¹ emalisa alona lisego liago la bana bago a bolome mo lilongo, totoga goete baito ba yisalaele gombo botongelei lambo djakanga; o moete alona la bana bande ba bolome, nadaba la abibu la eleajala la itamala. ² botongela nde alona bogolo la boli bwagotulu dje loongene la luuma la po dje olo. ³ boosolola nde la baito batubu ba bweli bo ligwa, bee baapeemi botema bo bweli, gombo batonge tulu dje alona po dje mbo babulise ge po djai mo ligwa li bokanga. ⁴ ane tulu odjadjotonga bo gombo, litunga laa efode la tulu dje yesasa la kasaka adjetongame la osola la tulu dje botshwe la bolii. betongela nde alona bogolo la boli bwago la bana bande ba bolome tulu dji loongene gombo batongelemi ambo djakanga. ⁵ beosa nde ambwale wolo la pili dje bwelu bwilo la bwelu la bolikani obotongame la busi boke. ⁶ betonga nde efode bo wolo la pili la bwelu bwilo la bwelu la bolikani botongame la busi boke, betonga nde mo la bweli bolo. ⁷ mongala nde la bisege biele po dje baele obaandame go lio li mo mwele gombo mokoke goandana gesee gemoa. ⁸ bolii bwe botongame la bweli, bo goliolo li mo po djoanda mo, motongama nde mo gelenge ge efode la motongama nde la bia biaho bi efode obitongame a mo, gombo; wolo la pili la bwelu bwilo la bwelu bo bolikani obotongame la busi boke. ⁹ boosa nde babanga ba soama baele, la boosa nde baina ba bana ba bolome ba yisalaele. ¹⁰ baina ba baito baaho liambe bengala nde mo libanga limoa la lina li liambe olitiale lo lingala nde mo libanga liasina, mo bolongo gelenge gemoa ogalo abotame bo. ¹¹ bootinya nde lisigi mo babanga baele baaho mo baina ba bana ba bolome ba yisalaele gelenge gemoa ambo botinyi bo basigi etinyatinya nde mopete mo gelembo. bolingia nde mo bibundeli obilogame lo la bolii bo wolo. ¹² booanda nde babanga baele baaho la bisege bi efode po dje baele gombo bangale babanga ba geeniselo po dje bana ba bolome ba yisalaele. alona ambwale etola nde lina liabo gotie baele bande gopelo mungu po dje geeniselo. ¹³ boologa nde bibundeli bi bolii bo wolo, ¹⁴ la benyololo bele be wolo belo bienege nde ambo bolii, la boanda nde benyololo obienegele gombale djoandela. ¹⁵ botonga nde litunga li bweli bolo po dje gekateli. botonga nde mo gelenge gemoa la ligwa li efode, la botonga nde mo la wolo la pili la bwelu bwilo la bwelu bo bolikani obotongame la busi boke. ¹⁶ osa bo mo bogelana nde la olene bo mo la mobwanyama nde mo mwele. osa bo mo bongala nde ndambo dje beonde. ¹⁷ boosela nde belongo benei be babanga ba mo. bolongo bo pelo bongala nde go salali la go topaji la go balekete. ¹⁸ bolongo bo bele bongala nde go emelode la go safili la go yahalimi. ¹⁹ bolongo bo beseso bongala nde go wakiti la go agate la go ametusiti. ²⁰ bolongo bo benei bongala nde go belulu la go soama la go yasipi. mo gotubu moandama nde mo biandelo obilitame lo mo bolii bo wolo. ²¹ babanga liu la baele bengala nde, mosiginyame la lina li bana ba bolome ba yisalaele, mongala nde ambo mepete me gelembo, gemoa la gemoa mosiginyama nde la lina li mo po dje basego liu la baele. ²² botonga nde benyololo be wolo lolo bilogame ambo bolii po dje tulu dje gegwa. ²³ botonga nde ambwale mepete bele be wolo po dje libenga, la botaande mepete bele