¹ Ahika e Derbe n'e Listra, Yali eyo mwemezi muguma iziino lyage ye Timoteo, mugala wa mukazi muguma Muyahudi ali mwemezi n'îshe ali Mugriki. ² Bene wabo b'e Listra na b'Ikoniya bakaagi muderha bwinja bwenene. ³ Paulo alonza mpu bagende bonaye amurhola amukara bobulonza bwa Bayahudi baadi eyo munda, bulya boshi balimanyire oku îshe ali Mugriki. ⁴ Omu kugera omu ngo, babwiira benewabo ebi byatwirwe n'entumwa, n'Abagula b'e Yerusalemu. ⁵ Amakanisa gazibuha omu bwemeere, gakayushuka lusiku oku lundi. ⁶ Bahanzibwa na Muuka Mwimana okuyigiriza omwanzi gwa Nnamahanga omu Aziya, bayicirira Efrigiya n'omu cihugo c'egalilaya. ⁷ Erhi bahika hofi n'Emisiya, balonza okuja omu Bitaniya; Cikwone Mûka gwa Yezu arhabayemereraga. ⁸ Batwikanya lero omu Misiya, na banahonokera e Trowa. ⁹ Erhi kuba, budufu, Paulo abonekerwa; abona omuntu w'e Makedoniya ayiimanzire, anamunyiga: ogerere e Makedoniya, orhurhabale. ¹⁰ Buzinda Paulo amabonekerwa, rhwalonza okuja e Makedoniya, rhwali rhumanyiirire bwinja oku Nnahamwirhu arhuhamagiire mpu rhubahakere omwanzi g'omurhula. ¹¹ Rhwarhenga e Trowa, rhwaja oku iju (kalwa) ly'e Samotrake, na erhi kuba sezi rhwahika e Neyapoli. ¹² Erhi rhuyirhenga rhwaja e Filipi, lo lugo lurhanza lw'e Disistriki y'e Makedoniya, lwali lurhambwiirwe, Rhwabeera omo nsiku zirhali nyi omulo lugo. ¹³ Omu lusiku luzirha, rhwaja oku burhambi, hofi n'olwishi, e munda rhwakagigeereza nti hohali hokuhuniira. Rhwatamala, na rhwanabwira abakazi balicimaniine aho. ¹⁴ Muguma muli abo bakazi, izino lyage ye Lidiya, arhengaga omu lugo lw'e Tiyatira, ali mukazi akengaga Nnamahanga, anakagiba wa kuyunva, Nnahamwirhu amuyigula omurhima, g'okuyunvirhiza ebi akagi derha Paulo. ¹⁵ Erhi ama batizibwa, na abaha mwage, arhuyinginga: Erhi mwangaderha mwikubagirwa wa Nnahamwirhu, mudahage omu mwani, mutamale, arhuseeza mpu rhurhalahire. ¹⁶ Erhi rhukola rhwajaho rhwahunira, munyere muguma aliko omuzimu mubii w'obulebi, oyo, omukuleba, akagilerera banawabo birugu binji ayisha arhushimana. ¹⁷ Arhushimbulira, Paulo na niirhuaja ayama: erhi aba bantu bali bakozi ba Nnamahanga w'enyanya bweneene, baja bamuyigiriza e njira yo kuchiza. ¹⁸ Ajira ebyo nsiku nyinji. Paulo, erhi arhama ahindamuka, abwira olya muzimu: Nkubwizire, okw'îzino lya Yezu Muchiza omurhenge kw'oyu mukazi, honaho amurhenga kwo. ¹⁹ Bene wabo oyo munyere, babona oku obulangalire bwabo burhacihali, bagwaarha Paulo bona Sila babakululira aha kagombe e malanga g'abakulu. ²⁰ Babahekera bambali ba Leeta, baderha mpu: Aba bantu bali balerha okurhushabira olugo. ²¹ Bali Bayahudi, banali bayigiriza amoorhere garharhuyemeriri okushimba amarhegeko girhu erhi ku gajira, rhwerhuli Baroma. ²² Olubaga lwayimuka lyabayanduka kwo, Abantu ba Leeta, basharhagula emishangi yabo, barhegeka mpu babashurhe emikoba. ²³ Buzinda bwo kubashurha bweneene, babakweeba omu mpamikwa, barhenge kw'omuzimu mpu abalange bwinjinja. ²⁴ Omulanzi, amahabwa ery'irhegeko, abakweba omu mpamikwa y'endalaala, babashweka amagulu. ²⁵ Hofi e karhi k'obudufu, Paulo na Sila bahuna banayimba; bacikumba babayunvirhiza. ²⁶ Honaho hayisha omusisi munene gw'ichihugo, gwa dundaganya enyumpa yooshi; Honaho, enyunvi zoshi zayiguka, n'emigozi yalishwesire abashwekwa booshi yashweguka. ²⁷ Omulanzi erhi atuluka, erhi, abona enyunvi z'empamikwa zoshi ziyigusire, ayomola engorho yaage alonza okuja ciniga, ayama mpu abashwekwa batorosire. ²⁸ Cikwone Paulo ahamagala n'izu linene: Omanye orhaciyagaze, rhweshi morhuli muno. ²⁹ Lero olya mulanzi, ahuuna akamole, acirhumbika omu cumpa, erhi anali agerha mw'omusisi acirhimba aha magulu ga Paulo na ga Sila, ³⁰ buzinda abaheka embuga, abadoosa: Waliha, kurhi gwasirwe njire lyo ncizibwa? ³¹ Paulo na Sila bamushuza: Oyemeere Nnahamwirhu Yezu, wacizibwa, wene n'omulala gwawe. ³² Banamuyigiriza omwanzi gwa Nnahamwirhu, na ngasi baali omu mwage. ³³ Abarhola haguma naye, omubo budufu bwonaneene, abashuka ebibande, honaho abatizibwa, ye nabahamwage booshi. ³⁴ Abaheka omu mwage, abaha ebiryo, ashagaluka haguma n'abahamwage bulya bamayemeera Nnamahanga. ³⁵ Erhi bucha, abantu ba Leeta barhuma abakulu babasoda mpu babwire omulanzi oku alike abo bantu. ³⁶ Oyo mulanzi abwira Paulo ebyo: Abakulu ba Leeta barhumire badesire mpu mmuliike; cihulukiragi mugende, na mugende n'omurhula. ³⁷ Cikwone Paulo abwira abakulu ba basoda: Erhi abire rhwamashurhwa emikoba z'olubaga na buzira okutwirwa olubanja, rhwe rhuli Baroma, barhukweba omu mpamikwa, na buno bakola mpu barhurhenze bufunda funda. Nanga kurhankaba ntyo. Boone bayiishe barhuliike. ³⁸ Abakulu babasoda bagenda bajaderha eyo myanzi e munda Abakulu ba Leeta, bakanguka erhi bayunva oku baali Baroma. ³⁹ Bayiisha babayinginga, buzinda babalika, honaho babahuna oku barhengage omu lugo. ⁴⁰ Erhi barhenga omu mpamikwa baja omu mwa Lidiya, na, erhi bamabonana n'abaabo n'okubarhuliriza, bagenga.