¹ Omurhima gwani goshi yi gwadirhimana, n'oku nyanyagarha aha gubera. ² Yunva, yunva oku yoboha k'omulenge gwage, n'echikankamo chirhenga omu bunu bwage! ³ Abijira okuzunguluka omu bugali bw'empingu yoshi, n'obuche bwage bwanakoleza egulu aha lihikire. ⁴ Oku handi kukungula bwenene: akaliha n'omulenge gwage gwa mayipango; Ntacho achirholere oku bwinja, amango omulenge gwage guherhe gwa kungula. ⁵ Nyamuzinda akaliha n'omulenge gwage omu njira zi kwirire, ajira ebintu binene ebi rhurhakagala yunva chiro. ⁶ Anabwira olubula: Rhogera oku daho! N'oku bwira envula, chiro n'oku nvula y'echihonzi. ⁷ Anaheba echifundo oku fune z'abantu boshi, buzinda abanjibamumenya boshi nk'abalemi babo. ⁸ Enyama y'elubala yana chikula omu mwazo, zanajilyama omu kabisho kakomere. ⁹ Echihusi chanayinja aha charagati k'ezuba, n'emboho, n'omuhusi gw'emalambo. ¹⁰ Omuka gwa Nyamuzinda gwana jira olubula, anakehya ahantu amenji kakashandala. ¹¹ Anahira olwakungu omu bichu, n'oku bishandaza nka sasi; ¹² Okugendekera kwabo kwa jirika omu kulonza kwabo,mpw'okujirika koshi kwaba oku babaga barhegekerwe, omu gulu balamiremo; ¹³ Kali nka karhi ali ashurha oku gulu lyage, changwa chiri nka chimenyiso ch'obusime bwage, ali alonza oku yerekana. ¹⁴ Yubu, oyunvirize ebi bintu byoshi! Obirhole kandi bisomerezwe bya Nyamuzinda! ¹⁵ K'omenyere oku Nyamuzinda arhegeka, anakoleza ebichu byage mw'emirazo? ¹⁶ K'oyinji gurhe ajira ly'ebichu, ebisomerene by'olala w'obwenge bukwirire? ¹⁷ K'oyinji chirhumire emyambalo yawe eri ya chuka amango egulu lya humuka n'omuhusi gw'ahacharagati ch'ezuba? ¹⁸ Ka wakagala kujir'akage okulambula eby'emalunga, bina zibuhire nka chiyo ch'ebichu? ¹⁹ Gurhe rhwakamenya ebi rhwaka mubwira; rhuli binganyi bwenene okumenya ebi rhwaderha embere zage. ²⁰ Bichi nji na mubwira nji na shambala? Aliko muntu ohe wakalonza oku heza kwage? ²¹ Orhakananiza ezuba lya koleza omu chanya, Amango omuhusi yi gwagera n'okulerha obuchese; ²² Olunda lw'enyanya lwanaba buche nka horo. Ah! Obukulu bwa Nyamuzinda buyoboherwe! ²³ Rhukagala kuhika oku Ogala- Byosi, Ye mukulu oku misi, omu kucha olubanja, omu bushinganyanya oku byoshi: Arhashuzaga! ²⁴ Che chirhumire abantu boshi bakwanene oku muyoboha; ntaye ahekere kw'amesho mpu murhonzi.