beaho go lio djele li libenga. ²⁴ botaa nde bolii bo wolo bwaho bele goete mepete bele goete lio li babenga baele. ²⁵ booanda nde go baiyo baele ba bolii bwaho gombale dje biandelo l'hologame la bolii bo wolo, la booanda nde mo gopelo gombale dje bisege bi efode po dje baele. ²⁶ botonga nde mepete la wolo djele la bota nde mo go baiyo baele ba libenga go lio li mo goeta, go ngonga dje efode. ²⁷ botonga nde mepete be wolo djele la booanda nde mo gopelo gombale bisege bi efode po dje baele ba lio gose dje mo, moandane la bolii botongame la bwelu. ²⁸ beanda nde libenga la mepete be mo gongale mepete be efode la bolii bo pili gombo molale goliolo li bolii bo efode obotongame la bweli, lambo libenga litootoga go efode. ²⁹ lagalo goadjogota alona go gesee ogeete la olo etola nde lina li bana ba bolome ba yisalaele goliolo li botema bwande goete libenga po dja gekateli ambo gekaniseli ge loongo po dje mungu. ³⁰ botaande ulimo la tumimu goete libenga po dje gekateli, la mwadjongala goliolo li botema bo alona, aho adjogota ge gopelo dje mungu. lagalo alona etolande gekateli ge mbeo dji baito ba yisalaele goliolo li botema bwande gopelo mungu dje loongo. ³¹ botonga nde tulu dje sa tulu po dje efode la pili. ³² ndole engala nde moeta la eta dje mo goete botshwe, la bolelo bo ndole djaho boindjama nde la bolii oboandame gelenge gemoa ambo lipoolo li tulu dje gimo, mo litina li mbo mopakoke gohalega. ³³ botonga nde limona gosuka dje mo gose. botonga nde mo la pili la bwelu bwilo la bwelu boaho bolingia nde golio litubu odje osa, la botonga nde ngelengele dje wolo goete dje limona. ³⁴ ngelengele dje wolo emoa la limona limoa, ngelengele dje wolo emoa la limona limoa molingia nde golio li tulu odje sa. ³⁵ alona ebata nde mo po dje ligwa la lolusa lo mo loana nde aho adjogota ge go gesee ge loongene gopelo mungu, la goadjonena ge, gombo atongba. ³⁶ botonga nde getando ge wolo lolo la bootinya nde lisigi li mo ambo lisigi li lopete li gelembo gombo gelemo gongale mungu. ³⁷ booanda nde mo la bolii bo pili gongale tulu dje botshwe. mongala nde gopelo tulu dje botshwe. ³⁸ mongala nde gopelo osio bo alona, alona ebata nde basumo obadjotonga baito ba yisalaele aho adjopaa bo luuma gongale boeba bwabo. mongala nde loongo gopelo osio bwande gombo bakoke go yambama gopelo mungu. ³⁹ botonga nde kasaka dje bolikani obotongame la busi boke, la botonga nde tulu go botshwe bo bolikani obotongame la busi boke, la botonga nde bolii obo yeme bo la osola. ⁴⁰ botonga nde kasaka la bolii la tokoti po dje bana ba bolome ba alona. botonga nde mo po dje loguma la po dje gelemo. ⁴¹ botaa nde mo gongale alona lisego liago la bana ba bolome bande gesee gemoa la ge, la boogilitsha nde bo la boolupisa nde bo la boogotsha nde bo mo ligwa gombo batongelei ambo djakanga. ⁴² botongela nde bo melinda me bolikani po djomama bopona bwabo. mo mwiga nde mo gesegese la mobabongo. ⁴³ alona la bana bande ba bolome bebatande milinda aho adjogota bo go hema dje gesonganelo, aho adjoiga bo bagu go gehumbelo ge boeba po djotongela mo gesee ge loongene gombo batobata obe la batshongba. mwe mongala nde bobeko bo loongo po djaande la po dje lisego liande gombisa djande.