¹ Na ntyo olubaga loshi lwajira endeko nka muntu muguma oli ahantu hali embere z'olunvi lw'amenji. Babwira Ezra, mwandisi, alerhe echitabu ch'amarhegeko ga Musa, Nahana arhumiraga aba Israeli. ² N'omudahwa Ezra alerh'echitabu ch'amarhegeko emalanga g'olubaga, lwaliri mw'abalume n'abakazi na balala bankayunva ebi bababwirire. Lwaliri lusiku lurhanzi l'omwezi gwa mushanvu. ³ Ezra asoma omu chitabu kurheng'esezi kuhika omugarhi garhi k'ezuba, eri abantu bali embere z'olunvi lw'amenji, embere z'abalume n'abakazi balimuzungulukire n'oku yunviriza okw'ali asoma echitabu ch'amarhegeko. ⁴ Omwandisi Ezra, ayumanga oku chishasha ch'omurhi, cha yumbakagwa enyanya z'oko. Eburhambi bwage, ekulyo kwage, ya yumanga Matitiya, Shema, Ananiya, Uriya, Hilkiya, na Maseya, n'ekulembe ya yimanga Pedaya, Mishaeli, Malkiya, Hashumu, Hakipadana, Zakariya na Meshulamu. ⁵ Ezra abungula echitabu embere z'olubaga, buno aliyumangire ahashegukire kulusha abandi bantu boshi, oku handi, olubaga lwa yumuka. ⁶ Ezra akuza Nahano, Nyamuzinda mukulu, n'olubaga lwashuza, n'okubarhula amaboko mpu : Bibe ntyo ! Bibe ntyo ! Bafukama embere za Nahano, n'oku banda amalanga oku daho. ⁷ Yoshuwa, Bani, Sherebiya, Yamini, Akubi, Shabetayi, Hodiya, Maseya, Kelita, Azariya, Yozabadi, Hanani na Pelaya; abo Balawi bayigiriza olubaga amarhegeko eri banayimangire ngasi muguma. ⁸ Bayinja basoma bwinja omu chitabu ch'amarhegeko ga Nyamuzinda, bakazi hindamula n'oku hugulira abantu libayunva. ⁹ Nehemiya, omurhegesi, Ezra, omudahwa n'omwandisi, n'Abalawi bayigirizag'olubga, babwira olubanga: Luno lusiku lugishirwe na Nahano, Nyamuzinda wenyu; lurhali lwa kulaka n'okurhoz'emiziga! Bulala olubaga loshi lwalemaga lwalaka omukuyunv'emyazi y'amarhegeko. ¹⁰ Bababwira: Mugende, mujirya enyama z'amashushi munanywe n'edivayi lyenyu liganyire, muhereze n'abarhaherhe, bulala luno lusiku lugishirwe na Nahamwerhu; Murhachilubaga, bulala obushagaluke bwa Nahano nji bwaba misi yenu. ¹¹ Abalawi nabo basiririza aolubaga loshi, n'oku babwira: Musire, bulala luno lusiku luli luchesibwa; ,murhabaga n'omugayo chiro! ¹² N'olubaga loshi bagenda bajirya n'okunywa, bahereza n'abarhaherhe kalyo, n'oku bachivuga, bulala bayunvirhe enyigirzo babahuguliraga. ¹³ Olusiku lwa kabiri, abakulu bw'omulala gw'olubaga, abadahwa n'Abalawi, babuganana omu ndeko embere za Ezra, omwandisi,mpu bamuyunvirize amahugulo g'emyazi y'amarhegeko. ¹⁴ Babugana bayandikire omu chitabu ch'amarhegeko Nahano ahaga Musa, oku Abana b'e Israeli bakazagi buganana omu bihandiro amango g'edinye ly'omwezi gwa mushanvu, ¹⁵ Banali kwanene oku menyisa omu bishagala byoshi n'e Yerusalemu: Mugende mulonze omu ntondo amarhabi g'emirhi y'emizeituni, n'emirhabi y'e Mizeituni y'elubala, n'emirhabi y'emihadasi, n'emirhabi y'engazi, n'emirhabi y'emirhi y'amagwerhe, n'ebisurusuru, muyumbake mw'ebihandiro, nk'okubali yandikire. ¹⁶ Na ntyo olubaga lwagenda kudurhira emirhabi, bayumbak'amahema oku lurhwe lw'enju zabo, omu mbuga zabo, omu mbuga z'enju ya Nyammuzinda, omuhantu h'olunvi lw'amenji n'omuhantu h'olunvi lwa Efurahimu. ¹⁷ Olubaga loshi lwarheng'elubungo bahanda mw'ebyo bihandiro by'amahema, n'okulama mwago mahema. Kurhenga amango ga Yoshuwa, mwene Nuni, kuhika zene, abana b'e Israeli barhasagi jira ebiri nk'ebi. N'okuba n'obushagaluke bunene. ¹⁸ Bayinja basoma ngasi lusiku mw'echo chitabu ch'amarhegeko ga Nyamuzinda, kurhenga olurhanzi kuhika oluzinda.. Bajira edinye lyalibwa siku mushanvu, n'olusiku lwa munane bajira endeko nkulu, nk'oku byalishinganene.