¹ Oku myanzi y'ebintu byahanagwa oku ntulo y'enshushano, rhumanyire nk'emunda rhuli rhweshi okurhugwerhe obumanye. - Obumanye bunalerhe obucibone, cikwoni obuzigire bunayubake. ² Omuntu nka kacimanya amanyire omwanzi, oyo arhamanyiri bici ciru n'ehitya ebiyerekire okumanya. ³ Cikwone omuntu nka akasima Nnamahanga, oyo amanyikine naye. - ⁴ Cikwone oku myanzi y'okulya ebintu byahanagwa ntulo oku nshushano, karhali kantu omu karhi k'igulu, na kandi ntaye Nnamahanga kulusha ogu muguma yene doka. ⁵ Ciru, hakaba hali aba baderhwa ba miungu, omu mpingu, erhi mun'igulu, nka kulya banaligi ba miungu banji na bana nnahano banji, ⁶ cikwoki emunda rhuli rhweshi Nnamahanga ali muguma yene, ye Larha, olya ebintu byoshi byarhengaga emwage na nirhu rhulamire emwage, ali olya Nnahamwirhu muguma, Yezu Kristu, olya ebintu byoshi byahebagwa ho na nirhu emw'oyo. ⁷ Cikwone oby'obumanye burhali endalala za boshi. Ci abandi oku byenshusho bacikumba kuhika buno, banalye ciru barhanaleke mpu Kali kantu kahanyirwe ntulo, n'entanya zabo zaba ngonyo gonyo n'ishembo. ⁸ Cikwone ebiryo birharhuhise emalanga ga Nnamahanga: bulya nka rhwankalya, ntabyo byakusomerana rhugwerhe; nkandi nkarhurhaliri, rhurha punguzizi bici. ⁹ Cikwone sinzagya oku buhashe bwinyu burhishi musarhaza bulya bali ba bagonyo gonyo. ¹⁰ Bulya, nk'omuntu akakubona, we gwerhe obumanye, adahire alyalya omw'iherero ly'abazimu, enzamiri zage, e mw'orhagwerhi misi, barhakagi mulerhera ebiryo n'enyama zakagi rherekerwa abazimu. ¹¹ N'abarhajira misi bayishi-fa kugerera obwenge bwawe, bandugu balya Kristu afiraga! ¹² Nka wankajira ecaha cantyo oku bene-wawe, n'oku lemaza enzamiri nto, munaka gomera Kristu. ¹³ Co cirhumire, nka ebiryo byanka goga mwene wawe, ntakalya nyama, lyo ntagi gogesa mwene wani.