akila na Prisila. Aja omu sinagogi abajikiza mwo Kadali. ²⁰ Bamuhuna mpu abere eyo mango garhali manyi, cikwone arhalonzagya kwo. ²¹ Erhi akola aba sengeruka, aderha erhi: Nacishubira eno, Nnamahanga akalonza. Agenda omu bwarho aja e Efeso. ²² Erhi obwarho bumu rhulira e Kaisariya, aja e Yerusalemu mpu ajilamusa omurhwe gw'abakristu bayo, aja e Antyokiya. ²³ Erhi ayusa yo nsiku, ashubi genda. Atwikanya omu cihugo c'e Galatiya n'e Furugiya oku liguma, aja akomeza abaganda boshi. ²⁴ Muyahudi muguma izino lyage ye Apolo, aburhiragwa e Alegizandiriya, ahika e Efeso. ali muntu oyishi derha, anali manyire bwenene amandiko. ²⁵ Ali ayigirizibwe enjira ya Nyakasane, ali n'obushiru bwenene. akagi hanula n'oku yigiriza okunali ebi yerekire Yesu. Cikwone arhali manyire oburhali bubatizo bwa Yohana bwone. ²⁶ Arhondera okuderha n'oburhwali omu Sinagogi. Erhi Prisila na Akila bamuyunva, bamuheka hagumanabo, n'okumu hugulira bwenene okunali enjira ya Nnamahanga. ²⁷ Enyuma ly'aho, Apolo alonza okuja e Akaya, bene wabo bamuhira omurhima omu nda bayandikira abemezi ba muli eco cihugo amaruba mpu bamu yankirire bwinja. Erhi ahika eyo munda, akarhabala bwenene balya bakagi iyemera oku lukogo lwa Nnamahanga. ²⁸ Ayeresa Abayahudi omu nyigirizo zage oku bahabusire, abayeresa amandiko okw'okunali Yesu ye Masiya.