¹ Bantu baguma barhengaga Ebuyahudi, bayigiriza bene wabo, bababwira: Nka murhakasirwi nk'oku Musa arhegesire, murhankacizibwa. ² Erhi kuba Buzinda Paulo bona Barnaba baja omu nshambalo na kadàda kaneene; ago mango bonebene wabo batwa mpu Paulo na Barnaba, na baguma babo, bashonera' e Yerusalemu emunda entumwa n'abagula bali bajiderha okwago madoso. ³ Buzinda bamalusibwa n'Ishengero, bagenda omu njira batwikanya omu Finisiya n'omu Samariya, bajaganiira kurhi abarhali Bayahadi bayememeera, ogwoo mwanzi gwasimiisa bène wabo bweneene. ⁴ Erhi bahika e Yerusalemu, bayankirirwa n'Ishengero, entumwa n'abagula, bajaganiira ebi Nnamahanga abajiriire. ⁵ Lero baguma b'omu cigamba c'Abafarisayo, abaliko bamuyiire, bayimuka, Baderha mpu ku kwanine oku barhambarhali Bayahudi n'okubarhegeka bacimbe amarhegeko ga Mûsa garhegesire. ⁶ Entumwa na bagula baja haguma mpu bagere mw'eryo idoso. ⁷ Ako kadali kanene erhi kahahwa, Petro ayigwmanga, aderha: Bene wirhu, mumanyire oku hali mango garhali nsanyi Mungu acishozire muli mwe mpu ako kanwa kani, abarhali Bayahudi bayunve emyanzi y'omurhula baye mechendo. ⁸ Na Nnamahanga, ayiishi emirhima y'abantu, ayerekine, oku abaha Mûka Ocesibwe akiirhu. ⁹ Arhajiraga oku rhuberula nalibo, ashuka emirhima okushimbana n'amarhegeko. ¹⁰ Lero, cirhumire muli mwarhangula Nnamahanga, omu kushwekera engarha omw'igosi ly'entumwa bashakuluza ciru na nirhu rhurhahekaga? ¹¹ Cikwone oku lukogo lwa Nnawirhu Yezu kwo rhuyemire okucizibwa, akabo. ¹² Olubaga loshi lwahulika, bayunvirhiza Barnaba na Paolo, bakaderha bimanyiso n'ebirhangaza byoshi Nnamahanga ajijire kugererabo omu barhali yemire. ¹³ Erhi bayûsa oku derha, Yakobo anaci derha, erhi: Bene wirhu, munyunvirhize! ¹⁴ Simoni ababwira oku Nnamahanga arhanziri lola omu lubaga n'oku cilondolera mulibo omulala gwa derhwa okw'izino lyage. ¹⁵ Haguma n'okwo aderha n'emyanzi y'abalebi, nk'oku biyandisirwe: ¹⁶ Ahanyuma lyebyo, nayishi galuka, nayishi zusa enyumpa ya Daudi yahongosire, nashubi shakulula ahashabusire, nashubi hakubûla, ¹⁷ Lyo emisigala y'abantu elongereza Nnawirhu, Ngasi bihugo bihamagala izino lyani, Bi derhe Nnawirhu, ye jijire ebi, ¹⁸ Na kuli ndi bamanyikine kurhenga mira. ¹⁹ Co cirhumire niehe mbwine oku kurhali kwinja balibuze abarhali bayahudi bayemire Nnamahanga, ²⁰ cikwone rhubayandikire baciberule n'izinga ly'enshushano, obushungu, n'enyamafu. ²¹ Bulya, kurhenga mira, Musa agwerhe omu ngasi lugo abantu bakagiyiriza eyo emyanzi, bulya ngasi lusiku bakagi yiigiriza ngasi mango omu bishagala. ²² Ago mango byayunvikana emunda Entumwa n'emw'Abagula, haguma na ngasi ishengero, oku cilondola muli bo bone, n'oku barhuma e Antokia, haguma na Paulo na Barinaba, Yuda ye derhwa Barasaba na Sila, bantu bakengwa omu babo. ²³ Babafumbasa amarhuma gadesirwe mpu: Entumwa n'abagula, n'ababo bobaali n'abarhali bayahudi, bob'e Antokia, n'omu siriya, n'omu siliya, balamusize. ²⁴ Bayunvirhe oku Bantu baguma barhurhengaga mwo, abo rhurhahaga ciru oburheganye bwehi, bamuzungulusize irhwe n'ebinwa badesire n'oku mulibuza emirhima. ²⁵ Rhwatwirwe baguma nti, buzinda rhwacigusha baguma, oku cishoba abarhumwa n'oku barhumirabo n'abazigirwa biirhu Barinaba bona Paulo. ²⁶ Abo bantu bo balingigifa oku mukolo gwa Nnahamwirhu Yezu Kristu. ²⁷ Rhubarhumire Yuda bona Sila bo bamubwiira bone ebyo. ²⁸ Bulya kulikwinja Muuka Mweeru na niirhu rhurhamubarhuze ogundi muzigo, kulusha ogu gushinganine. ²⁹ Mumanye; murhalyaga enyama zirherekiirwe ensanamu, omwamba, ensimba zifulunginwe omuko, murhakagana, nkamwankacilanga n'ebyo mwanaba mujijire bwinja. Muyorhage bwinja. ³⁰ Erhi bamahabwa oluhusa n'ishengero, baaja e Antokia, ebyo bahana amaruba omu bushimanane boshi. ³¹ Buzinda gamasomwa, basiima obushibirizi ga babadwiirire. ³² Yuda na Sila, bo baali balebi, babayigiriza n'oku bazibuhya omu bwinji bw'emyanzi. ³³ Omu kasanzi kasungunu, abaabo babaleka n'omurhula bashubira emunda ababarhumaga bali. ³⁴ Cikwone Sila atwa oku asigala eyo munda. ³⁵ Paulo na Barinaba babeera e Antokia, bakayigiriza n'okuhanula, haguma n'abandi bandi, akanwa k'omurhula ka Nnahamwirhu. ³⁶ Enyuma lya nsiku nsungunu, buzinda lyaho Paulo abwira Barinaba: Rhugaluke rhujelola beene wirhu omu ngasi ngo rhwayigirizize akanwa ka Nnahamwirhu, rhulole kurhi bayosire. ³⁷ Barinaba alonza okulerha na Yohana, wasulagwa elya Marko. ³⁸ Cikwone Paulo arhabonaga bwinja oku bagende booshi bulya abarhazire basiga omu Pamufiliya, arhanacibasagya omu mukolo gwaabo. ³⁹ Akadali kaluga karhuma balekana bonene, na Barinaba, arhola Marko bonaye, bayicirira Ekipro. ⁴⁰ Paulo acishoga Sila, agenda, ahamirizibwa n'ababo oku lukogo lwa Nnahamwirhu. ⁴¹ Atwikanya omu Siriya n'omu Silisiya, aja azibuhya amakanisa.