¹ mungu ebegise nde mose gombo: tinyaa bitelo bi babanga biele gelenge gemoa la odji pelo, la emi djeiga nde moete bitoo bi baolo biaho baogi bembe nde moete bitoo bi baolo obipelo obi bune age. ² semogaa la nongo, la lilaa go ngolo dje sinai la nongo la emalaa gotie ngolo gopelo djai. ³ boto laa omoa apalile ago lilongo la bingosidja boto laa omoa atoenega gotie ngolo djaho tubu. belongo be pate to ngombe pelo gopelo ngolo djaho. ⁴ lagalo mose etinyende bitoo bi baolo bi babanga baaho baele gelenge gemoa la obapelo ge etotoge nde la nongoongo la geoho aalila ngolo dje sinai, ogi alakele mungu ge, la eose nde bitoo bi baolo bi babanga baele mo djoogo djande. ⁵ mungu esuluge nde se moete lipata la mose eemale nde gesee gemoa laande, la etee nde lina li mungu. ⁶ mungu eete nde gopelo djaande la geoho aahamoga gombo: mungu, mungu engale iongiaongia dje ngandi la botema bolo, apoe ligege saga la eete la oboto la loongene. ⁷ eongomanya nde oboto bwande po dje koto la koto, la emesegilia nde obe la osundja la lisumo, la mbo apalongise obe laa djea, la mbo epaa nde likamba libe li baise goliolo li bana la bana ba bana ogalo adjoiga mo goete basego baseso too basego banei. ⁸ mose etumele nde se la geoho aasembogela. ⁹ ge ebee nde gombo, ogiogi imbaimbo djelongane moete baiso bago, ee mungu, andi djesembogele age sidjaa mungu aee goete djiso, laa galo angale bo baito ba betshwe bepia. mesegilia obe bwiso la lisumo liso, la ossesu ambo gemengi giago. ¹⁰ ge ebee nde gombo: letaa, djetonga nde oimiliana. djetonga nde bagwa ba bieniselo gopelo baito bago batubu mo gelenge ogetia motongame moete bei betubu, la ati moete lisego limoa, la baito batubu bongale goete djaabo beleta nde ligwa li mungu po dje mbo mongale loo lo bogasa olwadjotongemi ago gesee gemoa. ¹¹ oletidja mwadjolakelemi age bwaina. letaa, djenyenya nde baamola la bakanana la bapeliji la bahiwi la bayebusi gopelo djaago. ¹² ngalaa la liange po djaago age angene gombo otonga oimiliana bo baito ba gehuma mopa ? eage gombo motongala yandi goete djaago. ¹³ boosegisi ndi bihumbelo biabo la bobunindi bisigo biabo la bootinyi ndi bikeko bi asela biabo, ¹⁴ ( po dje mbo bopasembogele iongiaongia djasina, po dje mbo mungu, lina liande, isinogela dji obatela, engale iongiaongia dji ligege li gobatela) ¹⁵ molitina li mbo bototonga oimidjama bo baito ba gehuma geaho, la aho adjokokodja bo gombise ba mungu djabo la gwadjo humba bo beeba gongale mungu djabo la goadjotama bo age, gombo botola ndambo dje boeba bwabo, ¹⁶ lambo boosee bana ba bogali babo po dje bana ba bolome obatia bengale bago, la mbo goadjokokoga bana ba bogali babo gombise ba mungu djabo, gombo bakokodje betema be bana ba bolome bago ati gombise ba mungu djabo. ¹⁷ bingotongela ba mungu odjilangole. ¹⁸ boolonganya nde gelambo ge tokuma otodjange giambe. bolaa nde tokuma otodjange djiimbe moete bekolo bosambale, ogalo alakele djeelakela age, mo gee ogeponame lo mo songe dje abibu bonene nde goete ejipito. ¹⁹ bana ba bogolo batubu bengale baami, la bana ba bolome ba bolongo bwago bo nama, bana ba pelo ba namadji pate laa ngombe. ²⁰ bona ga pelo ga punda la bouhisha nde la bona ga pate, la imbaimbo botilembe gouhisha mo bobuna nde ngingo dje mo. bouhisha nde bana ba bogali batubu moete bana bago ba bolome. omoa apaenege bwasi gopelo djami. ²¹ botonga nde ligwa moete bekolo liambe la mo bokolo bo bosambale boogoma nde. la moete gee ge obusha bashaa po dje ologa la gee ge otshwa boogoma nde. ²² bobatela nde gelembo ge posho la djuma djipelo dji basangu la gelambo ge omoma go lio li gelanga. ²³ bolome bago batubu benena nde gopelo mungu iongiaongia, iongiaongia dji yisalaele, mbala iseso moete gelanga. ²⁴ po dje mbo djetotola nde basego gopelo djago, la djeelesha nde bolelo bwago bolene. boto laa omoa apangale a kamo dje gehuma geago, aho adjoa age po dje oenana la mungu iongiaongia djago mbala iseso moete gelanga. ²⁵ bopapee boeba bo baila baami ba geambe gesee gemoa la boeba bo gelambo ge geetelo gepatiale kino nongo. ²⁶ boodja nde la tuma to pelo twago to gelanga geago goete mbele dje mungu iongiaongia djago. bopalambe bona ga taba odjangale moloma balomi ba inango ande. ²⁷ mungu ebegise nde mose gombo: siginyaa baogi bee. emi djaasiidja gotonga oimidjana bwago la yisalaele mo gelenge ge baogi bee. ²⁸ ge embe nde go gesee gemoa la mungu bekolo betuu benei lotigo loha. ge atile tokuma la atimwe badje. ge ambwale eige nde go gesee ge baogi ba oimidjama ogalola bebeko liu. ²⁹ mose esuluge nde mo ngolo dje sinai, mo bisee biele bi bieniselo bi baago bande. gwaseloge ge ngolo mose atilube gombo logogo lo osio bwande bombende mongenga po dje mbo embende mosolola la iongiaongia. ³⁰ alona la baito batubu ba yisalaele beene nde mose la letaa, logogo lo osio bwande loele nde angandu, la bebange nde goemala laande. ³¹ mose etende bo liogi, la alona la baito bapelo ba linginda bebinoge nde laande la mose ebegise nde bo. ³² la gombise baito batubu ba yisalaele beemale nde la geoho aalaka bo mbeo djitubu odjibegise mungu ebegisa liemba li sinai. ³³ gosile mose gosolola abo geoho aata tulu go osio bwande. ³⁴ la imbaimbo mose egote nde gopelo mungu po djosolola laande, ge etotole nde tulu djaho kino ogalo anene ge. gonene ge la gobegise ge baito ba yisalaele ogalo alakelame ge, ³⁵ baito ba yisalaele beene nde osio bo mose gombo logogo lo osio bo mose bongenge nde. lagalo mose ete nde tulu djaho go osio bwande mbala djasina, ogalo agote ge po djosolola laande.