¹ engaa mbo boto eiba ngombe too pate, la mbo eloa ambo ge too eendja ge, ebinolia nde ngombe tano po dje ngombe, la pate djinei po dje pate. moete nde golo mombo afutee, la engala mbo atsha gea, la eendja nde po dje bwiba bwande. ² engala mbo boto ga bwiba eugana gee geobuka mbele gombo agote la etobama kino golowa ge, ati loo laa lomoa lopangae goete djaande. ³ engala gombo loha lolibwamela ge andi euya nde getumbo ge osinga po djaande. ⁴ engala mbo nama adjeibe ge eugana ambo moete luuho mo djoogo djande , imbai mbo ngombe imbai mbo punda indai pate, andi ge boto gaho ebinolia nde mbala djele. ⁵ mongala mbo boto etonga gelanga gyande ge basangu go mbo gelaame, too mbo etia gebwele gyande goa goola goete gelanga ge boto gasina, andi ge efuta nde goeta olo goete gelanga gyande ge basangu. ⁶ mongala mbo djiimbe djenena goete bekeke goete bolelo bo gelanga lagalo djuma dji baambu toodjuma aditi djaabunega djaasegama la djiimbe, andi ogaa onganesa djiimbe efuta nde mo gotubu. ⁷ mongala mbo boto gasina epaa ambo boto bioto bi lofalanga too mbo bia gombo abatele bio, la ogapipolama mo goete mbele dje boto gaho, lagalo, engala mbo boto ga bwiba eugana , la efuta nde mbala djele. ⁸ engala mbo boto ga bwiba atshugane, la ngene ga mbele esembogela nde gongale mungu gombo aenese ndole imbai mbo ge aata djoogo djande goete biya bi bogali gaande. ⁹ moete mbeo djitubu djoongbanela, imbai mbo mongale po dje ngombe imbai mbo punda imbai pate imbai tulu imbai gea ge geni gelenge gelimega, la boto ebea gombo, momwe mwaenega, lagalo loo lo bo baele lwenega nde go pelo dje mungu. ge ono ogasuludja mungu go se efuta nde bogali gaande mbala djele. ¹⁰ mongala mbo boto omoo epaa boto gasina punda djaande too bona ga ngombe too nama dje gelenge gyasina gombo abatele, laa mbo nama djaho engba ambo, laa mbo ebendega gesee, too mbo beiba ge, ambo boto atshene, ¹¹ olapisama mo lina li mungu motongama nde moete bo baito baele, la ogambe mobatela biima la biya ebea nde gombo atite djoogo moete biya bi mbogo djaande; ngene la elo nama eimidja nde goolapisama bo mungu agoi afafute ale. ¹² engala mbo djeibelame nde gongale ge, efuta nde elo nama gongale ngene. ¹³ engala mbo nama behalende ge, eenisa nde gelembo po dje mbo atshofuta nama adje halege lo. ¹⁴ engala mbo boto omooebekisa boto gasina nama emoo, la engala mbo elo nama ebendega idjolo laa gombo engba indi ngene la nama ati ho, ekoka nde obinogesela ge. ¹⁵ engala mbo ngene engale ho mopagelane gofuta. engala mbo nama ebekisame nde, loeti lo obekisa lokokisama nde. ¹⁶ engala mbo golome omoo eita bonaogali agatshiambo aaluba bolome, ko elala laande, efuta nde boongo bwande la eosa nde ge angale bogali gaande. ¹⁷ engala mbo ise epea go faa ge la bogali gaande efuta nde bioto okokana la bioto bi libala bi baito abatshia baaluba bolome. ¹⁸ bopakoke gotia bolemba bo ogali gombo auhe. ¹⁹ boto agangolapa la nama eudja nde getumbo ge lingba. ²⁰ ogaadjo paa bweba gongale mungu djasina eudja nde getumbu ge lingba. ²¹ bofanyokole bogenda, la bofa oise ge looso; po dje mbo bombindi begenda go boi bo ejipito. ²² bopaoishe bogali ogaangbele bolome looso, la bona ga getie. ²³ engala mbo boowisi bo looso, lambo bedja gongalei, djooa nde bima byabo. ²⁴ la osundja bwai bwenegela nde, la djelowendenu la ilonde; bagali baino betiala nde bitie, laa bana baino. ²⁵ engala mbo boobeka bioto gongale lisego liami, la babola obangale gongale age, bopangale gongale bo ambo abatonga bioto. bopalengele gongale ge mombo ape age botalia. ²⁶ engala mbo boobeka tulu dje mbogo djaago, boobinogesela nde ge felo dje mbo liolo lidje se; ²⁷ po dje mbo engale o la tulu elo emoo, mwende tulu odjaindja ge la bindo, gei geadjolala ande? engala mbo etaa bima gongalei, djoelela nde ge, po dje mbo djengale ogaoela baito ngandi. ²⁸ bofabone mungu; la bofabone bana ba bolome ba lisego lyago. ²⁹ bopalengele gopeemi boeba bo tuma to gelanga, laa biya obiendja age. boofendei bona ga pelo moete bana bago ba bolome. ³⁰ botonga nde ambwale galo moete ngombe djago dji pelo, la moete nama djago dji pelo, betiala nde bekolo bosambale gongale inango abo; bwina bo bekolo bonaani age kopeemi laabo. ³¹ boongali ndi gongalemi baito ba bwelu. bopali benugu abehalege lo goete gelanga; enu boofi ndi mbwa beo benugu