¹ Okubiyerekire emyanzi mwayandikaga ntanyize oku biri binja emw'omulume arhahumaga oku mukazi. ² Nakandi oku biyerekire obugonyi ngasi mulume abe na mukage ngasi mukazi abe n'iba. ³ Omulume ahe mukage okuli kwage n'omukazi ahe iba okuli kwage. ⁴ Omukazi arhagwerhi luhuma oku mubiri gwage. Cikwoki iba na kandi iba arha gwerhi luhuma yene oku mubiri gwage ci mukage. ⁵ Ci mukayunvanya oku kasanzi lyo muhabwa oburhulirire omukugerera na kandi muje haguma lyo Shetani arhasangi murhangula omu kurhaba n'olugero. ⁶ Ndesire ebyo n'entanya zani ci kurhali okw'irhegeko. ⁷ Eci nonzize abalume bayorhe okunyosire cikwone ngasi muntu agwerhe eyage nshokano Nnamahanga amuhire oyu kwage n'ola kwage. ⁸ Emw'abarhaciyanka na abakana, ndesire kube kwinja bayorhe oku nandi. ⁹ Cikwoki nkabarhankahasha oku cihanza bayanke kushinganine kulusha obulunga enyifinjo. ¹⁰ Emwabala bayansire mbabwizire ciru arhali niene ci Nnahamwirhu, "omukazi arhalekane n'omulume wage". ¹¹ Cikwoni nkabalekana, arhaciyanke banacigalukirana n'omulume arhalekaga mukage. ¹² Okubandi arhali Nnahamwirhu ci nye-ndesire nka mwene wawe agwerhe omukazi orhayemiri n'oyo mukazi ayemire kubera arhamuleke; ¹³ n'omukazi ogwerhe omulume orhayemiri naye kwo n'okwo. ¹⁴ Bulya olya mulume arhayemiri acesibwa omu kagarhi ka mukage, n'olya mukazi arhayemiri acesibwe omu kagarhi kw'omulume wage, nka byakaba arhali ntyo abana binyu banaba barhali bacire. ¹⁵ Orhayemiri, nka akarhenga anagenda oyo mwali wirhu arhali mushweke omw'ebyo. Nnamahanga arhuhamagire mpu rhulame omu murhula. ¹⁶ Kurhi omanyire, we mkazi, okuwamuciza balu? omulume wawe, erhi we mulume gurhi omanyire waciza mukawe. ¹⁷ Cikwone ngasi muguma agende oku Nnahamwirhu amujijire. Oku Nnamahanga amurhegesire kwona ntegesire omu ngasi Ishengero. ¹⁸ Nka muntu mulebe akahamagalwa anakembwirwe, arhacijire nko rhacikembulwa. ¹⁹ N'okahamagalwa arhanacikembulwa arhanacijire mpu akembulwe okukembulwa buli busha, n'okurhakembulwa buli busha. Cikwone okuseza amahano ga Nnamahanga bihashire. ²⁰ Ngasi muntu alame halya anahamagalirwe. ²¹ Nka wahamagalirwe omu buja kuja omu murhula ogu yankirire duba. ²² Bulya omuja wahamagirwe omu Nnahamwirhu omu buja ali mushwekule omuntu wahamagirwe ali muja wa Kristu. ²³ Mwaguzirwe oku cishingo cinene; murhacibe baja b'abantu. ²⁴ Ngasi muntu, bene wani, alame emalanga ga Nnamahanga, ngasi mango nka kulya anahamagalagwa. ²⁵ Emwabala baciri banyere, nta gwerhi irhegeko ly'abarhacishenga Nnahamwirhu, Cikwone nahana ihano lyani niene nahabirwe kurhenga Nnahamwirhu. ²⁶ Labagi ebimbwine bishinganine, okw'ako kasanzi kazirhu kayishire: bishinganine omuntu ayorhe ntya. ²⁷ Acishwekire oku mukage, arhalonze oku shaba okyo balamire, abe acishwekire oku mukazi muguma, arhacilonze wundi. ²⁸ Nkaba wayansire, orhajira caha; na kandi nkaba oyo munyere aherusire, arhajira caha; cikwone abo bantu bayishiba balubero omu mubiri, na nnonzize bahumanye. ²⁹ Lolagi oku ndesire, bene wani, akasanzi karhali kanene; c'abagwerhege abakazi bwayorhaga nka barhabagwerhi, ³⁰ n'abali balaka babe nka barhali balaka, n'abali lushange babe nka abarhaluli, n'abaguzi babe nka barhagwerhi, ³¹ n'abalya bashosihire n'igulu babe nkabarhashosihiri, bulya enshusho yel'igulu yagera. ³² Kandi, nalicifinjire oku murhabe n'ecoba. okubalya bacirhola banakayoboha ebintu bya Nnahamwirhu, omu kumusimisa Nnahamwirhu; ³³ na balya barhozire banakayoboha ebintu byen'igulu, birya bisimisa mukage. ³⁴ Hacirigi olubero luhali emw'omukazi n'omunyere: balya barhanziri heruka banaka shagalukira ebintu bya Nnahamwirhu, mpu lyo baba bacesibwa omu mubiri na muka; na aba rhozire banakashagalukira ebyen'igulu, zibanjira byakushagalusa b'iba. ³⁵ Ndesire ebyo oku bunguke bwinyu; kurhali kulonza mmurhege, kuli kumuhisa oku bishinganine n'oku muhumanya na Nnahamwirhu buzira kujaibagiza. ³⁶ Cikwone nka omuntu nk'akaba arhashinganini e mw'omwali bulya myaka eshinganyire, kuli kwinja amurhole, ajire okw'aciyunvirhe, arhajijiri caha, barholane. ³⁷ Cikwone erhi omuntu anka sera omu mihigo y'omurhima gwage arhanasezibwi na ndi, ci oku bulonza bwage yene ahige omu murhima oku yorhana omunyere wage, ajijire bwinja. ³⁸ Ntyo owaha omwali omulume erhi kwinja ajijire, n'orhamuhire ye erhi kwinja ajijire kulusha. ³⁹ Omukazi, okw'iba anaciri mw'omuka erhi anali mushwekere kuli-ye, ci erhi iba ankafa, nnamukazi anashwekulwa, anaja omu mw'oyu alonzize, cikwone muli Nyakasane. ⁴⁰ N'obwo, kw'ombwine, anabona omurhula kulusha nk'aka ciyorhera okw'anali. Ncikebirwe nti nnani njira Muka gwa Nyamuzinda.