¹ lagalo mungu agaaselenga bee baogi bee batubu, ge agaabea mombo: ² emi djengale ngene, mungu djaago, aganenese age go boi bo ejipito, go mbele dje bokobe. bofangale la mungu djasina gofelo djami. ⁴ bofatonge gelimi too mombo gekeko gemoa mo biima la bia obingale go liolo la golola, la abingale mos se la gotie nele, la obingale goete badje la gose nele. ⁵ la bofa foe baloi se go felo dje bio bikeko, la bofasaele bio; po dje mbo emi, ngene mungu djaago, djengale mungu emoo dje logoto, afaa getumbo po dje lisumu obanda la ise laa gongale bana tee mo nda ene isaso la monda ene dje inei mo baito batubu abati molembemi, ⁶ la ende moto ga oboto tee gongale ndaa koto gongale abalembemi la ababatela bebeko biami. ⁷ bofaose lina li mungu djaago pamba; po dje mbo iongiaongia afasidje gofaa getumbu gongale boto agaangoena lina liande pamba. ⁸ gelegiaa bwina boogoma po dje libondja. ⁹ botonga nde bosala bekolo liambe, la bosilesa nde bbo botubu. ¹⁰ mombo bwina bo bosambale moende bwina bo oogoma bo ngene, mungu djaago: bofatonge bosala ata bomoo, engala age, engala bona gaago ga golome ata bosea bwago, ata bokobe bwago ata bosali bwago bogogali, ata nama djaago laa bogenda abongale mo bome bwago. ¹¹ po dje mbo bwina abo liambe mungu agatonga go liolo la goni nele la badje abalene la bitubu abingale goeta, la ge aga ogoma bwina bo bosambale: po dje mo ndapambole mungu bwina bo oogoma la ge agaa bondjela bo. ¹² memiaa ise ago laa inango ago po dje mbo bekolo byago bengale besa mo gehuma mo bekolo abefee ngene mungu djaago efaage goni gehuma. ¹³ bofa loe. ¹⁴ bofalembe bogali ga boto. ¹⁵ bofa ibe bia biambogo. ¹⁶ bofa selenge mbeo dji boela po dje bogolo la boli bwago. ¹⁷ bofalembe bogali ga ndeko djaago, la bofa lole mbele dje ndeko djaago, bofalembe bokobe bo ndeko djaago la bosali bwande bo gogali, ata ngombe djaande, la punda djande adji bagali, ata gea gemoa ge ndeko djaago. ¹⁸ lisego litubu bo aba oa losele lopia lo kaki la bageigei la losele lolilonge ,bo abaena ogenegu gotie ngolo bogi boende nena bo abaabanga la bo ababilima, la bo abasega mbisa oa gola la ngolo. ¹⁹ bo ababea la mose mombo: selengaa laiso age lamene, la tooande age; sidjaa mombo mungu atshoselenga laiso, la booha bombo tooande goongba. ²⁰ mose agaabea la lisego mombo: ingongai la booha; po dje mbo moende po dje omekenu mombo bolubimbo mungu aadja, la mombo botshongali la booha gofelo baiso bande, la mombo botongi basumu. ²¹ lisego aba sega mbisa; lagalo mose agaasega gongale londundugo lo fui go mbe mungu. ²² ngene agabea la mose mombo: bobea nde ambwale gai gongale bana ba yisalaele:boenindi mombo djeselenge nde laino ototoga goliolo. ²³ bofatongi mungu dji bioto, la mungu dji wolo po dje ogelanesa laami, enu ingotongi galo. ²⁴ bofoelendemi lifete mo mbiti, gotie mo boohumbelendemi libondja li batondi; nama djaago la ngombe djaago bisee bitubu abingolubesa djelubesa lina liami, djeedjande gongale age la djepambola nde age. ²⁵ engala mbo boemaleselemi lifete li itale bofatonge lio la itale yolonganya; po dje mbo boetesa siso djaago gotie itale mosegande mo. ²⁶ bofaage go lifete liami la bilenge bi oota, la litina limbo bofona boago botshoenega.