¹ Jaga lwayama lero! Nde wakushuza? Nde omu bashinganyanya wakulagako? ² Omuhwinja anaherera omu burhe bwage, n'omusire anafira omu busire bwage. ³ Nabona oku omusire ayumbaka anagandaza; Nantyo navuma echihandiro chage. ⁴ Abana bage barhabona cha chingira; banagenda babashunika oku lunvi, barhanabonaga owa bashwekula. ⁵ Abashalishali balya ebi bayezaga, n'okuyinja bakula omu mishaki, n'ebintu byabo bya mirwa n'abantu bali nyorha. ⁶ Obuhanya burharhenga omu kachulo, n'omujinya gurhamerera omu daho. ⁷ Omulume aburhangwa enyanya y'oku libuka, nka kula esasi y'omuliro ebalala. ⁸ Nyono, njina huna Nyamuzinda oburhabale, Na Nyamuzinda yi njinarhula olubanja lwani. ⁹ Ajira bintu binene n'ebirhakamenyikana, n'ebirhangazo birhakaganjwa; ¹⁰ Ye sheshera envula oku daho, n'okurhuma amenji gashulule omu mashwa. ¹¹ Anayinamula abalembu, n'okushwekula abalibuzizwe; ¹² Anarhoza emirimo ya balume bayengehere, n'efune zabo zirhaka chibijirirabo; ¹³ Abarhimanya anabagwarha omu murhego g'obwenge bwabo, n'oku chulaguza kw'abahanuzi omu kwakubagezwe. ¹⁴ Banashimana omwizimya omu kagarhi k'ezuba, n'okuhabuka habuka omu zuba nka budufu. ¹⁵ Na ntyo Nyamuzinda analanga abazamba oku bahangalanyi babo, n'oku bachungula omu fune z'abachiri misi; ¹⁶ Na ntyo omukene aherhe obulangalire aliko omubi abumba obunu bwage. ¹⁷ Liri ragi lyage omuntu Nyamuzinda ahanula! Nawe orhagayaguzaga obuhanuzi bw'Ogala - Byoshi. ¹⁸ Ye jira echihulu, yena chibuka, anavuna, n'okulunga n'efune yage. ¹⁹ Kalindarhu njakushwekula omu buhanya, na kali mushamvu amabi garhakachikuhikako. ²⁰ Nja kufumy'olufu omu mango g'eshali, omu ntambala anakulikuza oku boje bwa kere. ²¹ Nji walangwa oku bojo bw'olulimi, njiwaba buzira boba amango obubi nji bwayinja. ²² Nji washekera oku babihya nka beshali, nj'orhayoboha ebiryanyi by'egulu. ²³ Bulala nji wanywana n'amabale g'omushwa, n'ebirhugano by'omugulu nji byaba n'omurhula haguma nawe. ²⁴ Nji wabona omurhula omu chihandiro chawe, nji washigana obuso bwawe buyenere, ²⁵ Njiwabona abana bawe bayushuka, n'abanjukulu bawe nji bayuka nka birhi by'omu mashwa. ²⁶ Nji waja omu shinda eri okola mushaja, nka kula baheka omurhabi oku kasanzi kago. ²⁷ Lolaga byoshi rhwabwene, lolaga ebiriho; Nawe obiyunvage n'okubijira bunguke bwawe.