¹ Omu siku makumyabiri n'ene z'ogo mwezi, abana b'e Israeli bajira endeko, bayamabala ebigunira, bachishiga n'akachulo, oku yerekana oku rhalya kwabo. ² Obuko bw'aba Israeli, bachikula oku babo bagandi mashanja, baderha n'okuhungama ebyaha byabo n'obubi bwa b'eshe. ³ Amango bagendekera, basoma omu chitabu ch'amarhegeko ga Nahano, Nyamuzinda wage, amango g'echichira cha kane ch'omu lusiku, n'agandi mango g'echichira cha kane bahungam'ebyaha byabo n'okufukama embere za Nahano, Nyamuzinda wabo. ⁴ Yoshuwa, Bani, Kadimieli, Shebaniya, Buni, Sherebiya, Bani na Kenani, bashonera oku chishasha ch'Abalawi bayakuza n'omulenge gunene emwa Nahano, Nyamuzinda wabo. ⁵ N'Abalawi Yoshuwa, Bani, Kadimieli, Hashibineya, Sherebiya, Hodiya, Shebaniya na Petaniya baderha: Muyumuke, muharamye Nahano, Nyamuzinda wenyu, w'emyaka n'emyaka! Likuzibwe ezino lyawe ly'erenge, buno liri likulu lilushire emigisho n'obukuze boshi! ⁶ Wenine, we Nahano, wenine, walemag'omu chanya, empingu n'empingu n'enfola miherho zoshi, egulu lyoshi n'ebyamo byoshi, enyanja zinene na byoshi bibamo. Wehana akalamo oku bintu byoshi, n'enfola miherho z'empingu zana fukama embere zawe. ⁷ W'oyo, Nahano Nyamuzinda, walondolaga Abramu, wamukula e Uri y'e Kalideya, wamuyirik'ezino lya Abrahamu. ⁸ Wabona okw'omurhima gwage gushinganene embere zawe, wajira echilagane haguma naye, wamulaganya oku wagabira eburha lyage echihugo ch'e Kanana, n'ech'Abahiti, n'ech'Abamori, n'ech'AbaPerizi, n'ech'Aba Yebusi, n'echa Girigasi, wanahikiriza omwazi gwage, bun'oba w'okuli. ⁹ Wabona amalibuko gaba darha amango bali e Misiri,Wayunviriza n'endulu zabo z'okuhema oburhabale amango baliri ebwa nyanja y'omuduku. ¹⁰ wajira ebisomerenwe n'ebirhangaza oku Farao, n'abambali bage n'olubaga lwage loshi lw'omu chihugo, bulala walimenyere omujinya bakazagi kolesa muba darha, wayerekana erenge lyawe kuhika zene. ¹¹ Wakabula enyanja nene embere zabo, n'oku shabuka omu charagati k'enyanja nene; aliko bagera omu muhengere, nk'abale lya yubir'omu menji ganene, abalemaga bayinja babakulikire. ¹² Wabalambagiza ezuba omu chilundo ch'olwa kungu, n'omu budufu omuchilundo ch'omuliro chagendaga chabakolezeza omu njira yoshi bagendagamo. ¹³ Kandi wachima oku ntondo ye Sinayi, washambala nabo oli n'omu chanya, wabaherez'oburhegesi bwawe bw'obushinganyanya, n'amarhegeko g'okuli, n'amahano gawe goshi gashinganene. ¹⁴ Wabamenyesa olusiku lwawe lukengwa lw'e Sabato, n'oku luhereza Musa, omukozi wawe, amarhegeko, n'amahano n'oburhegesi. ¹⁵ Wanabahereza, ebiryo byarhenga omuchanya, omugati amango balishalikire, wabaherez'amenji g'omu bale, amango bankayunvirhe enyorha. Wana babwira mpu bagwarhe echihugo wabalaganyaga mpu njiwabahereza. ¹⁶ Aliko badarha baj'omu buchibone n'oku dunda ebikanyi by'egosi. Barhayunvaga amarhegeko chiro, ¹⁷ bamalahira oku makenga, n'oku yibirira amenja wabajiriraga. Bahindamula ebikanyi by'amagosi gabo; n'omu bugome bwabo, bachiha echilongozi mpu abagalule omubuja bwabo. Aliko w'oyo, oba Nyamuzinda obabalira duba, munya bonjo nawa lukogo, oba kubuyabuya omu kukaliha kw'ebyo byoshi oli mwinja, orhana balekereraga chiro, ¹⁸ chiro n'amango aKanyena n'oku derha: Lolaga Nyamuzinda werhu warhukulag'e Misiri, bana kujachira bwenene. ¹⁹ Omu lukogo lwawe lunene, orhabalikiriraga omu mpinga, echilundo ch'olwakungu chirhabajahikaga ezuba omu lugenzi lwabo, n'ech'omuliro chirhahusaga oku bakolezeza obudufu omu njira bageragamo. ²⁰ Wabashoboza Muka wawe mpu abahereze enkengero