¹ Enyuma waho, Yubu abumbul'obunu ajachir'olusiku lwage aburhwagamo. ² Arhoza omwazi n'oku derha: ³ Lukazi hera olusiku na burhagamo n'obudufu bwa derhaga: Omwana w'omurhabana aburhwaga! ⁴ Olo lusiku! luhindamuke mwizimya, Nyamuzinda amenye alushibirira omu mpingu, n'obuche burhalukoleraga! ⁵ Luzike n'obudufu ndunduli, n'echichu chilushukire, ngasi chiyiragwire chi lubone! ⁶ Obo budufu! omwizimya gulurhole gulujire biryo byago, Lurhaganjangwa omusiku z'omwaka, luhere omu kuganja emyezi! ⁷ Obwola budufu bugumbe, murharhengagamo ebyo kusimisa! ⁸ Lukomwe na balala bakoma esiku, bulala bayinjichula Leviatini! ⁹ Zihere enkununu z'emiseke miseke yabo, oku langalira kw'ezuba kuzunguluke buzira kubona omu kuzibula akula engohye! ¹⁰ Bulala afundaga kuchinga olunvi lwe nda nalirimo yintabona agala mabi. ¹¹ Charhumaga ntafira omu nda ya nyama? Charhuma ntaba nafa omu kurhenga omu nda? ¹² Charhumaga haba amadwi g'oku ntola, charhumaga haba mabere mabiri g'oku nyonsa? ¹³ Bunola nchilyamire, nji nchiberere omu murhula, n'oku lyama, nji mpumuke, ¹⁴ Haguma n'abami n'abarhambo b'egulu, balala bayumbakire omu mpinga. ¹⁵ Haguma na baluzi baliherhe Ehoro, n'emina yabo ya bumba furanga. ¹⁶ Changwa nji nta chihangalanaga, nji naba nka chimamano chibishirwe, Nka kula abana barhabonaga ezuba. ¹⁷ Eyo munda erhalichiri babi, n'eyo ya barhamire bahumukira n'abarhaherhe misi; ¹⁸ Ebigorogo nabyo byaba n'omurhula, barha nachiyunvag'omulenge gw'owabakalihira mpu bakole; ¹⁹ abadorho n'abakulu bali aho, omu buja barhajiraga ebi balibwirirwe n'a nahamwabo. ²⁰ Chirhuma ohereza owalumwa obuche, na kalamo ku balala bwo murhima g'omujinya, ²¹ baherhe baling'olufu, lurhanayinja, abalulonza kulusha obugale. ²² Abachishingira obushagaluke n'okuba n'obusime, nka barhakabona eshinda? ²³ Oku muntu orhamenyere emunda ali aja, na Nyamuzinda ya langa ebyage byoshi? ²⁴ Emigayo yani bye biryo byani, n'oku kulaka kwani kusheshekala nka menji. ²⁵ Ebi nanyoboha, byo bino bya manyinjira; n'ebinshalamya, byo bino byamantibukira kwo. ²⁶ Oku nyono nta murhula, nta kuhumuka, nta kugohya na kavulindi kampeza.