¹ Kantali ntagengwa? Kantali ntumwa? Kamw'oyo murhali mulimo gwani muli Nyakasane? ² Akaba oku bandi ntali ntumwa, kuli mwe mwehe ndi yo; bulya mw'oyo mwecimanyiso c'obugo bwani muli Nyakasane. ³ Balya bakanshumira, oku mbashuzize kw'oku: ⁴ karhurhankalya rhuna nywe. ⁵ Ewe, karhunkahashi- shimbulirwa n'omukazi mwemezi, ak'ezindi ntumwa, n'aka bene wabo Nyakasane, n'aka Kefa? ⁶ Nkabaga rhwene rhweki, rhwe na Barnaba, rhwe rhurhayemerirwi oku rhakola? ⁷ Musirika ohi olyula yene omukolo gwage? Ndi ohinga omuzabibu arhanalye oku mburho ya gwo? Ndi oyabula obuso arhana nywe oku marha g'obw'obuso? ⁸ K'okwo ndesire lir'iderha lya bantu kwone? K'irhegeko lyoki lirhakudesiri? ⁹ Omw'irhegeko lya Musa mwokuyandisirwe, mpu: Empanzi ehula emburho orhayishekaga akanwa. Ka- Nyamuzinda anashibirire Empanzi? ¹⁰ Karhali rhwerhurhumire aderha ntyo? Neci, okwola rhwe kwayandikiragwa: Ohinga ku kwanine ahinge erhi analangalire, n'ohula emburho erhy'analangalire oku ayigwerhe kwo ecage cigabi. ¹¹ Obula rhwamira aminja gw'omuka muli mwe, ka kuligi kwa kusomeza erhi rhwankasarhula oku binyu byen'igulu? ¹² Akaba abandi bagerhe obuhashe bw'okujira ntyo kuli mwe, karhurha balushiri? Ci rhwehe rhurhakolesagya oby'obuhashe; ciruhuna kalembera byoshi, nti lyo: rhurhagi fukira Emyanzi y'Akalembe ka Kristu e njira. ¹³ Kamurhamanyiri omu ka- Nyamuzinda, ka- Nyamuzinda ka babika, na oku abakola ahaluhero, kugabana bagabana n'oluhero? ¹⁴ Ntyo Nyakasane naye arhegesire mpu abaja bayigiriza Emyanzi y'Akalembe, babikwe n'Emyanzi y'Akalembe. ¹⁵ Cikwone niehe nta buhashe na kolesize ciru n'obuguma mulya go, nta nayandisiri ebyo ntilyo mubinjirira. Nfe erhi kwo ahali to kuderrha nti omuntu ahez'irenge lyani! ¹⁶ Bulya oku hanula Emyanzi y'Akalembe erhal'igwarhiro lya bukuze kuli nie; nta gwerhi oku nanka bula bwakujira; erhi nakaba ntayigirizizi Emyanzi y'Akalembe, erhi na mahera! ¹⁷ Acibaga ogwo mulimo ngujira omu kulonza kwani, neci, singa nanshinganine oluhembo; ci akaba kurhali kulonza kwani, kwakuderha oku buli burhindisi nahabirwe. ¹⁸ Oluhembo lwani luligi luhi? lw'olu: omu kuyigiriza Emyanzi y'Akalembe, nyihane buzira kuhembwa, ndeke okukolesa obuhashe mpirwe n'Emyanzi y'Akalembe. ¹⁹ Neci, n'obwonali ntagengwa oku bantu boshi, nacijijire muja wa boshi, nti lyo nchungula banji bwenene. ²⁰ Omu Bayahudi nacijijire Muyahudi nti lyo nchungula Abayahudi. Omu bantu barhegekwa n'Irhegeko, nacijira muntu w'Irhegeko, n'obo ntali w'Irhegeko nti lyo nchungula abarhegesirwe n'Irhegeko. ²¹ Omubarhajira irhegeko, nacijira muzira irhegeko, n'obwo ntali muzir'irhegeko lya Nyamuzinda, bulya ntegesirwe n'Irhegeko lya Kristu, nti lyo ncungula abarhajira irhegeko. ²² Nacijira ngonyi omu ngonyo, nti lyo nchungula engonyo. Nacijira byoshi kuli boshi, nti lukaba lufu k'akaba kalamo, kuhika ncize mwo baguma. ²³ N'ebyo byoshi Myanzi y'Akalembe mubinjirira, nti lyo nshangira aminja gayo. ²⁴ Kamuhabe oku abaja mashukwe gw'okulibirha boshi balibirha, ci muguma yene ohabwa oluhembo? Kusiga mulibirhe binyu, lyo muhabwa oluhembo. ²⁵ Ngasi oja mashukwe analeke byoshi. Kuderha mpu ahabwe obukuze bwa lusiku muguma. Rhwehe irenge rhukolera liri ly'ensiku n'amango. ²⁶ Na nnani kwondwirhe nalibirha ntyo, arhali aka orhamanyiri e munda ayerekire; kwondwirhe nalwa ntyo, arhali aka owashurha omu cirêre. ²⁷ Omubiri gwani nangubambule ngujire, cifa, nti nakaba namabwira abandi ngali na tumula.