zinja, Amana gawe garhakalaga oku bunu bwabo, n'eri bankayunvirhe enyorha wanabaha amenji banywe. ²¹ Wabalanga omu mpinga myaka makumi mane, ntacho babulire, Emyambalo yabo erhashajaga, barhanarhundaga amagulu. ²² Wabagabira amami n'embaga z'ebyo bihugo byali bibalinanire, bagwarha echihugo cha mwami Sihoni w'e Heshiboni, n'echihugo cha mwami Ogi w'e Basani. ²³ Wayushula abana babo nka nkununu z'oku nkuba, wanabahisa omu chihugo walaganyaga b'eshe, bachigwarha chaba chabo. ²⁴ N'abana babo bajamo n'oku rhambula echihugo; Warhohya baninacho banali babona, Abakanana, Wabafumbasabo omu fune zabo, haguma n'abami babo n'olubaga lw'echihugo, mpu babajire oku balonzeze. ²⁵ Baba banahano omu bishagala bidarhi n'oku budaka bunagire, baba n'enju ziyunjwire obugale, amariba gahumbirwe, emizabibu, n'emizeituni, n'emirhi y'amalehe erhali migeke; Bakazi yugurha, n'okunywa, bachwera, balama omu bushagaluke eri bwinja bwawe bwarhuma. ²⁶ Na ntyo bakazagi yumuka n'oku chihindamula ku w'oyo. Amarhegeko gawe bagakweba enyuma y'omugongo, bayirha abalebi bawe bakazagi bahanula mpu bagaluke emwawe, bajira amabi manene. ²⁷ Oku ntyo wabaheba omufune z'abashombanyi, babalibuza. Aliko, omu kashanji k'amalumwa gabo, bakuyakuza, nawe, wabayunviriza omu chanya, n'oku lukogo lwawe lunene, wabarhumira ababalikuzaga omu fune z'abashombanyi babo. ²⁸ Amango baluhumukaga, barhondera kandi oku kujir'amabi embere zawe. Na ntyo washubibalikirira kandi omu fune z'abashombanyi babo, babarhambulaga. Aliko, bashubi kuyakuza, nawe, oli omu chanya wabayunviriza, n'oku lukogo lwawe lunene wakazi balikuza ngasi mango. ²⁹ Wabahanula mpu bagalukire amarhegeko gawe; nabo balama omu kuchibona, barhanayunvirizaga chiro amarhegeko gawe, bavuna oburhegesi bwawe, nabo bwanalamya obukenga, banajira ebirhugo byabo banzi, bayumus'egosi lyabo, n'oku rhakurhaba n'obukenge chiro. ³⁰ Wabashibirira myaka minene, wabajirira olukonge lw'oMuka wawe, kugerera abalebi; barhanabarhegaga chiro okurhwi. Na ntyo wabahana omu fune z'embaga z'abahisi. ³¹ Aliko, omu lukogo lwawe lunene, orhabalekereraga, orhana barhindibuzaga, bulala oli Nyamuzinda w'olukogo na munya bonjo. ³² Na ntyo, Mani Nyamuzinda werhu, Nyamuzinda oba mukulu, oba wabuhashe na wakuyobohwa, orhacha omu chilagane warhuhaga, orhabonaga nka chintu chigeke ebi bigiriginjo byoshi rhwamageramo, rhwabano, n'abarhambo berhu, n'abami berhu, n'abajinji berhu, n'abalebi berhu, na badarha, n'olubaga lwawe loshi, rhwarhindibwire, Kurhenga amango abami be Asiriya barhonderaga oku rhulibuza kugera z'ene. ³³ Mw'ebyo byoshi wajiraga wabonekana ok'onaba w'okuli, wachiyerekana okw'onaba mushinganyanya, bulala bwachiyereknaga okoli w'okuli, nerhu rhwalijirire amabi. ³⁴ Abami berhu, n'abarhambo berhu, n'abadahwa berhu na badarha barhakengaga amarhegeko n'amahano gawe barhayunvaga oku wakazagi bahanula. ³⁵ Amango balirhambwire, omu charagati k'ebintu binene wabahaga, omu bihugo bigalihire n'ebinagire, kurharhumaga bakukolera n'okuleka ebijiro byabo bibi. ³⁶ Na z'ene, lolaga rhwabano rhukala baja! Lolaga rhukala baja oku budaka wagabiraga ba darha, mpu bakazi lya amalehe gabo gw'omu bintu byamo! ³⁷ Bayushula ebintu byabo enyanya z'Abami bakazi kubahun'esoko, enyanya w'ebyaha byerhu; barhurhambwire kubi kugerera noku mibiri yerhu n'oku birhungano, rhuli omu burhindibuke bunene! ³⁸ Kw'ebyo byoshi, rhwabaga rhwajirire echilagane, oku rhuli enyanya zolwandiko; n'abarhambo berhu n'Abalawi berhu n'abadahwa bahebere h'echinkumwa.