¹ la tulu dji pili la bwelu o bwilo la bwelu betonge nde tulu la ligwa po dje ligwa mo gesee geelu. betonge nde tulu dje ndelu po dje alona gelenge gemoa ogi alake mungu mose. ² ge etonge nde efode la wolo la tulu dje pili la bwelu o bwilo la bwelu bo bolikani obotongame la busi boke. ³ betobe nde wolo mo bienegelo bilene la obike mogue betinyende mo mo belii beke la beloge nde mo moete tulu dje pili la bwelu o bwilo la bwelu bo bolikani obotongame la busi boke, la oyema mo lolo. ⁴ po dje efode betonge nde bisege biele po dje baele, beandame golio li mo mwele. ⁵ bolii bwe botongame la bweli goliolo li mo po djoanda mo, motongame nde la gelenge ge efode, la motongame nde la biya bi mo obitongame la efode gombo; wolo la tulu dje pili ye ndelu adje ndilo la adje bwelu bo bolikani obotongame la busi boke, gelenge gemoa ogi alakele mungu mose. ⁶ babanga ba soama belonganyame nde la moandane nde la biandelo obiloge bo la bolii bo wolo. babanga betinyame nde la lisigi la lina li bana ba yisalaele, gelenge gemoa la lisigi oliadjotinyama la mopete bo gelembo. ⁷ ge eande nde mo la bisege bi efode po dje baele gombo mongale babanga po dje gekaniseli ge bana ba yisalaele ba bolome, gelenge gemoa ogi alake mungu mose. ⁸ ge etonge nde litunga li bweli bolo gelenge gemoa la ligwa li efode. ge etonge nde mo la wolo la tulu dje pili la dje ndelu odje ndilo la bwelu obo molikani obotongame la busi boke. ⁹ osa bo litunga bogelane nde la olene bo mo. mo mobwanyame nde mwele, la osa bo mo bombe nde ndambo dje boonde la olene bo mo ndambo dje boonde aho asile mo gobwanyama mo mwele. ¹⁰ beande nde belongo benei be babanga ba mo. bolongo bo balali la topaji la balekete bombende bolongo bo pelo. ¹¹ bolongo bo biele bombe nde emelode la safili la yahalimi. ¹² bolongo bo besaso bombe nde wakiti la agate la ametusiti. ¹³ bolongo bo benei bombende belulu la soama la yasipe. babanga be beandame nde la bibundelo obilogame la bolii bo wolo. ¹⁴ babanga bembe nde liu la baele la bekomame nde lina gelenge gemoa la lina li bana ba bolome ba yisalaele. mombende ambo mepete be gelembo, momoa la momoa mokomame nde la lina li mo po dje basego liu la baele. ¹⁵ betonge nde benyololo be wolo belo obeaela ambo litunga. ¹⁶ betonge nde bibundelo biele obilongane lo ambo belii be wolo. bete nde mepete beaho bele go baiyo baele ba litunga. ¹⁷ bete nde benyololo be wolo bele goete mepete bele go baiyo ba litunga. ¹⁸ beande nde go baiyo baele ba benyololo baele gombale dje biandelo obilogame la belii be wolo, lagalo beande nde mo gopelo gombale dje bisege bi efode po dje baele. ¹⁹ la gombisa betonge nde mepete bele be wolo la betongende mo go baiyo baele ba litunga, la goilo li mo goeta bagubagu la efode. ²⁰ betonge nde mepete be wolo bele la beande nde mo gopelo gombale dje bisege bi efode po dje baele golio li mo gose, gesee geaho geandame nde la belii be efode obetongame la bweli. ²¹ beande nde litunga la mepete be mo gombale dje mepete be efode la bolii bo pili gombo mo molalee goliolo li belii be pili gombo ene atongame la bweli, la mbo litunga litototoga go efode, ogalo alakele mungu mose. ²² ge etonge nde tulu dje sa tubu po dje efode la pili. ²³ ndole dje goeta dje mo embende gelenge gemoa la ndole dje tulu dje gimo, la bolelo bo ndole djaho boandame nde la bolii gombo mdjande goondega. ²⁴ golio litubu odje sa beande nde limona olitongame la pili la bwelu o bwilo la bwelu obo bolikani botongame nde la busi boke. ²⁵ betonge nde ambwale ngelengele la wolo dje ndo la bete nde ambwale ngelengele djaho moete dje limona. molingie nde go baiyo batulu dje sa goete dje limona. ²⁶ ngelengele emoa la limona limoa la ngelengele emoa la limona emoa olingia golio li tulu odje sa dje ligwa, ogalo alakele mungu mose. ²⁷ betonge nde ambwale kasaka la bolikani obotongame la busi boke po dje alona la bana bande ba bolome. ²⁸ la tulu dje botshwe bo bolikani obotongame la busi boke, la tokoti to bolikani ototongame la busi boke, la melinda be bolikani obotongame la busi boke. ²⁹ la bolii bo bolikani obotongame la busi boke la pili la bwelu o bwilo la bwelu, moyemame nde la osola, ogi alakele mungu mose. ³⁰ betonge nde getando po dje gekoti geelu ge wolo ogelo, la besiginye nde lisigi li mo, gelenge gemoa la lisigi li mopete bo gelembo gombo, bwelu gongale mungu. ³¹ beande nde bolii bo pili dje mo, po djoanda mo mo tulu dje botshwe bo liolo, ogalo alakele mungu mose. ³² lagalo ligwa litubu li likumbo li hema dje geuganelo lisile nde, la baito ba yisalaele besile nde gotonga gelenge gemoa la mbeo djitubu odjilakele mungu mose, besile nde gotonga galo. ³³ bedje nde la gekeko gongale mose, hema la bitongelo bi mo bitubu, la balango ba mo la kadele dje mo la tokoko tosa to mo la bisigo bi mo la biemaelo bi mo. ³⁴ gea ge olupa go liolo li gekeko getongame nde la ngogo odjilonganyame la ba pate dji bolome la ba taba, la tulu djoseganya; ³⁵ liuta li gelaiselo la tokoko to mo la molongane la nganji; ³⁶ mesa la bitongelo bi mo gotubu la tokuma toanegame nde; ³⁷ getelo ge lotambe getongame nde la wolo lolo la tambe djaho djibonganyame nde la bitongelo bi mo, la baina po dje oongisa mo. ³⁸ gehumbelo ge wolo la baina boetsha la paka la malasi la liipu lilo la tulu po dje gegwe ge likumbo; ³⁹ gehumbelo ge gekeko la oti bo mo bo gekeko la tokoko to mo la bitongelo bi mo gotubu, gepuelo la geemaelo ge mo; ⁴⁰ tulu dji geamba la bisigo bi mo la biemaelo bi mo la tulu po dje gegwe ge lopango la belii be mo la bolelo bo mo; bitongelo bitubu po dje ligwa li likumbo, po dje hema dje koyangana; ⁴¹ tulu djetongame nde la bweli po dje ligwa goete gesee geelu la tulu djielu po dje alona ogangale kanga, la tulu dji bana bande ba bolome po dje ligwa li kanga. ⁴² baito ba yisalaele besiidje nde gotonga ligwa liaho litubu gelenge gemoa la mogotubu ogi alakele mungu mose. ⁴³ mose eene nde ligwa liaho litubu, la letaa, besiidje nde gotonga mo. ogalo asile mungu golakele, besile nde gotonga galo. mose esidje nde gopaa bo lipea.