¹ letaa bebeko abengoletsha boletsha bo, ² engala mbo bosomba bokobe bomoa boto ga baebele, betonga nde bosala bilanga liambe; kasi gelanga age bosambale enena nde bwasi lotsha ofuta gea. ³ egota ge angene, enena nde ge angene; engalambo embende la bogali, bo la bogali gaande benena nde. ⁴ engala mbo bokondi bwande nde bofee ge bogali, la ge agabota bona golome too mombo bonaogali, bogali la bana bande bengala nde ba bokondi bwande, la enena nde ge angene. ⁵ engala mbo bokobe ebea mombo; djelembe ngene djami, bogali gami la bana baami ifalembe onena bwasi. ⁶ lagalo ngene djaande eande laande gofelo ye mungu, la esegesa nde ge gofelo bome to mombo gongale isandu ailene, la ngene laande ebunda nde ge litoi, la bokobe engala nde po dje loongo mosalela ge. ⁷ engala mombo boto omoa eendja bosea bwande mombo angale bokobe, bosea bwande afa kbege galo akbega bekobe. ⁸ engala mbo ati sepelese ngene laande ogo aose ge mombo angale bogali gaande pendja, lagalo esidja nde ge mombo baose ge; kasi afakoke oendja ge gongale bepadja, po dje mbo atitongele ge bosembo. ⁹ engala mombo bogali agaembe bo ofaa la bona gaande ga golome, etonga nde gongale ge lokola bobeko bo basea. ¹⁰ engala mombo eosa bogali gasina, afaose gea ata gemoa po ye bogali ga ogolo moete bia, laa tulu, laa go kengo afa gote laande mbele. ¹¹ la engala mombo atitonge galo moete bio bia bisaso po dje ogo bogali; enena nde la ngofuta gea la ngofa bioto. ¹² agaangotoba boto la oloa ge loongo, belo nde ambwale ge. ¹³ mongaa mbo atilambele ge, ati iongiaongia esiye nde ge go kbase go djoogo djaande, lagalo emi djeepona nde gesee agekoke ge goisama ge angene. ¹⁴ la mbo engaa mbo boto etonga la ko gombo aloe boto ga bweli, bototola nde ge go gehumbelo geami gombo angbe. ¹⁵ ogaangotoba ise ande imbai mbo inango ande elowama nde. ¹⁶ ogaadjopinola boto, imbai mbo oendja ge, too gombo obunda ge po djaande elowama nde. ¹⁷ ogaadjobona ise gande too mbo inango ande elowama nde. ¹⁸ mongaa mbo bolome bepulanya la mbo omoa etoba liinga ande libanga too otoba ge likofi la mbo boto gaho ati singe, la mbo ge agaa pota mo gelalo, ¹⁹ la boto gaho etotoga ambo eenda ambo go lusa la litali lyande, ati agatobe ge elonga nde. ati efuta nde mo gee agedjange ge ligwa la ebatela nde ge ogalo angouha ge botubu. ²⁰ engala mbo boto etoba bokobe bwande bo golome too mbo bokobe bwande bo gogali ibolo, la engaa mbo bokobe engba moete djoogo djande, ge eudja nde getumbu. ²¹ engala mbo bokobe etiala bwina bomoa indai biina bele, ati ngene afaudje getumbu po dje mombo bokobe bwaho engale bioto byande. ²² engala mbo bolome bengbana la etoba bogali indi engale la lieme, lagalo lieme lio kootoga, la gombisa obe botiigele ogo bogali, andi agatobe bogali efuta nde gongale ngene a bogali ogalo angobea ngene a bogali, la efuta nde ogalo angokata baito abasambesa lo. ²³ kasi mongala likama, boofa nde ouha po dje ouha. ²⁴ liso po dje liso, lino po dje lino, djoogo po dje djoogo, iolo po dje iolo. ²⁵ ofia po dje ofia, pota po dje pota, lififi po dje lififi. ²⁶ engala mbo boto omoa etoba bokobe bwande mo liso, golome too mombo bogali, la elimesa liso lyande, etotola nde ge mo boloko ge kongala pamba, po dje aafuta liso lyande. ²⁷ la engala mbo etaa bokobe bwande lino se bolome too bogali, etotola nde ge mo boombo ge kongala pamba, po dje ofuta lino lyande. ²⁸ engala mbo ngombe emoa etoba boto omoa la lisee liande too bogali omoa, la mbo gombisa ge kongba, ngombe elo betinya nde ge ngingo, bonugu bwande bofale, la ngene ga ngombe bafa fee ge getumbu. ²⁹ kasi, engala mbo ngombe etobame nde felo, la mombo belubese nde ngene, la ngene ati lembe okengela ngombe djaande, lagalo elo ngombe betoba nde ge babanga la oloa ge, engala mbo eloa boto omoa too mombo eloa bogali omoa, lagalo ngene laande eudja nde getumbu ge lingba. ³⁰ engala mbo betinyela ngene loeti po dje mbo batsholoa ge, efuta nde bia bitubu abingolengela be lengela ge. ³¹ gee gengotoba ngombe etoba bona golome too bosea, bo bobeko botongama nde; kasi engala mbo ngombe etoba bokobe bo golome too bo gogali , befaa nde bioto betuu besaso gongale ngene la bokobe la ngombe ge koloama. ³² engaa mbo ngombe epwelisa bokobe, imbai gogali imbai golome, ngene dje ngombe efuta nde gongale ngene a baito bo bioto bi ba sekele betuu besaso, la betoba nde ngombe djaho la babanga. ³³ engaa mbo boto etia lishaa baale, too gombo boto ebusha lishaa atilufe lio pe engaa mbo ngombe too punda euma ambo goeta ye lio, ³⁴ ngene a lishaa efuta nde mo. ge efaa nde bioto bi lofalanga gongale ngene dje nama odjaasinga engala nde djaande. ³⁵ la mbo ngombe dje boto omoa epwelisa ambo ngombe dje boto gasina la eloa lo, ati beendja nde ngombe odjaangotiala la beganya nde loeti lo mo, la beganya nde odjaasinga gelenge gemoa, ³⁶ la mbo molubana ambo mombo ngombe djaho embe nde mopwelisa felo, la mbo ngene djaande atimbe mobatela ge goete geamba, ati efuta nde ngombe la ngombe adjaasinga engala nde djaande.