¹ Munyige nka kula nani nyiga Kristu. ² Mmusimire bulya omu ngasi kantu mmuna nkengere, na bulyala mukashimba emigenzo nammusigiraga. ³ Cikwone nnonzize mumanye oku ngasi mulume oku Kristu ye Nnnawabo; n'omukazi nnawabo ye mulume; na ye Kristu Nnawabo ye Nyamuzinda. ⁴ Omulume wahuna erhi owaleba n'irhwe Liri libwike, anabonesa nnawabo enshonyi. ⁵ Ci n'omukazi wahuna erhi owaleba n'irhwe lirhali libwike, anabonesa nnawabo nshonyi; bulya kw'alinkaokungwirwe. ⁶ Omukazi erhi ankaleka oku cibwika irhwe, amomwe n'enviri nazo! Cikwone akaba ziri nshonyi nshonyi oku mukazi oku momwa enviri erhi oku kungulwa irhwe, abwike irhwe lyage. ⁷ Omulume hehe kurhakwanini acibwike irhwe, bulya all nshusho anali bulangashane bw'irenge lya Nyamuzinda. Naye omukazi ali bulangashane bw'irenge ly'omulume. ⁸ Bulya arhali Omulume ye warhengaga oku mukazi, ci omukazi ye warhengaga oku mulume; ⁹ arhanali Omulume ye wabumbiragwa omukazi, ci omukazi ye wabumbiragwa omulume. ¹⁰ Okwola kwo kurhumire ku kwanine omukazi ayambale omw'irhwe eci manyiso c'obukulu bw'iba erhi bamalahika barhuma. ¹¹ Caba, muli Nyamuzinda, nta mulume buzira mukazi, na nta mukazi buzira mulume. ¹² Bulya, neci, omukazi oku mulume arhengaga, ci n'omulume naye mukazi omu burha, na byoshi kuli Nyamuzinda birhenga. ¹³ Lero mwene mulutwage; ka ku kwanine omukazi ahune Nnamahanga n'irhwe lirha libwike? ¹⁴ Kw'obworhere bw'omuntu bwone burhamuyigiriza oku ziri nshonyi oku mulume okujira enviri ndiri, ¹⁵ ci oku mukazi lir'irenge okujira enviri ziri ntyo? Bulya anahabagwa enviri mpu zibwikir'irhwe lyage. ¹⁶ Akabaga osimire okuja kadali, rhwehe rhurhakomera kwa mene okwo, n'Eklezia za Nyamuzinda zirha kukomera. ¹⁷ v 17 Obundwirhe namuhanula, lekagi mmubwire oku nta musimiri, bulya okuja mwinyu hagama kurhammujirira minja, ci mabî. ¹⁸ Burhanzi, nayunvirhe mpu amango muli baguma omu ndeko, muli mwe,lyo abantu b'enkomedu zikomire bamanyikana. ¹⁹ Bulya bikwanine habe okucigaba mulimwe iyo abayemerirwe bamanyikaba. ²⁰ Mwehe erhi mwacija haguma, kurhaciri kuderha mpu mulye erhi ishega lya Nyakasane. ²¹ Bulya erhi muhika oku cibo, nta kucilinda abandi, ci ngasi muguma aje kwo alya ebyage yene; na ntyo oku baguma bafa n'ishali, abandi erhi balalusire. ²² Nkabaga murhajira emwabinywe mwankalira muna nywe? Nisi erhi kugaya Eklezia ya Nyamuzinda n'oku lindira abarha gwerhi bici? Gurhi nacimubwiraga? Ka mpu mukuzagye? Nanga, ntamukuzizi kuli okwo. ²³ Neci, nnani ebi nabwiragwa na Nyakasane byomuyigirizize: obuduku Nyakasane Yezu agwarhagwa mwo, arhola omugati, ²⁴ n'erhyaba amavuga omwonkwa agubega, erhi: ogu guli mubiri gwani gwahanwa mwe murhuma; ninyu mukajira ntyo lyo munkengera. ²⁵ Kwonakwo, erhi bamala balya barhola akabehe, erhi: aka kabehe eri ndagano mpyahya y'omuko gwani; mukajira ntyo ngasi kuywa lyo munkengera. ²⁶ Neci, ngasi kulya kw'ogo mugati na ngasi kuywa kw'aka kabahe erhi mumanyisize olufu lwa Nyakasane, kuhika olusiku anayishe. ²⁷ Co cirhumire, ngasi yeshi olya kw'ogo mugati erhi onywa kw'ako kabehe ka Nyakasane arhanakwanini, ayishijisibwa lubanja erhi mubiri n'omuko gwa Nyakasane birhuma. ²⁸ Kusiga ngasi muguma acije e murhima, akali lya kw'ogo mugati ananywe kw'ako kabehe. ²⁹ Bulya owalya n'okunywa arhanakengiri oku guli mubiri gwa Nyakasane, erhi kulya alire n'okunywa olufu lwage. ³⁰ Eco cocirhumire muli mwe banji bali balwala, n'abandi bali bazamba, n'abarhali banyi bafire. ³¹ Acibe rhucije emurhima, singa rhurhahekwa lubanja. ³² Nyakasane akarhuheka lubanja erhi kukoma arhuma, lyo rhurhagi hanwa haguma n'igulu. ³³ Mmuyunvire obwo, bene wirhu, amango muyishire hagumu omu ishega, munalindane. ³⁴ Erhi hankajira oshalisire, analire e mwage lyo muleki jira haguma okuyishi hanwa. Ebindi niene nabikomeza amango nayisha.