¹ Elifazi w'e Tamani, achihira omuluhya aderha omwazi: ² Nka rhwakagala bumbul'obunu, rhurhakalibuzwa? S'aliko kurhe omuntu akafunda kuderha? ³ Lolaga, oyibuke oku wahanwire bantu banene, amaboko gashogonokere wakazigahereza esimikiro. ⁴ Emyazi yawe yanakomeza abali bafundirwe, wakomeza amadwi gakomenye. ⁵ Na ntyo olwawe lwamahika, wamafundwa! Na ntyo wamahikwa ko, orhajaga wachirhindibuza! ⁶ Obuba bwawe emwa Namuzinda ka burhakaba simikiro yawe? Obulangalire bwawe burhakaba bushinganyanya bwawe? ⁷ Olonze omu byawe: nd'oli mweru kweru waherere? Bashinganyanya bahe bayirhwaga boshi? ⁸ Oku nyono, na mubwene, abahinga amabi n'aba rhwera ebi rhashinganene bana shalula amalehe; ⁹ Bayirhirwe n'omuka gwa Nyamuzinda, bahungumuka oku muhusi g'oburhe bwage, ¹⁰ Omulundumo gwa bashosho guherhe obuzinda, n'amenyo g'abana babashosho gana hungumuka; ¹¹ Shosho akabula echy'alya anafa, n'abana bayo banashandala. ¹² Omwazi amango gwampikiraga bushalashala n'okusomerwa, n'oku rhwiri kwani kwa yuvirhe milenge migekegeke. ¹³ Amango g'ebilorho by'obudufu binene byalerha enkengero, amango ero linene linoza abantu. ¹⁴ Nayunvaga obuba n'omusisi, n'amavuha gani goshi ga dirhimana. ¹⁵ Omuzimu agera hofu nani , n'enviri zani zoshi za hehema. ¹⁶ Oli nka muntu ntamenyere aliri embere z'amesho mani, narhondera oku yunva omulenge guli gwabohereza kubuya buya: ¹⁷ K'omuntu akaba mushinganyanya embere za Nyamuzinda? K'omuntu akaba mweru kweru embere z'owamu jiriraga? ¹⁸ Chiro Nyamuzinda arhachishingira lwoshi abambali bage, na nka bamalayika ababwenek'obubi, ¹⁹ Kanga oku balamire omu nju z'ebumba, abw'obuko bwabo buba bw'omukachulo, bakasinyongolwa nka sirhu! ²⁰ Esezi n'egolo eri bagayire, banahera ngasi lusiku, na ntaye wachibayibuka; ²¹ Omugozi gw'akalamo kabo gwana chikire, banafa, n'okubula oburhimanya.