¹ Bene wirhu, niehe ntahasha oku bashambaza nka bantu bacikubagira Muka, ci nka bantu bacikubagira eby'omubiri, nka bana barho muli Kristu. ² Mpyuhyu namuhire nti munywe, ci ntamulisagya biryo bizibu, bulya murhanka shubiri bigala; ciru na buno murhankashubi bihasha, ³ kulya kuba mucicikubagira eby'omubiri. Oku haciri obwagalwa n'akadali ekarhi kinyu, k'erhi murhaciri bantu bacikubagira eby'omubiri obwo, k'erhi n'olugendo lwinyu lurhali nka lw'abantu kone obwo? ⁴ Bulya mubwirana, mpu: << nnani Apolo yendi kwo>>, ka kurhali kw'abantu kwone okwo? ⁵ Apolo aligi cici? na Paulo aligi cici? Bashizi bamuhisagya kw'obuyemere, na ngasi muguma wa mulibo nk'oku Nyakasane amushobozize. ⁶ Niono nazindaga nahinga, Apolo adomerera; ci Nyamuzinda ye wa kuzize emburho. ⁷ N'ohinga arhali cici, n'odomerera kwonakwo, ci okuz'emburho yene, Nyamuzinda. ⁸ Ohinga n'odomerera bo baguma, ci ngasi muntu ayishi hembwa nk'oku anakozire. ⁹ Bulya kugwasa rhugwasa Nyamuzinda; muli ishwa lya Nyamuzinda, muli bubake bwa Nyamuzinda. ¹⁰ Nk'oku nanali mpirwe enshokano ya Nnamahanga, naj'aho, nabanda ibuye lirhanzi omu ciriba, nka kula omûbasi mwinja anajira. Owundi ayubakira kwo. Ci ngasi muguma alola bwinja gurhi ayubasire kwo. ¹¹ Bulya ntaye wankabanda ecindi ciriba kuleka ecihali, kw'okuderha Yezu Kristu. ¹² Erhi omuntu ankayubakira kwo eco ciriba n'amasholo, erhi n'ebyuma, erhi n'amabuye g'engolo ndarhi, erhi n'emirhi, erhi n'obukere nisi n'obwasi, ¹³ omukolo gwa ngasi muguma gwa nayishi bonekana. Olusiku lwana guyerekane, bulya ol'olusiku omu muliro lwa yishi manyirwa, n'ogo muliro gwo gwanyise omulimo ngasi muguma nk'oku gunali. ¹⁴ Obubake bw'omuntu erhi bwankasera oku ciriba, nnabwo anahabwa oluhembo. ¹⁵ Obubake bw'omuntu erhi bwankagulumira, nnabwo anahona; yehe anacira yene, cikwone nka owagera omu bwihire. ¹⁶ Ka murhamanyiri oku muli nyumpa ya Nyamuzinda n'oku Omuka gwa Nyamuzinda gumuli mwo? ¹⁷ Erhi hankajira owashaba aka- Nyamuzinda, Nyamuzinda anamushabula. Bulya aka- Nyamuzinda kaba katagatifu, nako ka- Nyamuzinda, mweko. ¹⁸ Ntaye wacirhebaga yene! Muli mwe erhi hankajira owacikebwa mpu ali mushinganyanya omu masu ger'igulu, acijire musirhe lyaba mushinganyanya; ¹⁹ bulya obushinganya bwa mwer'igulu bûba isirhe omu masu ga Nyamuzinda. Kuyandisirwe, mpu: Ye gwakiza abashinganyanya omu mirhengo yabo; ²⁰ na kandi, mpu: Nyakasane ayishi enkengero z'aba-shinganyanya; arhahabiri oku ziri zabusha. ²¹ Ntyo, ntaye ocikuzizagye irenge ly'abantu; bulya byoshi biri binyu: ²² abe Paulo, abe Apolo, abe Kefa, libe igulu, bube buzine erhi lufu, bibe by'ene erhi b'irhondo, byoshi biri binyu; ²³ ci mw'oyo muli ba Kristu, na Kristu aba wa Nyamuzinda.