¹ Mucisece okuba n'obuzigire; mulongereze n'enshokano za Muka Mtagatifu, ci bwenene e nshikano y'obulebi. ² Bulyala oderha omu ndimi mwandu, arhali bantu aderheza, ci Nyamuzinda. Ntaye omu yunva, ci anakaderhezibwa na Muka ebirhankayunvikana. ³ Omuntu oleba yehe, bantu aderheza, ku yigiriza ayigiriza, kuhanula ahanula, kurhuliriza arhuliriza. ⁴ Oderha ndimi nyinji, yene ociyigiriza; oleba, ayigiriza e ndeko y'abemezi. ⁵ Ntankabaga mweshi muderhe ndimi mwandu, na nnasima kulusha mulebe; bulyala oleba alushire Oderha e ndimi, akaba owa derha e ndimi arhahugwiri, lyo e ndeko y'abemezi erhenza mwo e nyigirizo. ⁶ Bene wirhu, erhi nakamuganiza omu ndimi erhi mwinja kuci mmujirire, akaba ntaco mmufululire, na nkaba ntaco mmumanyisize, na nkaba ntaco mmulebire na ntaco mmuyigirizize? ⁷ Kwobiri ntyo ebirhajira buzine, akarhera erhi olulanga, erhi byankayunvisa izu; gurhi omuntu ankamanya bici akarhera kazihire, erhi olulanga, akaba amazu ga byo garha twikanusiri bwinja? ⁸ N'omushekera erhi izu lyago lya nkaba lirhatwikanusiri, ndi wankashibirira mpu aja oku birha? ⁹ Ninyu kwonokwo; erhi olulimi lwinyu lyankaba lurhadesiri ebinwa bihumanusire, gurhi bankayunva ebi mudesire? Erhi omu cirere mudwirhe mwaganirira. ¹⁰ Omw'igulu muli ntishi mbero zinga za ndimi, na ntuluguma lurhayunvikana. ¹¹ Ci erhi nanka haba eci enderho zidesire, na naba munyamahanga kuli olya waderha, n'odwirhe waderha anaba munya- mahanga kuli nie. ¹² Ntyo ninyu, bulya kuba mudwirhe mwalonza enshokano za Muka, muciseze okulushana mulizo, lyo e ndeko y'abemezi erhenza mw'obunguke. ¹³ Co cirhumire, oderha endimi, akwanine ahune enshokano y'okuzihugula. ¹⁴ Bulya erhi nanka huna omu ndimi Omuka gwani gwana huna, ci nta bunguke obukengere bwani bwa nkakula mwo. ¹⁵ Gurhi omuntu ankajiraga obo? Na nnahuna n'omuka gwani, na nnahuna n'obukengere bwani; na nnaimba n'omuka gwani, na nnayimba n'obukengere bwani. ¹⁶ Caba erhi wankakuza Nnamahanga omu muka mwone, gurhi omuntu kwone akashuza << Amena >> oku minkwa gwawe, arhanamanyiri bici adesire? ¹⁷ Neci, okuvuga omunkwa kwawe kuli kwinja, cikwone owundi arhankarhenza mwo enyigirizo. ¹⁸ Nvuzire Nnamahanga omunkwa, bulya nanderherere omu ndimi ku mulusha mweshi; ¹⁹ cikwone omu ndeko y'abemezi, nsima kulusha oku derha binwa birhanu n'obukengere bwani, lyo nyigiriza abandi nabo, ahali h'oku derha bihumbi ikumi omu ndimi. ²⁰ Bene wirhu, murhabaga bana barho nka mwarhimanya. Oku bubi, neci, mube bana barho, ci omu kurhimanya, mube bantu bakulu. ²¹ Kuyandisirwe omu marhegeko, mpu: << Olu lubaga naluyigiriza n'abantu baderha olundi lulimi n'omu kanwa k'abantu b'ihanga, barhanayunvirhize obwo >>, kwo Nyakasane adesire. ²² Kw'okuderha oku enshokano y'endimi cinali cimanyiso, arhali oku bemezi, ci oku barhali bemezi; ci obulebi bwohe birhali bw'abarhali bemezi ci buli bw'abemezi, ²³ erhi Eklezia yoshi yankaja haguma, n'erhi boshi bankaderhera omu ndimi, nabo abarhamanyiri gurhi bigenda erhi abarhali bemezi bankaja mwo, kabarhanka derha mpu kusiraha musirahire? ²⁴ Ci erhi boshi bankaba badwirhe baleba, n'erhi hankayisha orhali mwemezi erhi orhishi emunda binja, boshi bana muyagiriza, boshi bana mutwira olubanja; ²⁵ ebi fulisirwe omu murhima gwage byana fululwa. Obwo anacishurha okw'idaho, anayubika obusu, aharamye Nyamuzinda, anaderhe, erhi: << Okuli Nnamahanga ali e karhi kinyu >>. ²⁶ Gurhi rhwashwinja ebyo bene wirhu? Amango muli omu bugashanize, mugua muli mwe abe agwerhe olwimbo owindi enyigirizo owindi abe agwerhe oku fululirwa, n'owundi abe agwerhe omwanzi omu nderho zirha manyikini n'owundi abe anahugula ogwo mwanzi: Ebyo byoshibyana rhabala omurhwe gw'abemezi okuja mbere omu buyemere. ²⁷ Erhi banka ciheba omu kuderha enderho zirha manyikini, kukwanine babirhi erhi basharhu bone bakujire, na ngasi muguma akage kasanzi, n'owundi ahugule ebi badesire. ²⁸ Erhi ankaba arhabonesiri amahugulo, kukwanine ngasi muguma aleke oku hababukira omu ndeko: Agwasirwe acibwire yene na Nnamahanga. ²⁹ Nabo abaleba, banakaderha babiri erhi basharhu, n'abandi baje bagera omw'ebi bali baderha. ³⁰ Cikwone ciru hankajira owama fululirwa akanwa na Nnamahanga ho naho, oliwaderha anarhengi hulika. ³¹ Mwanahasha okuj'aleba muguma muguma lyo boshi barholera ho enyigirizo n'okuba n'obushiru. ³² Abaleba myanzi ya mene eyo banasigalana eyo nshokano bahabirwe, ³³ Bulya Nnamahanga arha rhuhamagalaga mpu rhuyishilama omw'ishababe cikwone mpu rhulame omu murhula. Nk'omu mirhwe y'abemezi y'omu lubaga lwa Nnamahanga yoshi. ³⁴ Abakazi bashinganine bakahulika omu ndeko. Nka kulya amarhegeko ga Nyamahanga ganakudesire, bakwaninwe bakacirhohya. ³⁵ Erhi bankalonza okumanya akantu kalebe banadokeze b'iba emwa babwe. kurhali kwinja mpu omukazi akaderha omu ndeko y'abemezi. ³⁶ Gwarhi, k'emwinyu y'o akanwa ka Nnamahanga karhengaga? Kandi ka mwene mwehe akanwa ka Nnamahanga kayishire? ³⁷ Erhi hankajira owa cikebwa oku ali mulebi, erhi acikebwe oku agwerhe enshokano ya muka, agwasirwe amanye kul'ibi muyandikire gali marhegeko ga Nnamahanga. ³⁸ Cikwone erhi ankaba arhamanyiri ntyo, oyo barha muhebaga kwo murhima. ³⁹ Ntyo bene wirhu bici mwalonza cigwasirwe cibe ebe nshokano yaku leba, cikwone murha cikaga okuderha enderho zirha manyikini. ⁴⁰ Mashi byoshi bijirikane omu bwinja n'omu bw'orhere nkana.