¹ lagalo mungu ebegesende mose gombo: gotaa gongale falo, begesaa ge mbo; mungu aabea gi gombo, sidjaa baito baami baee gootongelemi ligwa. ² engaambo boopea gosidja bo gombo baee, andi djetobande gehuma getubu geago la bagolototo. ³ gebale gedjala nde la bangombe la belila nde go mbele djaago, laa goete gelalelo giago ge mbele laa goliolo li gelalo laa goete mbele yi bekobe byago, la baito bago, laa goete baala bago, laa goete tobakuli toolela tokuma. ⁴ bangombe belila nde age laa baito bago laa bekobe byago. ⁵ mungu ebegese nde mose gombo: begesa alona gombo lipolaa djogo djago la ikoko djago gotie gebale la ndodje djike, la tosaala, nyenyaa bangombe go gehuma ge ejipito. ⁶ lagalo alona elifolende djogo djande gotie badje ba ejipito; bangombe benenende bo abalufa gehuma getubu ge ejipito. ⁷ kanga djetongende galo la bweli bwabo bongonga, la beleshende bangombe go boi bo ejipito. ⁸ lagalo falo etende mose la alona ge mbo, sembogelaa mungu gombo atotole bangombe gongalei la gongale baito baami, la djeesidja nde baito goa goohumbela mungu boeba. ⁹ mose ebegesende falo gombo; balakeemi gelaka inandi agelembaage gombo isembogele po djaago la po dje bekobe byago, po dje baito bago gombo bangombe bangbe gongale age la goete mbele djaago la motiale goete gebale. ¹⁰ ge ebee nde gombo; lafendu. mose ebeende gombo mongale ogalo aabeage po djembo gasina agangae ambo ngene, iongiaongia djiso atiho. ¹¹ bangombe betotogande gongale age la go mbele djaago la bekobe biago la baito bago, betialande goete gebale. ¹² lagalo mose la alona betotoge nde gongale falo, la mose ogo alela gongale mungu po dje litina li bangombe obatome ge gongale falo. ¹³ mungu aatongela gelenge gemoa ogalo alengele mose. bangombe bengbende goete mbele, laa mo pango laa go bilanga. ¹⁴ betombole nde bo goete basia, la gehuma gedjee nde lifu libe. ¹⁵ la goene falo gombo auha, ge elesende botema bwande bopia, la atilembe goa boto laa omoa, ogalo aselenge mungu. ¹⁶ lagalo mungu ebegisende mose gombo: begisa alona mbo, lifolaa ikoko djago, tobaa djo mo buta bo gehuma gombo mokokoge ligugumba bisee bitubu bi gehuma ge ejipito. ¹⁷ betongende ambwale galo. alona alona elifolende djoogo la ikoko djande, geogo aatoba ikoko goete gehuma, la ligugumba limbende goliolo li baito laa nama. buta botubu bokokoge nde ligugumba bisee bitubu bi gehuma ge ejipito. ¹⁸ kanga djeotende gonyenya ligugumba la bweli bwabo la motikoke. lagalo ligugumba liembende moete baito laa nama. ¹⁹ kanga bebeende la falo mbo mwe mwende isangana dji iongiaongia. botema bo falo bombe ndebopiala ge atshowe baito, ogalo abee mungu. ²⁰ mungu ebegisende mose gombo totogaa la nongonongo, lambelaa falo goangoa ge go badje, la begesa ge mbo mungu aabea gi gombo; sidjaa baito baami bae gootongelemi ligwa. ²¹ ati galo, engaa mbo botisidje baito baami mbo bae, letaa djetoma nde fuga djie goliolo liago, la bekobe biago la baito bago go mbele djaago. mbele dji ejipito djidjalande la fuga laa gose gesee gengale bo moemala. ²² la bwina bwaho djeeganya nde gehuma ge gosene, gesee ogengale baito baami mongaase, lagalo fuga djifangae ho, mbo bolube gombo emi djende mungu goete gehuma. ²³ lagalo djeeganya nde goete baito baami la moete baito bago. gelembo ogalo angongala lafendu. ²⁴ mungu etongende ambwale galo. fuga djegotende angandu goete mbele dje falo, la gombele ye bekobe biande, la goete gehuma getubu ge ejipito, gehuma getubu gesegame nde la fuga. ²⁵ falo etende mose la alona liogi ge mbo; tei goohumbela iongiaongia djino boeba goete gehuma. ²⁶ mose ogo abea mbo; gotonga galo mofalongane po dje mbo esu tofahumbele mungu iongiaongia djiso boeba bo lilo mo baiso ba baito ba ejipito. engaambo toohumba gofelo ye baito ba ejipito boeba bo lilo gofelo baiso babo, andi bafatobesu la babanga? ²⁷ mokoka nde mbo toe loendo lo bekolo besaso goete gesobe goohumbela mungu iongiaongia djaiso boeba ogalo angolaka elakesu. ²⁸ lagalo falo ebeende gombo; djeesidjendenu gowa gombo bohumbelei mungu iongiaongia djino boeba goete gesobe kasi ati oa gola. sembogelei po djami. ²⁹ lagalo mose ebee nde gombo; letaa djenena nde gongale age, la djesembogela nde mungu gombo fuga djitotoge gongale falo, la bekobe biago, laa baito bande lafendu. lambo sidjaa falo atoitaa gombo, atofea gosidja baito gombo bae gohumbela mungu boeba. ³⁰ lagalo mose enenende gongale falo la esembogele nde mungu. ³¹ mungu etongelende gelenge gemoa ogalo asembogele mose, la etotolende fuga gongale falo la bekobe byande la baito bande. laa lomoa loti tiale. ³² falo elese nde botema bopia goete enembala, la atisidje baito gombo baee.