¹ mose ekutanese nde liemba litubu li baito ba yisalaele la ebegise nde bo gombo: mbeo odjilake mungu gombo botongei mo. ² ligwa lietongama nde moete bekolo liambe, la mo bokolo bo bosambale bongala nde bokolo bo oogoma po dje opaa luuma gongale mungu. imbai boto inandi ogadjotonga ligwa mo bokolo bwaho eloama nde. ³ bopaongisi djiimbe moete mbele djino bangene moete bokolo bo sabata. ⁴ mose ebegise nde liemba litubu li baito ba yisalaele gombo: ⁵ osei moete djaino beeba po dje mungu. mongala mbo boto esila gopaa la botema bolo, andi adjee la boeba bo wolo la palata la gekeko; ⁶ la mogwilo la mogwelu bwilo la bwelu bo bolikani obotongame la busi boke; la bepuu be taba. ⁷ la ngogo dji bapate dji bolome la ngogo dji taba odjilonganyame lo la tokoko to kasia. ⁸ la baina po dje tambe la biya bi malase po dje baina boetsha la paka dje malase la liipu lilo; ⁹ la babanga ba soama la babanga obaandame la efode la litunga. ¹⁰ baito batubu ba bweli moete djino badjee batonge biya bitubu obiasila mungu golaka gombo; likumbo ¹¹ la geamba ge mo la geindjelo ge mo la lilango li mo la babaya ba mo la ikoko dji mo djisa la bisigo bi mo la biemaelo bi mo; ¹² liuta li tokoko to mo la molongane la nganji la tulu djomoma mo; ¹³ mesa la ikoko dji mo la bitongelo bi mo bitubu la tokuma topangame nde; ¹⁴ getelo ge lotambe la bitongelo bi mo la tambe dji mo la baina po dje getelo ge lotambe; ¹⁵ gehumbelo ge paala malasi la ikoko dji mo gesee gemoa la baina boetsha la paka la malase ba lipu lilo la tulu po dje gegwe ge likumbo; ¹⁶ gehumbelo ge boeba boohumba la sale dje mo la gekeko gesee gemoa la ikoko dji mo la bitongelo bi mogotubu la gepuelo la geemaelo ge mo; ¹⁷ tulu dji geamba la bisigo bi mo la biemaelo bi mo la tulu po dje gegwe ge geamba; ¹⁸ bolelo bo likumbo la bolelo bo geamba la bolii bo mo; ¹⁹ tulu odjitongame la bweli bo ligwa mo gesee geelu, la tulu djielu po dje alona ogangale kanga, la tulu dji bana ba bolome bande po dje ligwa liabo li bokanga. ²⁰ la gombisa liemba litubu li baito ba yisalaele betotoge nde gongale mose. ²¹ la gombisa betotoge nde, boto la boto la kamo dje botema bwande, la boto la boto ekanise nde gi goete botema bwande, bedje nde la boeba gongale mungu po djolonganya likumbo li gesonganelola po dje ligwa li mo la po dje tulu djielu. ²² lagalo bedjee nde bolome la bogali, bo batubu bembe nde la kamo goete betema beabo bedje nde la bekomo la makutu la pete dji gelembo laa benyololo obepiise bio po dje ngingo la biya bi wolo moete bilenge bitubu, boto la boto epeende mungu boeba bo wolo. ²³ boto la boto embende la pili imbaimbo dje bwelu bwilo imbaimbodje ndelu imbai dje bolikani obotongame la busi boke imbai bepuu be taba imbai ngogo dji pate dji bolome imbai mboso dji taba odjilonganyame, bedjee nde lalo. ²⁴ boto la boto ogagelane gopaa palata imbaimbo gekeko edjee nde la lo ambo boeba bo mungu la boto la boto ono alongane lo po dje ligwa edjee nde la lo. ²⁵ bogali batubu la bweli bwabo betonge nde busi la baago babo la bedjee nde la busi bwaho obotonge bo imbai la pili imbai la bwelu bwilo imbai la bwelu imbai busi boke la bolikani. ²⁶ bogali batubu ba bweli , imbaimbo belembe nde, betonge nde busi la bepuu be taba. ²⁷ baito ba pelo bedjende la babanga ba soama la babanga po djoandama po dje efode la po dje litunga, ²⁸ la biya bi malasi la baina po dje tambe la po dje baina boetsha la po dje paka la malasiba liipu lilo. ²⁹ bolome la bogali batubu, baito ba yisalaele, obangale la kamo goete betema, po djodjaa la biya po dje ligwa olipe mungu gesemba mo bonywa bo mose gombo motongame bedjee nde lalo ogalo aimidje bo gopaa. ³⁰ mose ebegise nde baito ba yisalaele gombo; letei, mungu aasila gota la lina li besalele, bona golome ga uli, bona golome ga hulu, mo lisego li yuda. ³¹ adjalisa ge la opia bo boenda bo iongiaongia la bweli la olubanya la oongomanya la bweli bo bagwa batubu, ³² po djokanisa bagwa batubu balo la po dje bagwa ba wolo la palata la gekeko, ³³ la otinya babanga po djoandama la po djotinya basigi mo ikoko la po dje bagwa ba bilenge bitubu. ³⁴ epee nde bweli bwande la oholiaba, bona ga ahisamaki ga golome moete lisego li dani gombo bagelane go laisa. ³⁵ aadjalisa bo la bweli bootonga bagwa bilenge bitubu, ligwa li olema, la ligwa li otonga la bweli, la ligwa li osola pili la bwelu bwilo la bwelu bo molikani obotongame la busi boke la ligwa li ologa, imbaimbo ligwa li gelenge inandi geasina.